Read Biete TIRTÔNHEI SINTHO 25 Bible Online

TIRTÔNHEI SINTHO 25 - Biete bible

TIRTÔNHEI SINTHO 25

¹Festa khan ram a op nung sûn thumka zoiah khan Kaisaria rithokin Jerusalemah a hang fe a.

²Thiampu lalhei neh Juda ruaituhei khan Paula neh an thubuai kha an lei iril a.

³Anmani lunginkhama Paula khah Jerusalemah hong iṭhui pêk rangin an lei ngên a; lampuia ruang lei ichuan a, lei ithat an itum a nit.

⁴Khannisela, Festa khan, “Paula chu Kaisaria tâng inah a om mai a, kei khom fe nôk zel ki ti.

⁵Khasikin, hi mi hin thonsualna ai nei a nitin chu nin ruaituhein Kaisaria ne zui sela, nô riseh,” a ti a.

⁶Khante, Festa khah an lâiah sûn iriatka manih, sûn sômka manih a châm a; khanchu, Kaisaria a fe nôk tâk a. Atûkah chu roirêlna ṭhungmunah â ṭhung a, Paula kha hong iṭhui rangin thu a pêk a.

⁷Paula a hong tlungin chu, Jerusalema rithoka Juda zuanghei khah a vêlkan an ngîr a, an nôna thu lian itam takka an isîr a; khanniseh, an nônahei kha â dik a nit iti lak sûtinfel thei mak a.

⁸Paula khan a thiam thu â sîr tâk a, “Judahei Dân iseh mang a, Tempil borinnim mang a, Kaisara chungah khom îte thônsual mang e,” a ti a.

⁹Festa khan Judahei lâiah riming iṭha lo a nuam sikin Paula ziangah, “Jerusalemah hang ife a, ki makunga hi nang an nôna thuhei hih irêl ni nuam im?” a ti a.

¹⁰Paulan a ziangah, “Kaisara roirêlna ṭhungmun maah ki ngîr a, hi mun ngêiah hin roiirêl pêkin ki om rang a nit. Judahei chungah thil îte thônsual mang e, iti nangmah khomin ifel takkan ni riat a.

¹¹Dân ke châi a, thina rang khop thil kî tho a nitin chu ithi khom sêl mang e. Khannisela, an ne nôna thu hih â dik noa a nitin chu tutên an ziangah ne peh thei no nih. Kin thu hih Kaisara zianga thlun kî ngên a nit,” a ti a.

¹²Festan a roirêlpuihei â sîrpui zoiin a sâm a, “Kaisara zianga thlun nî nuam angkan Kaisara ziangah tlung thei ni ti,” a ti a.

¹³Sûn izâka manih a hek nungah khan Rêng Agripa neh Berniki khah Kaisariah khan Festa lômpui [29] rangin an hong a.

¹⁴Sûn izâkah manih an châm a, Festa khan Paula thurchi khah rêng â ril a, “Felika khan mi tâng khatkah a mâk a,

¹⁵Jerusalemah ki hang feah khan Juda thiampu lalhei neh upahein an nôna thu ki ziang an ithlun a, thiamno inchang rangin an ne ngên a.

¹⁶Khannisela, keiman an ziangah, ‘Mi tute, ama nôtuhei neh mâi ritong a, an nôna chungchângah a thiam thu sîrna zoro a mu mâkah chu mi rêng rêng hih thiamno inchang rang chu Rom.dân ni mak e,’ ki ti a.

¹⁷Khante, hin an zuang tlung a, rivuak loiin atûk zelah roirêlna ṭhungmunah ke ṭhung a, kha mi khah hong iṭhui rangin thu ki pêk a.

¹⁸Â nôtuhei khah an iding a, ki tûng lamin îte a chungah thônsualna lian ineiin isîr thei mak a.

¹⁹Anmani sakho thu neh mi khatkah â thi tâk, Paulan, ‘A ring nôk’ itia a îsîr, arming Jisua chungchânga an ibuai pipai ringot thu bang a nit a.

²⁰Keiman chu kha thuhei khah ki ngaitua rang dân khom reh mang sikin thu fel uala ria nuamin Jerusalemah ife a, khi taka a chungthu rêlpêk rangin a nuam neh nuam no ker don a.

²¹Khannisela, Paulan amah iṭha takka vêng neh an thu Kaisara zianga thlun a ngên tâk a. Khasikin, Kaisara zianga ken fe thei mâkah chu iṭha takka lei ienkol rangin thu kî pêk a nit,” a ti a.

²²Agripa khan Festa ziangah, “Kei khom kha mi thu sîr khah arngai kî nuam kêng,” a ti a. Festa khan, “Naktûkah lar ngai roh,” a ti a.

²³Atûkah chu Agripa neh Berniki khah roinpui takkan an hong a, ribûmna inah an lût a, sipai ulianhei neh khosunga ruaitu ual ualhei khom an hong sa a. Khanchu, Festa thupêkin Paula kha an hong ṭhui inlût a.

²⁴Festa khan, “Rêng Agripa neh hi muna kin lâia om murdihei o, Juda mipuihei murdîn, ‘Iring tlâk ni mak,’ itia an îkhêk a, Jerusalemah neh hin taka a chungchâng thu ki zianga an îsîr chu hi mi nin imu hih a nit.

²⁵Khannisela, keiman chu thi theina rang rak îte thônsualna a nei mu mang a; nikhomseh, aman Rêng inlaltak zianga thlun a nuam sikin itir kî tum tâk a nit.

²⁶Khanniseh, Rêng inlaltak zianga thlun rang a chungthu ker ziak thap rang khom kî mu no a nit. Khasikin, nin makungah ki hong iṭhui a nit hih; Rêng Agripa, a bîkin ni makungah kin hong iṭhui a nit, isualsân a nit zoiin îtak mani lua riziak rang ki mu theina rangin.

²⁷Amah an nôna ifel takka riziak loia Rêng inlaltak zianga mi tâng itir chu â dikin kî riat ino a nit,” a ti a.