Read Biete TIRTÔNHEI SINTHO 26 Bible Online

TIRTÔNHEI SINTHO 26 - Biete bible

TIRTÔNHEI SINTHO 26

¹Agripa khan Paula ziangah, “Ni thiam thu isîr thei ni ti,” a ti a. Khanchu, Paula khan a kut a phar a, a thiam thu hingkan â sîr tâk a:

²“Rêng Agripa, vuanah hin ni makungah Judahein an ne nôna murdia ki thiam thu ke sîr rang sikin vânṭhat ker ti tak tak.

³Judahei vângsak dân neh thubuai an rêl ngai dânhei ni riat infel tak tak sikin vânnei ki irti nôk ual a nit. Khasikin, iṭha takka ki thu ne lei ringai pêk rangin nang kî ngên a nit.

⁴“Ki naipang lâia rithokin ki chipuihei lâiah neh Jerusalema ki omdân, ki nunchan khah a tîr ata Judahei murdîn an riat a.

⁵Ki thurchi an isîr nuamin chu a bula rithokin ei sakho pôl ikhir tak Farisai lâia mi ki lei hong nit iti khom an iriat a nit.

⁶Ei chibulhei zianga a ṭonginkung khah Pathianin a len ki tûngna sikin atûnah hin roirêlna maah kî ngîr a nit hi.

⁷Kha ṭonginkung ngêi khah imu tûngin ei ni nam sômleiinikahei khan a sûn a zânin ṭhatnemringai takkan Pathian sin an itho ngai a nit. O, Rêng Agripa, kha tûngna sikah khan Judahei hin an ne inô a nit.

⁸“Nangmani hintaka omhei hin ithôm Pathianin mithihei a kâiithoi iti hih iam ngai loi rua nin ibe?

⁹“Kei khomin Nazaret Jisua riming idoia theidôr isua rangin ki lei ringai ngai a.

¹⁰Khangkah khan Jerusalemah ki tho ngai a; Thiampu lalhei zianga rithokin thu ki lâk a, Pathian mihei lâia mi itam takkah tâng inah ki khum a, ithat an tum khomin ki lei ihampui sa ngai a.

¹¹Inkhôm inhei khomah voi itam takkah deng ken thei a, an iamna inbâng rangin zâltak ki song ngai a. An chungah ki ning a thik tak tak ngai sikin ram dang khuahei idên khomin annihei chu ki nuam ilo rangin kî fe ngai a nit.

¹²“Khangkana tho rangah khan thiampu lalhei zianga rithoka thu imun neh an thupêk ichôiin Damaska ki pan a.

¹³Khanchu, O Rêngpa, lampuiah ki lôn lâiah khan sûnlâi takah chu rivâna rithokin ivâr, inî nêka vâr ual ki mu a, amakhan keimah neh ki fepuihei a ne zuang el a.

¹⁴Kin rêngkan rinêngah kin ilîr a, rôlin Hebrai ṭongin, ‘Saula, Saula, ithôm ni nuam ni ne ilo ngai? Sunna rol risui hih nangmah bang nang a înnat rang a nit,’ ne tin ṭong ki riat a.

¹⁵“Keiman, ‘Pumapa, tûm nî nit?’ ki ti a. “Pumapa khan, ‘Jisua ni nuam nî lo ngai khah ki nit.

¹⁶Nikhomsela, atûn thoi inla, iding roh; ki sinithotua nang iphun rangin ni ziangah ki zuang înlâr a nit. Ni ne imu thu neh thil nang ki la înmu ranghei hih mihei ne ril rang a nit.

¹⁷Judahei neh Jentailhei ziangah nang tir ki ta, an kuta rithokin nang sanisuang ki ti.

¹⁸Keimah an ne iam sika an sualhei izâ a nit theina rang neh mi rithianghei lâiah dongtum an nei theina rangin; an mit invâr pêk rang hei, izîng ata ivâr tianga mâi inngat rang neh soitana thuneina nuai ata Pathian tianga inngat ranga phun ni nit,’ a ne ti a.

¹⁹“Khaangkan Rêng Agripa, rivâna rithoka inlârna kî mu khah ke pom tâk a.

²⁰Khanchu, Damaska mihei ziangah ke sîr phut a, khanung Jerusalema mihei ziangah, Judai rama mi murdi neh Jentailhei ziangah khom rileta Pathian tiang mâi ingat a, an rilet titak iti riatna rang sin itho rangin thu ki îsîr pêk ngai a nit.

²¹Kha sikah khan Tempila ki om lâiin Judahein an ne man a, ne that rang an tum a.

²²Khannisela, Pathianin a ne ṭangpui a, vuansûn tenah hin mi lianhei neh mi chînhei zianga thu sîr rangin ki la îding thei a nit. Zânthlahei neh Mosian thil zuang itlung rang thu an lei îsîr tâk ngir khah ki îsîr ngai chu a nit.

²³‘Mesia khan tuang a ta, mithi lâi ata thoinôk maruaitu nîng a ta, saninringna vâr thu Judahei neh Jentailhei ziangah inpuang a ti,’ itia an îsîr ti no hi chu thu îte isîr ngai mang e,” a ti a.

²⁴Khangkana a thiam thu Paulan â sîr mai lâiah khan Festa khah iring takkan â khêk a, “Paula, nang invêt tâk a nit, ner sei tam raina hin invêtin nang ai siam tâk a nit hih,” a ti a.

²⁵Nikhomsela, Paula khan, invêt mang e, “Festa maritomtak, invêt mang e; thudik tak ki îsîr a nit hi.

²⁶Hi thu hih Rêng Agripa khomin a riat, a makungah khom ihâi takkan ki îsîr a nit hih; ai riat ino khatkah khom omak iti ki riat; hi thu hih inrûkka tho khom ni mak.

²⁷Rêng Agripa, zânthlahei thu ni iam im? Ni iam iti ki riat,” a ti a.

²⁸Agripa khan Paula ziangah, “Sôt inote sunga Kristian nen chang nî tum mani?” a ti a.

²⁹Paulan, “Irang latkan manih, itlâi zâm kan manih nangmah bang ni loiin, vuansûna ki ṭong ringai murdihei khom hih keima angkana om rangin Pathian ziangah kî ngên a nit; rênbun hi chu bun sa loi rangin,” a ti a.

³⁰Khante, Rêng hei, Ram-optu hei, Berniki hei neh mi danghei murdi khah an thoi a;

³¹an infiar a, an risôn a, “Hi mi hin thi theina rang neh tâng ina tâng theina rang îte lei tho mak hite,” an ti a.

³²Khante, Agripa khan Festa ziangah, “Hi mi hin Kaisara zianga tlung lei rizong no sela chu isua thei zel a nit hih,” a ti a.