Read Biete TIRTÔNHEI SINTHO 27 Bible Online

TIRTÔNHEI SINTHO 27 - Biete bible

TIRTÔNHEI SINTHO 27

¹Khante, Itali rama rikuangah kin fe rang an ithlûk kaneh Paula neh mi tâng dang ṭhenkahei khah “Augusta Sipai Pôl” an itia sipai rizaka ruitu Julia kutah an bâng a.

²Adramutini khua ata rikuang, tuikhanglian rikama Asia ram khuahei isir rangah khan kin chuang a, kin fe tâk a. Makedonia rama Thesalonika kho mi Aristarka khom a om sa a.

³Atûkah chu Sidon khua kin tlung a, Julia khah Paula chungah a ṭhat ok a, a înkhôk an lei sem theina ranga a rualhei zianga fe khom a phal a.

⁴Khantaka rithokin kin fe nôk a, ithlîn a nino tiang a ne sêm sikin Kupra tuihual rili ithli ri-upna tiang kin rot tâk a.

⁵Kilikia ram neh Pamfulia ram ridîn tuipui kin khêl nungin Lukia rama Mura khua kin tlung a.

⁶Amakhan sipai rizaka ruitu khan rikuang khatkah, Alekzandria ata hong rithok Itali rama fe rang a mu a, kha rikuangah khan a nen chuang tâk a.

⁷Sûn itam takkah zâm zâmkan kin fe a, intak takkan Nidos khua ridîn kin tlung a. A le tianga ithlîn a ne sêm ikhîr sikin Kret tuihual rili phâivua ri-upna tiang kin rikual a. Kret tuihual môr rizum Salmoni an iti khah kin khêl a.

⁸Khanchu, intak takkan vakôl irûlin, mun khatkah, “Rikuang ringamna hoi,” an iti khah kin hong tlung tâk a; amakhah Lasai kho kôla om a nit.

⁹Amakhan sûn itam takkah kin châm nungah khan Ritlanna Ni [30] khom a thleng pial tâk a, rikuanga fe iṭi a om tâk sikin Paulan hi thu hih a ril a, an ziangah,

¹⁰“Mipuihei, atûna rithoka ei fena rang hi chu iṭiom tak nîng a ti; siatna neh rimangna lian tak rikuang neh a neinun chungah neh eini chungah khom tlung a ti iti ki riat,” a ti a.

¹¹Khannisela, sipai rizaka ruitu khan Paula ṭong nêkan rikuangpu neh rikuang ineitu ṭong khah tak a sôn ual a.

¹²Khante, phalbia omna rangin kha rikuang ringamna khah ân ṭum no sikin mi â tam ualin khantaka rithokin ife a, ithei pai a nitin chu Foiniki khua tlung a, khantaka phalbi zoro mang inhek khah an nuam a. Foiniki khua chu Kret tuihuala rikuang ringamna khatkah a nit a, simthlang neh mârthlang[31] isonga om a nit.

¹³Sim ithli khah a hong râng vang vangin chu an lungdo tak an imu tâk an sôn a, thîrkuat khah an kêl a, Kret vapang khah thei dôra nâiin an rûl a.

¹⁴Khannisela, itôiteka nungah chu imuanga rithokin thlipui inah tak “Eurokuilo”[32] an iti ngai khah a zuang râng a.

¹⁵Rikuang khah a zuang dêng phit a; ithli ma songa infe thei a nit khâi no tenan chu kin ithla tâk a, a nen lêng a nen lêng diai tâk a.

¹⁶Tuihual ichînte, Kauda[33] an iti rili ithli ri-upna tiang a nen lêng a, intak tak pumin phâiphâk rikuangte khah kin inzôk thei ṭôk a.

¹⁷Rikuang sungah an hong thun zoiin chu rikuang khah ruiin an khuap khap tâk a. Libia tuirikama balinôla a ne sêm inlût khah an ṭi sikin puanzâr khah an iṭhum a; khanchu, ithlîn a nuamna tiang tiang a nen lêng nôk tâk a.

¹⁸Thlipui neh tuirifôn khan a nen lêng mai sikin atûkah chu rikuang neinun pêl ichînkah chu an pai tâk a.

¹⁹Atûk nôkah chu anmani ngêiin rikuang tinmatua khom an pai suak nôk tâk a.

²⁰Sûn itam takkah inî khom, ârsi khom ilang dap mak a, thlipui lakin chu a ne nuai mai a, a nungkhônah chu iring rang rêng rêngin ritûng khâi mang ung a.

²¹Khante, bu ne loia zoro sôt takka an om nungin, Paula â ding a, an ziangah, “Mipuihei, ki ṭong khah nin izôm a, Kret tuihuala rithokah khan ei izuang khâi ino ni sela chu hi siatna neh rimangna hih ei itong ino rang pial.

²²Nikhomsela, atûn khom nin ilung inringam rangin nangni kî ngên a nit; nin lâia tutên a ringna ichân no nih, rikuang hih chu ichân ai nit rang a nit.

²³A ta ki nit a, ki biak ngai Pathian khan vântirtôn khatkah zâninah khan ki ziangah a zuang tir a.

²⁴‘Paula, ṭi no roh, Kaisara makungah ngîr ngêt ni ti. Khabanah, rikuanga ni chuangpuihei murdi khom nangma sikin Pathianin an ringna ai zua pêk rang a nit,’ a ne ti a.

²⁵Khasikin, mipuihei, rithlaringam takkan om rei. Pathian ki iam a, a ne ril lam angkah takin tlung a ti.

²⁶Tak tuihual taka manih nen lêng suak a ti,” a ti a.

²⁷A zân sômleiilina zânah khan thlipuiin Mediteranean [34] tuipuiah a nen lêng mai a, zânlâi vêlah chu rikuangpuhein imuang kin inâi tâk angkan an riat a.

²⁸Khanchu, tui inthûk dôr an rikhî a, lam sôminika inthûk a nitin an riat a; itôiteka nungah an rikhî nôk a, lam sômlei lam ringaka inthûk a nit tâk a.

²⁹Lungkhorok kârah ne nong a ti iti an ṭi sikin rikuang rimei tiang thîrkuat ilikah an iṭhul a, khovâr an ngâkmo tak tak a.

³⁰Khanungchu, rikuangpuhei khan rikuang lu tiang thîrkuathei iṭhul rang angkana tho pelêmin phâiphâk rikuang khah tuikhanglianah iṭhul a, rikuang khah imarak an tum a.

³¹Nikhomsela, Paula khan sipai rizaka ruitu neh sipaihei ziangah khan, “Rikuangpuhei hih an om non chu zôk thei no tin u,” a ti a.

³²Khanchu, sipaihei khan phâiphâk rikuang rui khah an ât isat a, an iṭhul inrimang tâk a.

³³Khovâr rangto takin chu Paula khan rikuanga mi murdi khah bu ne rangin a ngên a, an ziangah, “Vuansûn tenah hin îte fah loia nin omna a sûn sômleiilika nî a nit tâk a.

³⁴Khasikin, bu ne rangin nangni kî ngên a nit, nin ring theina rangin nin inang a nit. Nin samzâi khatkah khom rimang no nih,” a ti a.

³⁵Kha thu khah a ti zoiin chu ibai a lâk a, an rêngka maah khan Pathian ziangah lômthu â sîr a, a khoi a, a fâk tâk a.

³⁶Khanchu, an rêngkan rithlaringam takkan an fâk tâk a.

³⁷Rikuanga mi om khah kin rêngkan rizanikah sômsarikah irukkah[35]kin nit.

³⁸Mi tinin an khop seng zoiin chu rikuang inzângna rangin an bu pêlhei khah tuipuiah an pai tâk a.

³⁹Khua a hong vârin chu rikuangpuhei khan taktiang mun im ai nit reh thei mak a; nikhomsela, tui ikil ṭiaiphoi an mun chu rikuang khah ithei pai a nitin chu kha muna imuang ikhâi an tum a.

⁴⁰Khanchu, thîrkuat ruihei khah an ât isat a, tuipuiah an mâkrak tak a; kha zoro ngirah khan a zâpna khuap ruihei khom khah an sût a, matiang puanzâr khah ithli sêm thei rang lamin an inrisâng a, ṭiaiphoi khah an pan tâk a.

⁴¹Nikhomsela, irâ inika inṭhenna takah kin lût thap a, rikuang khan imuang a va sun a; a lu tiang khah â ôk ngit a, inchâng thei loiin â tâng tâk a, tuirisok nat rai sikin armei tiang chu a lei koi thiai tâk a.

⁴²Mi tânghei khah tui riliai titen an rot lôiin iti ṭi sikin sipaihei khan anni khah ithat vang an tum a.

⁴³Nikhomsela, sipai rizaka ruitu khan Paula inring a nuam sikin an thil tum khah a khap a; kha nêkan tui riliai itheihei chu tuiah richôma imuang lei ikâi masa rang neh,

⁴⁴mi danghei khom thingphêk chunga manih, rikuang lek chunga manih ikâi rangin thu a pêk tâk a. Khangkah khan kin rêngkan imuang kin kâi riai tâk a.