Read Biete TIRTÔNHEI SINTHO 28 Bible Online

TIRTÔNHEI SINTHO 28 - Biete bible

TIRTÔNHEI SINTHO 28

¹Imuang kin kâi zoiin chu kha tuihual khah Malta a nit iti kin riat tâk a.

²Kha tuihuala mihei khan lung an ne lei inkham tak tak a. Rua a sûr a, a dâi tak tak sikin meipui an sêm a, kin rêngkan an ne lei lôm a.

³Paulan thing pomkah arkhôm a, meia khan a tua a, a lum sikin irûl a hong suak a, a kutah â chuk a, a kop ngit a.

⁴Khantaka mihei khan Paula kuta irûl ritûl khah an mun chu, “Hi mi hin mi ai that ni ngêt a ti, tuipuia rithokin hong zôk khom sela, idik taka Roirêltu khan inring rangin ai nuam khâi ino a nit hih,” an ti a.

⁵Nikhomsela, Paulan irûl khah meiah a thing iṭhul a, ani khah ingkan te khom om ual mak a.

⁶Anni khan ithling rangin manih, voikarenga ikûia thi zel rangin manih an tûng a. Isôtkah an ngâk a, îte ti viat make iti an riatin chu an ilunginṭong an thleng a, “Pathian a nit hih,” an ti tâk a.

⁷Khante, kha mun kôlah khan kha tuihuala an ilal Publia rikul a om a. Ani khan a ne lei lôm a, sûn thumka sung ilôm takkan a ne thlun a.

⁸Publia pa khah inkhur neh êksen rivoiin a lei zâl ṭian a, Paula khah a ziangah a va fe a, a lu chungah kut ringatin a ṭongṭai a, ân dam tâk a.

⁹Kha rizoiin chu kha tuihuala dam ino murdihei khah an hong a, an dam pak tâk a.

¹⁰Anni khan thilpêk itam takkah an ne pêk a, khabanah kin rithok nôk rang khomin kin inzinnaa kin inang rang murdi rikuangah an lei siam thlâm a.

¹¹Thla thumkah a hekin chu rikuang khatkah, Alekzandria rithoka honga phalbia kha tuihuala om tâk arming “Pathian Inphîr”[36] an iti-ah khan kin fe tâk a.

¹²Khanchu, Sirakus khopui kin tlung a, amakhan sûn thumkah kin châm a.

¹³Khantaka rithokah khan kin fe nôk a, Regium khopui kin tlung a. Atûkah chu sim ithli a hong râng a, a sûn niknan Puteoli khua kin tlung a.

¹⁴Amakhan iamtuhei ṭhenkah kin mu a, an ziangah sûn sarika châm rangin an ne ngên a; khangkah khan Rom.khua kin itlung tâk a nit.

¹⁵Rom.khuaa iamtuhei khan kin thurchi an riat kaneh khan taka rithokin “Appia Dukân” neh “Khualbûk Ithumka” dênin an ne lei hong don a. Paulan anni khah a mun chu Pathian ziangah lômthu â sîr a, arthla arngam ok a.

¹⁶Rom.kin tlungin chu Paula khah sipaiin ingâk ṭian puma a khâta a om an phal pêk a.

¹⁷Sûn thumka nungah chu Paulan khotuala Juda ruaituhei khah a koibûm a. An hong ribûm tenan chu an ziangah, “Suapuihei, ei mihei chungah neh ei chibulhei Dân chungah îte thonsual no khom inlang, Jerusalemah an ne man a, Rom.mihei ziangah an ne ibâng a nit.

¹⁸Rom.mihein an ne fia nek nek a, thina rang inrup îte kî thônsual an mu no sikin ne sua an nuam a.

¹⁹Nikhomsela, amakhah Judahein an sêl khap sikin Kaisara ziang ithlun ngêt kî nang tâk a nit; khanniseh, ki chipuihei demna rang chu nei mang e.

²⁰Kha sikah khan nangni rimupui a, nangni ṭongpui rangin nangni kî koi a nit. A dik takkan Israelhein an itûngpu sika hingkana rênbun kî bun a nit” a ti a.

²¹Anni khan a ziangah, “Ni thurchi Judai rama rithokin lekha khomin mu mang unga, suapuihei lâia mi tute khom ni thurchi â seh tiang manih â ṭha tiang manih isîr rangin zuang mak e.

²²Nikhomsela, hi ni omna pôl hih mun tinah mîn an îsîr insiat ngai inin kin lei riat a; nangma ringai dân khom â ria kin inuam a nit,” an ti a.

²³Khanchu, nikhua an khit a, kha nikhuan chu mi itam takkah Paula omna inah an hong a. Zînga rithokin zân idênin an ziangah Pathian Ram thurchi â sîr a, a rilfia a; Mosia Dân bu neh zânthlahei lekhabu mangin Jisua thurchi inrethiam a tum a.

²⁴A thu sîr khah ṭhenkan an iam a, ṭhenkan chu iam mak a.

²⁵Khanchu, an ilung inrual khâi mak a, Paulan hi thu khatkah hih â sîr zoiin chu an suak tâk a. A thu sîr chu amahih a nit, “Rithla Rithiangin Zânthla Isaia bâia nin chibulhei ziangah a lei îsîr khah a îdik a nit:

²⁶“‘Hi mihei ziangah hin fen la va sîr roh: Ringai ringai nin ta chu rethiam no tin u. En en nin ta chu mu no tin u.

²⁷Hi mihei lungril hih a cho a, An ikuar an hîp insêt a, An mit an isîng khap a. Ni no sela chu an mitin mûng a ta, An ikuarin riang a ta, An lungrilin rethiam a ta, Ki ziang tiang hong kîr nôk an ta, Anmani lei indam ki ti, Pathianin a ti,’ ai ti kha,” a ti a.

²⁸Khanchu, Paulan a ṭong mongnan, “Pathian saninringna thu hih Jentailhei ziangah ipe a nit tâk iti reh rei, anmani khan chu ringai khom ringai an ti,” a ti a.

²⁹Hi thu hih a ti zoiin chu Judahei khah iṭha takka risêl pumin an ṭîn indar tâk a.

³⁰Kum inika sung Paula kha ama inlua-ah khan a om a, a zianga hong ilêng murdi a lei lôm ngai a.

³¹Pathian Ram thurchi â sîr a, Pumapa Jisua Krista thu ihâi takkan mi ân risei a, tutên an ikhap ino a nit.