Read Biete TIRTÔNHEI SINTHO 3 Bible Online

TIRTÔNHEI SINTHO 3 - Biete bible

TIRTÔNHEI SINTHO 3

¹Nikhuakah chu kholoi fasukrup, [8] ṭongṭai ngai zoroah khan Petera neh Johana khah Tempilah an fe a.

²Khante, ipa khatkah, a suak ata kebâi hi an hong rizôn a. Tempila fehei zianga kut lei ido rangin Tempil kotbâi, “Kot Enhoi,” an iti bulah khan nîn tin an inzâl ngai a.

³Kha mi khan Petera neh Johana Tempila lût rang khah a mu a, a kut a lei do a.

⁴Anni khan ani khah an en ngit a, Petera khan a ziangah, “Keimani ne hang en ta,” a ti a.

⁵Khanchu, ani khan an zianga îtika dong ranga tûngin a hang en a.

⁶Khannisela, Petera khan, “Tangka neh rângkachak îte nei mang e; nikhomsela, ki neisun nang pêng ki ti, Nazaret Jisua Krista rimingin ken lôn ta roh,” a ti a.

⁷Khanungchu, a kut changtiang â tûk a, a kâiithoi tâk a. Voikarengin a kehei neh a keârtui ruhei khah a hong rât zel tâk a.

⁸Khanchu, ani khah artôp a, a ken â ding a, ilôn a phut zel tâk a. Kea lôna ritôp pumin neh Pathian inpâk thiai pumin Tempilah khan anmani lômin a lût sa tâk a.

⁹Mipui murdi khan kea ai lôn tâk neh Pathian a înpâk khah an mu a;

¹⁰Tempil kotbâi, Kot Enhoi bula kut idoa ṭhung ngai khah a nit iti an riat a, a chunga thil itlung khah arkhêl an ti tak tak a, an ilung a zîng khap a.

¹¹Khante, ani khan Petera neh Johana khah a la tûk mai lâiin, mipuihei kha Solomona Thapuk an iti-ah khan an ziangah an hong itlân zit a, arkhêl an ti tak tak a.

¹²Peteran amakhah a mun mipuihei ziangah khan, “Nangni Israelhei o, ithôm amahih arkhêl nin itia nin ne ien ngit hi? Hi mi hih keimani sinthotheina manih, kin ṭhat bîk sik manih sika kin înlôn nin isôn mani?

¹³Abrahama Pathian, Isaka Pathian, Jakoba Pathian, ei chibulhei Pathian khan â Som Jisua khah ai chôiinrisâng tâk a nit hi. Ani khah nin inman a, Pilatan isua a tum khomin a makungah nin lei inôl a nit.

¹⁴Ani khah mi rithiang neh mi fel tak a nit a; nikhomsela, nin nel a, mi thattu khah nangni sua pêk rangin nin ngên tâk a.

¹⁵Ringna petu khah nin that a; nikhomsela, Pathianin ani khah thina rithokin a kâiithoi nôk tâk a; keimani hih kha thu repuituhei kin nit.

¹⁶Arming sinthotheina khah hi kebâipa damna pe a nit. Nin imu neh nin iriat hih arming iamna sika isin a nit; nin rêngka nin imu angkan Jisua iam sika a hong idam vang tâk a nit hi.

¹⁷“Atûnah hin suapuihei, nangmani neh nin ulianhei khomin Jisua chunga nin itho khah nin inmôl sika a nit iti ki riat.

¹⁸Pathianin zânthla murdi bâia Krista tuang rang thu a lei înpuang kha hingka hin a îthlun tâk a nit.

¹⁹Khasikin, nin sualhei rilet unla, Pathian tiang ngat nôk ta rei; khanchu, nin sualhei nangni zâ a ti.

²⁰Khangkan, Pumapa ziang ata hartharna zoro la zuang tlung a ta, nin ta ranga a inkung Mesia, Jisua kha zuk tir a ti.

²¹Nikhomsela, tinrêng siaminthar zoro a tlung mâkah chu rivânah la om a ti; siamtharna thu chu Pathianin a zânthla rithianghei bâia tianlâia a lei înpuang thlâm tâk a nit.

²²Mosia ngêiin, ‘Pumapa, nin Pathianin keimah a ne itir angkah hin nin suapuihei lâia mi, zânthla khatkah nangni zuk tir pêk a ti; nin zianga a îsîr murdi nin zôm rang a nit.

²³Mi tukhom kha zânthla thu zôm ino kangân chu Pathian mihei lâia ta ûmisuan that inrimang rang a nit,’ ai ti kha.

²⁴Samuela neh â nunga zânthla murdihei khan atûnlâi thurchi hih an lei îsîr inpuang ngai chu a nit.

²⁵Pathianin a zânthlahei imanga ṭong a lei înkung khah nangmani ta rang a nit a, nin chibulhei zianga thuthlung khom khah nin idong tâk a nit. Pathianin Abrahama ziangah, ‘Nangma richiheiah khan rammuala mi murdi ṭhatvurna dong an ti,’ a lei iti khah.

²⁶Khasikin, Pathianin â Som khah ân kung a, nin sualhei nung nangni insonga ṭhat nangni vur rangin nin ziangah a zuang itir bak a nit hih,” a ti a.