Read Biete TIRTÔNHEI SINTHO 4 Bible Online

TIRTÔNHEI SINTHO 4 - Biete bible

TIRTÔNHEI SINTHO 4

¹Khante, Petera neh Johanan mipuihei zianga thu an la sîr mai lâiin, thiampuhei, Tempil vêngtuhei iruitu neh Sadukaihei khah an ziangah an hong a.

²Jisua thoinôkna thu sîrin mithi thoinôkna thu mipuihei an inrisei sikah khan an ning a thik tak tak a.

³Khanchu, an man a, kholoi a nit tâk sikin atûk idênin tâng inah an khum tâk a.

⁴Nikhomsela, an thu sîr ringaituhei lâia mi itam takkah khan an iam tâk a, an rêngkan chu mi sângringakah vêl an hong kâi tâk a.

⁵Atûkah chu Juda ruaituhei, upahei, Dân inriseituhei khah Jerusalemah an ribûm a.

⁶Amakhan Thiampu Laltak Anna hei, Kaiafa hei, Johana[9] hei, Alekzandara hei, Thiampu Laltak richihei khom an iom sa a nit.

⁷Petera neh Johana khah an makungah an inngîr a, “Ingkana nin îndam thei im ai nit, tu rimingin im hi thil hih nin itho?” itin an ridon a.

⁸Khanchu, Petera khah Rithla Rithiangin a sip a, an ziangah, “Mipui ruaituhei neh upahei,

⁹vuanah hin kebâipa chunga sin iṭha sin thu neh a hong dam tâk tlia thu nin ne irdon a nitin chu,

¹⁰nin rêngkan reh unla, Israel mi murdi khomin reh riseh; Nazaret Jisua Krista krosa nin ihêmde, Pathianin thina rithoka ai kâiithoi nôk tâka rimingin hi kebâipa hih indam a nit a; atûnah hin nin makungah idam vangkan a îding tâk a nit hih.

¹¹Jisua hih a nit Pathian Thubûn, “‘Nangmani in isintuhein nin îdit ino lung khah, â kila lung kâmiomtak a hong nit tâk,’ ai ti kha.

¹²Saninringna hih Jisua ziang bangah ai om a nit, rivân nuaia miriam riming isak lâiah ne saninring thei riming dang rêng rêng omak e,” a ti a.

¹³Khante, Petera neh Johana ngamzia khah an mu a, lekha thiam ino neh mi inmôl an nit iti an riatin, arkhêl an ti a; khanchu, Jisua zianga lei iom ngai an nit iti an riat tâk a.

¹⁴Mi an îndam, Petera neh Johana kôla ngîr khah an mu sikin îte sêlna rang nei mak a.

¹⁵Khanchu, Sanhedrin ata an infe tâk a; an infe nungin an khâtin an risôn a,

¹⁶“Hi mihei hih ingkan im ei tho rang tâk? Sinrikhêl inthangtak an tho iti Jerusalema mi murdîn an riat tâk a; eini khomin ei isêl thei ino a nit hih.

¹⁷Khannisela, hi thu hih mipui lâiah arzôt khâi nona rang neh hi mihei hin tute ziangah Jisua riminga thu an isîr khâi nona rangin riningna ṭong lei peh rei u,” an ti a.

¹⁸Khanchu, Petera neh Johana khah an koi nôk a, Jisua riminga thu sîr tlak khâi loi rang neh mi inrisei tlak khâi loi rangin thu an pêk a.

¹⁹Nikhomsela, Petera neh Johana khan an ziangah, “Pathian mitmuah Pathian thu zôm nêkan miriam thu zôm khah a îdik ual rang mani, ngaitua ta u.

²⁰Keini chu thil kin imu neh kin iriat hih isîr loiin om thei mang ung e,” an ti a.

²¹Khanchu, roirêltuhei khan an iṭhi nôk ual a, an isua tâk a. An sintho sika mi murdîn Pathian an inpâk tâk sikin anni khah kuttum itho thei ni mak iti an mu a.

²²Sinrikhêla an indampu khah kum sômilika nêka ûnlian tâk a nit.

²³Khante, Petera neh Johana khah an suak kaneh anmani lômhei lâiah an kîr nôk a; thiampu lalhei neh upahein an zianga an itihei khah an iril a.

²⁴Iamtuhei khan an riatin chu an rêngkan Pathian ziangah an ṭongṭai a: “O Rêngpa, nangmah, rivân hei, rinêng hei, tuikhanglian hei neh a sunga om murdi isiamtu;

²⁵Nangman Rithla Rithiangin, kin chibul ne som Davida bâiah hi thu hih ne sîr a: “‘Jentailhei ithôm an ning ai thik? Mipuihein ithôm thil chanlamboi an ingaitua?

²⁶Rammual rênghei an rifo tâk a, Roirêltuhei khom an ribûm tak a, Pumapa neh a riak inrithu-a doi rangin,’ itin.

²⁷Khangkah takah khan hi khuaah hin ne som rithiang, ni riak inrithu, Jisua doiin Heroda neh Pontia Pilata hei chu Jentailhei neh Judahei an irbûm tâk a nit.

²⁸Nangman ni înkung thlâm angkana ithlun nî tum kha intlung rangin an irbûm a nit.

²⁹Pumapa ringai ta, atûna an ne ṭhizia hih, ni thu ril ngam rangin ni suakhei hih ihâina ne peh roh.

³⁰Mihei indamna rangin ni kut phar inla; ne som rithiang Jisua rimingin thilrikhêlhei neh sinrikhêlhei itho thei rangin ne phal roh,” an ti a.

³¹Khante, an ṭongṭai zoiin chu an ribûma in khah a hong inîng a, an rêngkan Rithla Rithiangin an sip a, ihâi takkan Pathian thu sîr an phut tâk a.

³²Iamtuhei khah ngaituana munkah neh lungril khatka riputin an om a; anni lâia khatkah khomin an thil nei khah, “Ki ta bîk a nit,” ti loiin, thil tinrêng an itlâng ngai a.

³³Tirtônhei khan sinthotheina liantak ineiin Pumapa Jisua thoinôk thu an inpuang ngai a, an rêngka chungah Pathianin ṭhatvurna roinpui a vur a.

³⁴An lâiah tute khom risamin omak a; in neh loi ineihein an zuar a, a manhei khah an hong chôi a,

³⁵tirtônhei kutah an lan a, kha sum khah an inkhôk lam angkah sengin an rêngka ziangah an sem ngai a.

³⁶Khanchu, Josefa, tirtônhein Barnaba an iti (amakhah “Thlangamna nai” itina a nit), Levia chi, Kupra tuihuala mi khom khan,

³⁷ram a nei a, amakhah a zuar a, a man khah a hong chôi a, tirtônhei kutah a lan tâk a.