Read Biete TIRTÔNHEI SINTHO 7 Bible Online

TIRTÔNHEI SINTHO 7 - Biete bible

TIRTÔNHEI SINTHO 7

¹Thiampu Laltak khan, “Hi thu hih â dik im?” itin Stefana ardon a.

²Stefana khan, “Ki suapuihei neh ki puhei, ringai ta u, ei chibul Abrahama kha Haran khuaah a om maa, Mesopotamia ramah a om lâiah khan, Roinpuina Pathian a ziangah ân lâr a,

³A ziangah, ‘Ni suapuihei neh ni ram hi man la, ram nang ki la înmu rang tiang fe roh,’ a ti pêk a.

⁴Khanchu, Kaldai ram khah a mâk a, Haranah ommun a va khuar tâk a. A pa thi nungin khantaka rithokin atûna nin omna ramah hin Pathianin a înrithon tâk a nit.

⁵Pathian khan ram ilua rang kepha tiakah khom peh mak a; nikhomsela, amah neh archihei ziangah hi ram hih ipe ân kung a. Pathianin kha ṭong ân kung lâiah khan Abrahama khan nai a lai nei ino a nit.

⁶Pathianin hingka hin a îril a nit, ‘Ni chihei chu mi ramah la om an ta, kum rizalikah mi suak ichangin nuamlona tuangin om an ti.

⁷Khanniseh, suaka siam namhei kha chu keimah ngêiin la rêl ki ta, kha rizoiin chu hong suak an ta, hi munah hin ki sin la thông an ti,’ a ti a.

⁸Khanchu, Pathianin Abrahama ziangah sertan thu kha a thlung tâk a. Khasikah khan Abrahaman naiipa Isaka a nei tenan chu, a sûn iriatnî-ah khan â ser a tan pêk a. Isaka khan a nai Jakoba khah a tan pêk a, Jakoba khan a nai sômleiinikah, ei chibulhei kha ai tan pêk nôk a nit.

⁹“Khante, Jakoba naihei khan an urênga Josefa khah an narsa a, Aigupta rama suak ichang rangin an zuar a; nikhomsela, Pathian a ziangah a om a,

¹⁰dengthei a tuangna murdi ata a sanisua mai a. Aigupta rama rêng Faroa makungah â ding lâi khomin Pathianin ditsakna neh vârna a pêk a; Faroa khan Aigupta ram chungah neh a insungkua chunga ruaitun a siam tâk a.

¹¹Khante, Aigupta neh Kanan ram pumpuiah ṭâmpui a tlâk a, dengtheina rikhêl tak a tlung tâk a; ei chibulhei khan ifah rang rêng rêng nei khâi mak a.

¹²Khannisela, Jakoban Aiguptaah bu a om iti a riatin chu, a nai, ei chibulhei khah a tir a; amakhah an fe phutna tak a nit.

¹³An fe voi niknaah khan Josefan a urênghei neh ririatna a siam a; Faroa khomin Josefa urênghei a riat tâk a.

¹⁴Khanchu, Josefa khan a pa Jakoba neh a urênghei murdi Aiguptaa om rangin ân koi a, an rêngkan mi sômsarikah ringakah an nit.

¹⁵Jakoba khah Aigupta ramah a fe a, kha ramah khan amah neh a naihei chu an thi a.

¹⁶An ruak kha Sekem khua dênin an hong rizôn a, Abrahaman Sekem khuaa Hamora naihei zianga ithlân a irchôkah khan an phûm tâk a.

¹⁷“Abrahama zianga Pathian ṭonginkung kha a hong tlung zoro a nâi tenan chu ei mihei khah Aiguptaah khan an pung ok tâk a, an itam tak tak tâk a nit.

¹⁸Nungah chu Aigupta ramah khan rêng dang, Josefa ria no a hong inlal tâk a.

¹⁹Kha mi khan ei richihei khah vârrilet takkan an chungah sin a tho a, a nuam a lo a, an naitesenhei ring nona rangin ân paiisua ngai a.

²⁰Kha lâi takah khan Mosia a zuang inzir a, a mêl a ṭhat tak tak a. Anmani insungah thla thumkah an enkol a.

²¹An in ata putiang an sia nungah khan Faroa nainu khan a lâk a, ama nai inchang rangin a enkol tâk a.

²²Mosia khah Aigupta ram vârna tinrêng an inrisei a; khanchu, ṭongah neh sinthoah mi roinpui tak a hong nit tâk a.

²³“Mosia khah kum sômilikah a nitin chu a suapui Israel naihei zu pan a tum a.

²⁴Khante, a va thlo lâi takah khan anni lâia mi khatkah kha Aigupta mîn deng ân thei lâi a mu a; khanchu, a san a, a phuba a lâk pêk a, Aigupta mi khah a that tâk a.

²⁵Mosia khan ama mangin Pathianin a mihei inzôk a ti iti a suapuihein an iriat manih a sôn a; khannisela, an iriat ino a nit.

²⁶Atûkah chu anni lâia mi inikah an risual lâi a hong mu a, an ziangah, ‘Suapuihei, ringai ta u, namkah kêng nin init, ithôm hingkana nin irsual?’ itin inringei a tum a.

²⁷Khannisela, a malpa chunga kut tlâk masatu khan Mosia khah a nam a, ‘Kin chungah roirêltu neh ruaitun tûm nang isiam?

²⁸Mizâna Aigupta mi nî that angkah khan ne that nî tum na?’ a ti a.

²⁹Kha ṭong khah Mosian a riatin chu Aigupta rama rithokin Midian ramah a rot a, amakhan a om mai tâk a, naiipa inika a nei a.

³⁰“Khante, kum sômilikah a vun nungin Sinai tlâng ramchârah, sûlribuka meichok kârah Vântirtôn khatkah a ziangah a zuang inlâr a.

³¹Mosian a thil mu khah arkhêl a ti tak tak a; ienfia tumin a va nâi a. Khanchu, Pumapa rôl a riat a,

³²‘Keimah hih ni chibulhei Pathian, Abrahama Pathian, Isaka Pathian, Jakoba Pathian chu ki nit,’ a lei ti a. Khanchu, Mosia khah iṭin ân thing a, enfia ngam khâi mak a.

³³Pumapa khan a ziangah, ‘Ni pheikok kha khek roh, ni ngîrna khah mun rithiang a nit.

³⁴Aigupta rama ki mi omhei dengthei tuang tlia ki mu mai a, an irung khom ki riat mai a, anmani inzôk rangin kî zuang tâk a nit. Hong roh, Aigupta ramah nang kî tir rang a nit,’ a ti a.

³⁵“Kha Mosia, ‘Ruaitu neh roirêltu rangin tûm nang isiam?’ itia an inôl ngêi khah Pathianin ruaitu neh saninzôktu rangin sûlribuka a zianga inlâr vântirtôn imangin ai tir tâk a nit.

³⁶Ani khan anni khah a ṭhui isua a, Aigupta ram heiah, Tuipui Sen heiah, ramchâr heiah kum sômilika sungin sinrikhêl neh thilrikhêlhei isinin â ruai a.

³⁷“Kha Mosia khah Israel naihei zianga ‘Pathianin keimah a ne itir angkah hin nin mihei lâia mi zânthla nangni la tir pêk a ti,’ ititu kha a nit.

³⁸Ani khah ramchâra Israel mi ribûmhei lâia om a, ei chibulhei ziangah khom iom a, Sinai tlânga ama sôntu vântirtôn ziangah khom iom a, eimani dêna ne peh ranga Pathian thu ring ilatu kha a nit.

³⁹“Khannisela, ei chibulhei khan a thu zôm nuam mak a, an nôl a, Aigupta ram tianga kîr nôk an nuam a.

⁴⁰Arona ziangah, ‘Kin maruaitu rangin pathianhei ne siam pêk roh, Mosia, Aigupta ram ata ne ṭhui isuatu lak hi ingkan im ai om tâk a thurchi reh khâi mang ung a,’ an ti a.

⁴¹Khanungchu, khahei khan serâtchalte rilim an siam a, kha rilim ziangah khan ribôlna an lan a, anmani kutsuak khah an râi an infânpui tâk a.

⁴²Khanchu, Pathianin nung a song a, rivâna ârsihei chubai an ûn theina rangin anmani a mâkrak tâk a; Zânthla Lekhabua: “‘Israel mihei o, kum sômilika sungin ramchârah khan, Ribôlna sa thatin nin ne lan ngai im a?

⁴³Moleka puan in nin rizôn a, Nin pathian Refana ârsi rilimhei nin siam a; Kha rilimhei khah chubai nin ûn a. Khasikin, Babilon khêl tiang nangni ṭhui inrimang ki ti,’ iti riziak angkah khan.

⁴⁴“Ei chibulhei khan ramchârah khan ei Pathian omna puan in an nei a; kha in khah Pathianin Mosia ziangah isin ranga â ril lâia arlim ân mu lam angkah taka sin a nit.

⁴⁵Kha ngir khah ei chibulhei khomin an nei mai a, Pathianin ei chibulhei matona ai ûmisua namhei ram an lua lâiah khan Josua lût zoron Kanan ram khah an lûtpui a; Davida hong om idênah khan a om mai tâk a.

⁴⁶Davida khan Pathian ditsakna a dong a, Jakoba Pathian ta ranga in isin pêk rangin a ngên a.

⁴⁷Nikhomsela, in kha chu Solomona khan a sin pêk tâk a.

⁴⁸“Khannisela, Chungnungtakah chu kuta sin inheiah om ngai mak; zânthla khan:

⁴⁹“Pumapan, ‘Rivân ki ṭhungmun a nit a, Rinêng ki ke ringatna a nit. Ingkana in im ni ne sin pêk rang? Takâm ker ngamna rang mun khom ai om?

⁵⁰Hi thil tinrênghei hih ki kuta kî siam ni mak im a?’ a ti, itia a irziak angkah khan.

⁵¹“Mi pualoi, lungril neh ikuar sertan inohei; nin chibulhei tho ngai lam angkan nangni khomin Rithla Rithiang hih nin ikal mai ngai a.

⁵²Nin chibulhein zânthlahei lâiah tûm an nuam an ilo no? Mi fel tak izuang ranga thu irillôktu Pathian tirtônhei khah an that a, atûn nangmani hih, kha mi fel tak inmantu neh â thattuhei chu nin nit.

⁵³Nangmani hih Pathian dân, Vântirtônhei zuang ithak idongtu nin nit a; nikhomsela, â zôm nuam inohei nin nit,” a ti a.

⁵⁴Roirêltuhei khan Stefana ṭong khah an riatin chu an zâl an inthak a, a chungah an rikam an irôt a.

⁵⁵Nikhomsela, Stefana khah Rithla Rithianga sip a nit a, rivân tiang a en ngit a, Pathian roinpuina neh Pathian changtianga Jisua ding a mu a.

⁵⁶“En ta u, rivân ri-ong ki mu a, Pathian changtianga Miriam Naipa ding khom ki mu,” a ti a.

⁵⁷Khante, roirêltuhei khah iring takkan an ikhêk a, an ikuar an hip a. Khanchu, voikarengin Stefana tiang an itlân a,

⁵⁸khua ata khah an ûmisua a, lungin an dêng tâk a. Riatpuituhei khan an puanhei khah tlangvâl khatkah, Saula an iti ziangah khan an mâk a.

⁵⁹Lungin an deng rui rui lâiin Stefanan Pumapa â sam a, “Pumapa Jisua, ker thla lah ta roh,” a ti a.

⁶⁰Arkhûk a dil a, rôl iring takkan â khêk a, “Pumapa, hi an sual sin hih reh pêk mai no roh,” a ti a. Kha ṭong khah a ti zoiin chu a in tâk a.