Read Biete TIRTÔNHEI SINTHO 8 Bible Online

TIRTÔNHEI SINTHO 8 - Biete bible

TIRTÔNHEI SINTHO 8

¹Saula khom khan Stefana an ithat khah a îhampui a nit. Kha nikhuaa rithokin chu Jerusalema koindang khah natinsat takka nuamlona an tuang zel tâk a. Tirtônhei ti no chu iamtuhei khah Judai neh Samari ram kho tinah an rithekindar chit tâk a.

²Khante, Pathiana ripeh mi ṭhenkahein Stefanah khah an phûm a, iṭha takkah rengin an ṭâ a.

³Nikhomsela, Saula khan chu koindang inboi a tum a, in tinah a lût a, a nupang a pan a nûk isua a, tâng inheiah a khum a.

⁴Khante, iamtu kho tina rithekhei khah mun tinah an fe a, Thurchi Ṭha an isîr thiai a.

⁵Filipa khah Samari khopuiah a fe a, an ziangah Mesia thurchi â sîr a.

⁶Mipuihei khan a thu sîr khah an riat a, a sinrikhêl sinhei an mun chu a thusîrhei khah iṭha takkah rengin an ikuar an sung a.

⁷Ramrilihei khah iring takka khêkin mi itam takka sunga rithokin an hong suak a, izenghei neh kebâihei itam takkah khom an hong dam tâk a.

⁸Khasikin, kha khua khah an lôm tak tak tâk a.

⁹Kha khuaah khan mi khatkah, arming Simona an iti, dôiithiam a om a. Mi roinpui tak arti ngai a, Samari mihei khah a dôi imangin ringai rikhêl tak takkan a lei siam tâk ngai a.

¹⁰Khasikin, mi murdîn, â chîn taka rithoka â liantak idênin a ṭong an ringai ngai a, “Hi mi hih Pathian sinthotheina, ‘Sinthotheina Roinpui’ an iti khah a nit hi,” an ti a.

¹¹A dôi imangin an ringai a lei inrikhêl pêk tak tak ngai sikin a ṭong an irngai ngai a nit.

¹²Khannisela, Pathian Ram Thurchi Ṭha neh Jisua Krista riming Filipa îsîr khah an iam tâk sikin, a nupang a pan baptisma an chang tâk a.

¹³Simona ngêi khomin a iam sa tâk a; baptisma a chang zoi ata chu Filipa ziangah a om mai a, thilrikhêl neh sinrikhêl ai sinhei khah a mu a, arkhêl a ti tak tak ngai a.

¹⁴Jerusalema tirtôn iomhei khan Samari khuaa mihein Pathian thu an iam tâk iti an riatin chu an ziangah Petera neh Johana an tir a.

¹⁵Anni khah an tlungin chu iamtuhein Rithla Rithiang an dong theina rangin an ṭongṭai pêk a.

¹⁶An lâia tutên Rithla Rithiang kha la dong mak a, Pumapa Jisua riminga baptisma an ichang bang khah a la nit.

¹⁷Khanchu, Petera neh Johana khan an lu chungah kut an ringat a, Rithla Rithiang an dong tâk a.

¹⁸Tirtônhei kut ringat sika Rithla Rithiang ipe a nit iti Simona khan a mu a.

¹⁹Khanchu, Petera neh Johana khah sum ipe a tum a, an ziangah, “Hi sinthotheina hih kei khom ne peh sa rei, tu chungah khom ki kut ker ngatna kipah Rithla Rithiang an dong theina rangin,” a ti a.

²⁰Khannisela, Peteran a ziangah, “Nangmah neh ni sum hih rimang riseh, Pathian thiltlongpêk suma richo ni tum sikin.

²¹Ni lungril riput dân Pathian mitmuah a fel no sikin hi sinah hin ṭangna neh rangtum nî nei ino a nit.

²²Nikhomsela, ni sual hih rilet inla, Pumapa ziangah ṭongṭai inla, ni ngaituana sual hih nang a la zâ duai khom a nit thei.

²³Rizukna lungril iseh tak ner put a, sualin nang a khuap khap iti kî mu a nit,” a ti a.

²⁴Khante, Simona khan Petera neh Johana ziangah, “Nin thil tihei hih khatkah khom ki chungah a tlung nona rangin nangmanin Pumapa ziangah ne ṭongṭai pêk rei,” a ti a.

²⁵Khanchu, Petera neh Johana khan anmani thurchi neh Pumapa thu an isîr zoiin chu Jerusalemah an kîr nôk tâk a. An fe malamah khan Samari rama khua tam takkahei ziangah Thurchi Ṭha an isîr thiai a.

²⁶Pumapa itir vântirtôn khan Filipa â sôn a, “Risiam inla, Jerusalema rithoka Gaza khua zu sun, sim tiang ramchâr pâlna lampuiah khan[12] fe roh,” a ti a. (Atûnah hin chu hi lampui hih imang ni khâi mak e.)

²⁷Khanchu, arsiam a, a fe tâk a. Khante, Ethiopia thâinuzel khatkah, Ethiopia rêngnu Kandaki nuaia milian, archon murdi enkoltu kha Jerusalemah Pathian isôn rangin a hang fe a.

²⁸A kîr nôk tiangah khan a tâli chunga ṭhung pumin zânthla Isaia lekhabu a tep a.

²⁹Khanchu, Rithla Rithiangin Filipa ziangah, “Fen la; tâli so va nâi roh,” a ti a.

³⁰Khanchu, Filipa khah a va tlân a, thâinuzelin zânthla Isaia lekhabu ai tep khah a riat a, “Nî tep khah a omzia ni riat thei im?” itin ardon a.

³¹Ani khan, “Tutên ne rilfia pêk loiin ingkam ki riat thei ranga?” a ti a. Khanchu, Filipa khah a kôla hang iṭhung rangin a fial a.

³²Pathian Thubu ai tep khah amahih a nit: “Bera ithat rang angkan ani khah an ṭhui a, Berate a mul imêttu maah ai dâirek angkan, Ani khomin a bâi âng mak.

³³Mualphoi isak a nit a, dikino takka rêl pêk a nit; Archihei thurchi tu ngânin im ril tâng a ta? Rammuala rithokin a ringna ilah pêk a nit tâk a,” iti hi.

³⁴Khante, thâinuzel khan Filipa ziangah, “Zânthla hin tu thurchi tak îm a îsîr? Ama thurchîm mi dang thurchîm? Ne ril ta,” a ti a.

³⁵Khanchu, Filipa khan hi Pathian Thubu-a phutin Jisua Krista Thurchi Ṭha â ril tâk a.

³⁶Khangkana an fe mai lâiah khan tui omna an tlung a, mi lianah khan, “En ta, hin tui a om a, baptisma ki changna rangin im ne khap a om a?” a ti a.

³⁷Filipa khan, “Ni lungril murdin ni iamin chu ni chang thei,” a ti pêk a. Ani khan, “Ki iam, Jisua Krista chu Pathian Naipa a nit iti ki iam,” a ti a.

³⁸Khanchu, tâli khah ân ringam a, Filipa neh mi lianah khah an ruaikan tuiah khan an zu fe a; Filipa khan a baptis tâk a.

³⁹Tui ata an hong suakin chu Pumapa Rithla khan Filipa khah a lâk inrimang tâk a. Mi lianah khan mu khâi mak a; nikhomsela, ilôm takkan a fe mai tâk a.

⁴⁰Filipa chu Azota khuaah mîn an lei mu a; khanchu, Kaisari khua a tlung mâkah chu kho tinah a fe a, Thurchi Ṭha â sîr thiai a.