Read Biete ROM 1 Bible Online

ROM 1 - Biete bible

ROM 1

¹Paula, Jisua Krista suak, tirtôn inih ranga koi, Pathian Thurchi Ṭha sîr ranga inranah khan:

²Kha Thurchi Ṭha khah tian ata a zânthlahei imangin a Lekha Rithiangah a lei inkung tâk a.

³A Naipa, ei Pumapa Jisua Krista thu khah taksa tiang chu Davida richia inzir a nit a,

⁴rithiangna rithla tiangah khan chu mithi lâia rithoka roinpui taka kâiithoi a nitna khan Pathian Naipa a nitzia ifel takkan a înlang a nit.

⁵Amah sikah khan Pathianin nam tin lâia mihei in-iam rang neh izôm rangin tirtôn nitna rangtum a ne ilan a nit.

⁶Nangni khom khangkana Krista mihei inih ranga koi nin nit.

⁷Pathianin lung ai thlung a, a mi rithiang inih ranga ai koi Rom.khuaa mihei ziangah ki irziak a nit. Pathian ei Pa neh Pumapa Jisua Krista ziang ata lungkhamna neh ringeina nin ziangah om riseh.

⁸Nin iamna thu rammual pumpuiah ân thang tâk sikin Krista zârah nangmani sikin ki Pathian ziangah lômthu ki îsîr masa a nit.

⁹Ki ṭongṭainaheiah khan nangni ki riat mai ngai iti, a Naipa Thurchi Ṭha isîra ki lungril murdia a sin kî tho ngai Pathian kha ne repuitu a nit.

¹⁰A lungdo a nitin chu atûna ṭum ilua nangni ki hong ithlo ngêt theina rangin Pathian ziangah kî ngên ngai a nit.

¹¹Nin rât nôk ualna ranga rithla tiang thilpêk nangni indong rangin nangni mu kî nuam tak tak a nit.

¹²Amakhah keimah neh nangmani hi iamnaa ei rifâ risak a, ei risan risak theina rangin kî ti a nit.

¹³Suapuihei, nangni hong ithlo ki tum mai ngai a; khanniseh, rifûk nona a om nôk zel ngai iti nin riat kî nuam a nit. Jentail danghei lâia iamtu thar kî mu ngai angkan nin lâiah khom imu rangin ki tûng.

¹⁴Mi murdi ziangah lâkai kî nei a nit, Grik mihei neh môlmahei, mi vârhei neh intlohei ziangah kî nei a nit.

¹⁵Khasikin, nangni Rom.khuaa omhei ziangah khom Thurchi Ṭha sîr hih ki irzuk tak tak a nit.

¹⁶Thurchi Ṭha hih izakpui mang a, tukhom â iam murdi saninringna ranga Pathian sinthotheina a nit; a phutah Judahei ta rangin, khanung Grikhei ta rang khomin a hong nit.

¹⁷Amahin iamna sik ringota Pathianin mi thiam ân chang dân a zuang îlang a nit, Pathian Thubu-a, “Iamna sika mi fel chu ring a ti,” [1] iti riziak angkah khan.

¹⁸Rivâna rithokin Pathian ningthikna khah an sualna murdi neh felnona murdi sika thutak idan khaptuhei chungah khan a zuang îlang a nit.

¹⁹Pathian thurchi ireh thei ruahei chu miriamhei ziangah â lang mai a, amakhah Pathian ngêiin a înlang a nit.

²⁰A nitna, mita mu thei ino, a kumtluang sinthotheina neh a Pathian zia chu rammual siam phut ata a thil siamheiah ifel takka imu theiin â lang a. Khasikin, kha mihei khan riphialna rang nei tlak mak e.

²¹Pathian chu an iriat a nit; nikhomsela, Pathian a nit lam angkan chôiinrisâng mak a, a ziangah lômthu khom isîr ngai mak. Chanlamboi ringot an ngaituana a, an lungril invêt tak khah a hong zîng zoi tâk a.

²²Ivâr okkan an ribe a; nikhomseh, intlo tak an nit.

²³Fam thei ino Pathian chubai iûn nêkan â fam thei miriamhei, ivahei, sakelihei neh mîring rilimhei chubai an ûn tâk a.

²⁴Khasikin, an lungril rizuk lam thil porinchehei itho rangin Pathianin nung a songa, izakpui iom takkan an iom tâk a nit.

²⁵Pathian thutak nêkan milak an rithlang a, â siamtu chubai iûn nêkan ai siamhei khah ibian a sin an tho pêk ual tâk a. Â siamtu chu kumkhuantluangin inpâkin om riseh. Amen.

²⁶Kha sikah khan a nit, Pathianin izakpui iom takka hur iphalin nung a song tâk a; an nupanghei khomin an insiangpui nitdân khah ikhêlin dân no angkan an rimang risak a;

²⁷an ipahei khom nupang neh rimang ngaitlia imaraka hurin an rizuk risak a, ipa neh ipa khom ṭhano takkan an rimang a. Anmani taksa ngêiah an sual irâ khah an imu a nit.

²⁸Khanchu, Pathian riatna diktak khah an lungrilah inei an nuamno sikin an ngaituana seh tak angkana om rangin Pathianin nung a song a, an tho loi rua tak khom an itho tâk a nit.

²⁹Siatna tinrêngin an sip a, sualna hei, kuatinkamna hei, pualoina hei, narsana hei, rithatna hei, ringona hei, rilêmna hei neh rinelna hein an sip tâk a.

³⁰An ridem a, an risîr a, Pathian an nel a, an riloih a, an ripâk a, an risong a, thil isia thar an mu suak a, an nu neh pahei ngîk mak a,

³¹sia neh ṭha riatna nei mak a, an ṭonginkung mang ngai mak a, mi dang rangin lungkhamna rêng rêng nei ngai mak e.

³²Khangkana thotuhei kha chu Pathianin a înkung angkah ngêia ithi tlâk an nit iti ireh ṭiankan anmani itho tên tên bang khom ni loiin, mi dang a thotuhei khom an ihampui sa ngai a.