Read Biete ROM 10 Bible Online

ROM 10 - Biete bible

ROM 10

¹Suapuihei ki chipuihei chu saninringin om seh iti hi kî nuam tak neh Pathian zianga kî ngên ngai tak a nit:

²Pathian tiang ṭhatnem an ringai tak tak iti ki riat; nikhomsela, rianfel loiin ṭhatnem an irngai a nit.

³Pathianin mi thiam ân chang dân khah rethiam mak a, anmani lampui an zui ngit a, Pathianin thiam ân chang dân nuaiah khan ripeh thlep nuam mak e.

⁴Â iam murdihei thiam ichanga an om theina rangin, Krista chu Dân inmongtu a nit.

⁵Mosia khan Dân zôm sika thiam changna thu hingkan arziak, “Dân thupêk izômtu chu ring a ti,” itin.

⁶Iamna sika thiamchangna chungchâng thu chu, “Tûm rivâna lui ranga?” (Amakhah chungtiang ata tûm Krista hang iṭhui rang tina a nit) a nit nole,

⁷“Tûm rinêng rila zu fe ranga?” (Amakhah thina rithokin tûm Krista a hong iṭhui rang itina a nit), nin lungrilin ti no rei.

⁸“Thu khan nang a nâi, ni bâiah neh ni lungrilah a om,” ai ti a nit. Thu iti hih iamna thu ei îsîr hi a nit.

⁹Ni bâiin Jisua khah Pumapa a nit itin ni thlop a, thina rithokin Pathianin a kâiithoi iti ni lungrilah ni iamin chu saninringin om ni ti.

¹⁰Lungrila iam chu thiam inchang an nit a, bâia thlop chu saninringin an om ngai.

¹¹Pathian Thubûn, “Tukhom ama iam chu mualinphoi no nih,” ai ti a nit.

¹²Juda ini manih, Grik ini manih khah îte danglamna om ual mak e; Pumapa khatkah kha an rêngka Pumapa a nit a, ama rilamtuhei murdi chu ṭhat a vur tak tak ngai.

¹³Pathian Thubûn, “Tukhom Pumapa riming rilamhei murdi chu saninringin om an ti,” ai ti a nit.

¹⁴Nikhomsela, an iiam inoah khah ingkan im an rilam thei ranga? An iriat inoah khah ingkan im an iam thei ranga? Thusîr an om non teh ingkan im an riat thei ranga?

¹⁵Itir an nit non teh ingkan im thu an isîr rang? Pathian Thubu-a, “Thurchi ṭha [7] hong ithluntuhei ke chu â en a hoi vang na!” iti riziak angkah khan.

¹⁶Khannisela, Thurchi Ṭha khah an rêngkan chu iam khai mak. Isaia ngêi khomin, “Pumapa, kin thu sîr tûm â iam?” ai ti a nit.

¹⁷Khangkah khan, iamna khah thu sîr an riat sikin a hong om a, thu sîr khah Krista [8] thu hi a nit.

¹⁸Khate, thu khah an iriat ino titak mani? An riat ngêt. Pathian Thubûn, “An rôl irî khah ram tinah ân thang a, An thurchi khah kôlkomong idênin ân thang suak tâk,” ai ti angkan.

¹⁹Khante, Israelhein an iriat ino mani? Mosia zelin, “Nama tep inrup inohei khah nangni innar ki ta, Nam intlohei sikin nin ning nangni inthik pêk ki ti,” a lei iti masa a nit.

²⁰Isaia khan ihâi ualkan â sîr nôk a, “Ne zong inohei khan an ne mu a, Ner lam inohei ziangah ki înlâr a nit,” a ti a.

²¹Khanniseh, Israelhei chungchâng thu-ah khan chu, “Helâkloi neh rihel isong mihei ta rangin sûn thluanin ke bân ki phar ngai,” a ti a.