Read Biete ROM 11 Bible Online

ROM 11 - Biete bible

ROM 11

¹Khate, Pathianin a mihei khah ai pai iṭhul mani? Ni tlak mak e. Keimah reng khom Israel mi, Abrahama richi, Benjamina nam ki nit.

²Pathianin atîr ata a irthlang, a mihei khah pai iṭhul mak e. Elija thurchi Pathian Thubûn a îsîr khah nin iriat ino mani? Ani khan Israelhei chungthu Pathian ziangah â thlun a:

³“Pumapa, ni zânthlahei an that a, Ni mâichâmhei an isim a, Keimah bang kêng â om tâk, Keimah khom hi ne that an itum a nit,” itin.

⁴Khannisela, Pathianin ingkan im ai sâm kha? “Baala makunga rikhûk dil ngai ino mi sângsarikah ki ta rangin ki lai zua mai a nit,” itin ai sâm a nit kha.

⁵Atûn khom khangkah ngirah khan Pathianin a lungkhamna sika a irthlang suakhei iroichekah chu an lai om a nit.

⁶A lungkhamna sika rithlang suak an nitin chu, an sintho sik ni thei mak e. Sintho sika Pathianin a irthlang ni sela chu lungkhamna hih lungkhamna ni thei no nih.

⁷Ingkan im ai nit rang tâk? Israelhei khan an izong khah mu mak a, Pathian irthlang iroichekahei bangin an mu a, mi danghei rêng rêng chu an isêt zoi riai tâk a nit.

⁸Pathian Thubûn, “Pathianin vuansûn tenan lungril inrimubûkna rithla a pêk a, mu thei nona mit neh riat thei nona kuar neh khan,” ai ti angkah khan.

⁹Khante, Davida khan, “An ruaiṭhe khah an ta rangin châng neh bil ni sela, Ibâna neh thungna ni riseh;

¹⁰An mu thei nona rangin an mithei hong zîng sela, Puak irik ipêlin rikûl mai riseh,” a ti a.

¹¹Khate, an ibâ sikin an îlîr thal rang tâk mani? Nâi sai mâk! An ibâ sikin Jentailhei ziangah saninringna a zuang tlung a; Israelhei innarna ranga zuang itlung a nit.

¹²Khanchu, an ibâna lua rammual inrichongna a nit a, rithla tianga an losamna lua Jentailhei richongna a nitin teh, an hong rikip tenan vang chu ingkah dôra ṭhatvurnâm an init rang tâk na!

¹³Nangni Jentailhei ziangah thu ki îsîr a nit hih. Keimah hi Jentailhei ranga tirtôn kî nit angkan ki sinthona hih ki irngai inlut a nit.

¹⁴Ki chipuihei nangni ken nar a, ṭhenka lua ki saninring thei ngêtna rangin.

¹⁵Anni pai iṭhulna lua rammual ta ranga Pathian neh ringei nôkna a nitin teh, anmani ham nôkna khah thina ata ring nôkna ni no nîm a?

¹⁶Ibai imet lûm ata thliam masa tak khah Pathian ziangah ilan inrithiang a nitin chu, a lûm pum khom ilan inrithiang a nit. Khante, thing khom arzung arthiangin chu â ṭanghei khom a irthiang a nit.

¹⁷Oliv thing iṭang ṭhenkah ri-omin, nangmani ram olivhei khah oliv kungah khan izomin nin om a, rizung iṭha tak nin irzompui tâk a nit.

¹⁸Khasikin, iṭang danghei chungah risong no rei; risong man unla, arzung ifâtu ni mak chei, arzungin nangni a îfa kêng ai nit.

¹⁹Khante, nangman, “Izoma ki omna ranga iṭanghei khah ri-om kêng ai nit,” tîng ni ti.

²⁰A nit, ni tîn dik; an iamnona sikin ri-omin an om a, nang chu ni iam sikin izom ni nit. Ripâk non la, ṭi lem roh.

²¹Pathianin iṭang takhei ilua a zua non chu nang khom nang zua bîk no nih.

²²Pathian ṭhat tlia neh a ṭiom tlia hi ngaitua roh; â bâhei ta rangin iṭi a om a, a ṭhatnaah ni om maiin chu, nangma ta rangin ai ṭhat a nit; ni om mai non chu nang khom ri-om pai ni sâng ni ti.

²³Khante, anni khom iam loiin an om mai non chu izomin la om nôk an ti, Pathianin anni khah a irzom nôk thei a nit.

²⁴Nangmah Jentail, ram oliv ata ri-om pai ilua, inzir dân balam angkah ni loia oliv thing iṭhaa zomin ni omin teh, oliv dik tak iṭang khah oliv thing dika zom kha ai ol ual ok rang a nit.

²⁵Suapuihei, hi thurithup hih nin riat rangin kî nuam a nit; khanonchu, ivâr nin riti duai lôiin; Jentailhei an hong rikip mâkah chu Israel mi ṭhenkahei chungah sêtna a lai tlung bak hi a nit, iti hih.

²⁶Kha tikah khan a nit, Israel murdi saninring an init rang a nit. Pathian Thubûn, “Ziona rithokin Saninringtu khah zuang suak a ta, Jakoba richihei ziang ata Pathian lesêtna inboi a ti.

²⁷Amakhah an zianga ki thu thlung rang chu a nit, An sualhei ki lâk inrimang tikah chu,” ai ti angkah khan.

²⁸Thurchi Ṭha an nôl sikin Judahei chu Pathian irâl an nit a; nangmani dingmun ai ṭhat tâk a nit; khanniseh, Pathianin arthlang sikin richibulhei zârah a rual lungthlunghei an nit.

²⁹Pathianin ṭhat ai vur tâk neh a irthlang tâk khah ikhîr nôk thei ni khâi mak e.

³⁰Tianah chu Pathian thu ôi mak chei a, atûn chu anmanin an ôi no sikin a lungkhamna nin idong tâk a nit.

³¹Khangkah ngirin atûn nangmanin lungkhamna nin dong sikin, anni khomin lungkhamna an dong sa theina rangin atûnah [9] hin chu an lai ôi hi no a nit.

³²An rêngka chungah a lungkhamna ân lang nuam sikin Pathian khan mi murdi[10] ôi nonaah ai khum khai a nit.

³³Pathian richong tlia chu a roinpui vang na! A vârna neh a riatna khom ân thûk vang na! Tûm a roirêlnahei â rilfia thei ranga? Tûm a lampui â sui thei ranga?

³⁴Pathian Thubûn, “Tûm Pumapa lungril iria? Tûm a roiisakpuitua ṭang tâk?

³⁵A thung nôk ranga a zianga thil ipetu tûm an om ngai a?” ai ti angkah khan.

³⁶Thil tinrêng hih ama isiam a nit, ama zâr neh ama ta ranga om a nit. Pathian ziangah kumtluangin roinpuina chu om riseh; Amen.