Read Biete ROM 12 Bible Online

ROM 12 - Biete bible

ROM 12

¹Khasikin, suapuihei, Pathian lungkhamna lian sikah hin, ribôlna ring neh rithiang, Pathian iham inrup inih rangin, nin takpum khah Pathian ziangah ilan rangin nangni kî ngên a nit; amakhah nin sintho rang tak a nit.

²Hi rammual omdân angkah hin om no unla; Pathian lungdo, â ṭha neh â ham inrup neh, ṭhat rikiphei khah nin riatinfel theina rangin, nin lungril inthara omin hong danglam ta rei.

³Pathianin a ne ipêk lungkhamna sikah hin nangni kî ngên a nit; nin lâiah tute ringaiinluh rai om no rei. Pathianin mi tin zianga iamna a pêk lam angkah takin mahni ritlukpui ten lungril ripuh rei.

⁴Takpum khatkatah iṭang itam takkah ei nei a. Kha ṭanghei sintum khah a thlei chit a.

⁵Khangkah ngirin eini khom itamkah ni man eila, Kristaah chu takpum khatkah ei nit a, ei rêngkan takpum iṭang angkana arzom zit ei nit.

⁶Lungkhamna a ne pêk lam angkah takin thiltlongpêk dang dang ei idong chit a nit; thu sîr rang a nitin chu ei iamna nei angkah takin isîr eila,

⁷sin itho rang a nitin chu ei sinthonah ripeh ngit eila, minrisei rang a nitin chu inrisei ngit eila;

⁸mi thor rang a nitin chu ithor ngit ei la, thil ipetu khan iphal takkan peh sela, roirêltu khan takritâi takkan rêl sela, mi lunginkhamtu khomin ilôm takkan inkham riseh.

⁹Lungthlungna chu vârriletna ṭang iloiin ni riseh. Sual chu nel unla, â ṭha chu ipom ngit rei.

¹⁰Urêng rikan angkan rikan risak unla, ringîk risak rei.

¹¹Sinthonah lamah zâlsong unla, nin ritha inboi no rei, lungril ipeh letkan Pumapa sintho rei.

¹²Nin tûngna khan nangni inlôm sela, nuamlona nin tuang khomin idiar takkan tuang unla, tiklâi khomin ṭongṭai mai rei.

¹³Pathian mihei khah an inkhôkna irukpui unla, nin inah khualmi ithlun ngai rei.

¹⁴An nuam nangni lotuhei khah ṭhatvur unla, vâni sâm no rei.

¹⁵Ilômhei khah lômpui unla, iṭaphei khah ṭappui rei.

¹⁶Ri-ang natkan ri-en unla, ripâk no unla, mi chînhei ripôlpui rei. Ivâr risat no rei.

¹⁷Tu sual khom sual ngirin thung no unla, mi murdi ringaia ṭha khah tho lem rei.

¹⁸Ithei pai a nitin chu nangmanin chu mi tin neh ringeia lêng tum ngit rei.

¹⁹Lungthlunghei, phuba la no unla, Pathian ningthikna iken lem rei. Pathian Thubûn, “‘Phuba rêng rêng keima lâk rang a nit, keiman thung ki ti,’ Pumapan a ti,” ai ti angkah khan.

²⁰Khasikin, ne râl a von a ṭâmin chu ifah rang peh roh, a tui arhâlin chu iin rang peh roh; khangkan ni thon chu a îzak tak tak rang a nit.

²¹Sual nang înên om non la, ṭhatnan sual khah inê lem roh.