Read Biete ROM 13 Bible Online

ROM 13 - Biete bible

ROM 13

¹Mi tinin an chunga roirêltuhei thu an ôi rang a nit. Pathian iphun ni loiin tute roirêltun om ngai mak; atûn lâia roirêltuhei khom hih Pathian iphun kêng an init.

²Khasikin, tukhom roirêltu kal chu Pathian iphun a îkal a nit; â kaltu khan a chungah kuttum ithlun a ti.

³Roirêltuhei khah thil iṭha thohei ta rangin chu iṭi omak a, thil ṭhano thohei ta rangin chu iṭiom an nit. Roirêltuhei ṭi loia om ni nuam im? Thil iṭha thon la; khanchu, nang inpâk an ti.

⁴Ni ṭhatna ranga Pathian isom kêng an init. Khanniseh, thil ṭhano ni thon chu ṭi roh, khandai khah an ichôi pai ni mak e. Pathian isomhei an nit a, thil ṭhano thotuhei chunga Pathian kuttum ithluntuhei an nit.

⁵Khasikin, kuttum ṭi sik bang ni loiin, ni sia neh ṭha riatna sik khomin an thu ni ôi rang a nit.

⁶Khasikah khan kêng sia khom nin ichôi ngai; thuneituhei khan an sintum iṭha takkan an thon chu Pathian sin an itho kêng ai nit.

⁷Ipeh rang inang murdi ziangah peh rei; rinêng man ipeh rang a nit le peh unla, sia chôi rang a nit le chôi unla, iṭi rang khah ṭi unla, imarit rang khah marit rei.

⁸Lungrithlung risakna banah chu tute ziangah îte ritâng no rei; mahni miriam champui lungithlungtu khan Dân ai zôm inrikip tâk a nit.

⁹Dân thupêkhei, “Inrê no roh, mi that no roh, iruh no roh, rizuk no roh,” itihei neh thupêk dang rêng rênghei hih, “Nangmah lung ni irthlung angkan ni bungahei lungthlung roh,” iti hin a îtêl inrichin thlep a nit.

¹⁰Lungthlungnan mahni miriam champuihei iseh ngai mak e; khasikin, lungthlungna hi Dân zôm inrikipna a nit.

¹¹Atûnlâi thil omzia nin riat; â inhei ṭhanghar zoro a nit titak tâk. Atûn chu ei iam phut lâi nêkah khan chu ei saninringna khah ai nâi ual tâk a nit.

¹²Zân hih a boi lôk lôk tâk a, khua â vâr rang tâk a nit. Khasikin, izîng sinthohei khah pai ei ta, ivâr thlukin rithluk ei ti u.

¹³Sûna om angkan enihoi takkan om ei ti u, zu in ibuai neh zûnruin om loiin, ihur neh ridit isongin om loiin, risual neh rinarsan khom om loiin.

¹⁴Pumapa Jisua Kristaah khan rithluk lem unla, nin taksa lungbôk ṭhano lôntluk tum tlak no rei.