Read Biete ROM 14 Bible Online

ROM 14 - Biete bible

ROM 14

¹Khante, iamnaa rât ino mi khah, arngai dân sêl ual loiin iham rei.

²Mi khatkan thil tinrêng ifa rithiangin a iam zoi a, rât ino mi khan chu thlâi bang a fâk ngai a.

³Thil tinrêng ifah thei mi khan â fa no khah musit no riseh, â fah thei inotu khom khan â fah theitu khah sêl no riseh; Pathianin ani khah a îham ngir kêng ai nit.

⁴Mi dang isom lei isêltu khah tûm nî nit? Â ding indetin manih, â lîrin manih, kha ama pu thu thu a nit. Iding indet ngêt a ti; Pumapa khan a înding indet thei a nit.

⁵Khante, mi khatkan nikhua khatkah hi nikhua dang nêkan arngai inlut ual bîk a, mi dangin nikhua murdi ri-ang natkan arngai ngai a. Mi tinin mahni ringai dân ifel tak inei rang a nit.

⁶Nikhua khatka ser bîktu khan Pumapa chôiinrisângna rangin ai ser a nit; thil tinrêng ifatu khan, Pathian zianga lômthu sîr baka ai fâk a nit sikin Pumapa kha ai chôiinrisâng a nit. Â fa notu khom khan Pathian ziangah lômthu â sîr sa ngir sikin Pumapa chôiinrisângna rangin ai fâk ino a nit.

⁷Tute mahni ta ranga ring ni mang me a, tute mahni ta ranga thi khom ni mang meh.

⁸Ei ringin chu Pumapa ta ranga ei iring a nit a, ei thi khomin Pumapa ta ranga ei ithi a nit; khasikin, ei ring khomin, ei thi khomin Pumapa ta ei nit.

⁹Khaangkan, mi ring neh mithi Puma a nit theina rangin Krista chu a thi a, ai ring nôk tâk a nit.

¹⁰Khate, nangman îtho ranga ni suapui nî sêl im? Anitnole, nangman îtho ranga ni suapui nî musit im? Pathian roirêlna ṭhungmun makungah ei rêngkan ei la îding khai rang kêng ai nit.

¹¹Pathian Thubûn, “Pathian iring ki nit, Mi tinrêng ki makungah rikhûk la dil an ta, Ilei tinrêngin Pathian ki nit lân puang an ti, Pumapa khan a ti,” ai ti angkah khan.

¹²Khaangkan, ei rêngkan Pathian ziangah mahni thurchi ei la îsîr khai rang a nit.

¹³Khasikin, ridem risak khâi no min u, tukhomin mahni suapui ibâna manih, lunghoinona manih siam ino tum rei.

¹⁴Thil rêng rêng ama khât ringotin chu arthiang nona omak iti Pumapa Jisuaah khan kî riat infel tâk a nit; nikhomsela, rithiang inoa ringaitu ta rangin chu ama ta rangah khan a irthiang ino a nit.

¹⁵Ni thil fâk sikin ni suapui lungril nê phopin chu lungthlungna lampui nî ro khâi ino a nit. A thi sik Kristan ai thi pêka siatna rang khah ni thil fâkin ithlun no riseh.

¹⁶Khasikin, nin ta ranga ṭhatna khah isîr insian om no riseh.

¹⁷Pathian ram chu ifâk neh iin thu ni mak a, Rithla Rithiang zâra felna hei, ringeina hei, lômna hei hi a nit.

¹⁸Tukhom khangkana Krista sin ithotu chu Pathian lômrua mi a nit a, miriam inpâk khom a lo ngai.

¹⁹Khasikin, ringeina rang neh ei rifepui risakna rang thilhei khah ei rizûl ngêt rang a nit.

²⁰Ni thil fâk sikin Pathian sintho iseh no roh. Thil tinrêng ifa hih arthiang a nit; khanniseh, mi dang ibâ theina rang thil ifa chu ṭha mak e.

²¹Ni suapui ibâna rang a nitin chu sa fa hei, uain iin hei neh thil tinrêng ingei hi ai ṭhat a nit.

²²Ni iam dânah khan iam ṭian roh, Pathian neh nin kârvân thu a nit. Mahni iam dân taka sina, thiamno richang ino chu a ham a ṭhat.

²³Khanniseh, tukhomin ringla puma a fâkin chu a iam dân nino ai tho a nit sikin Pathianin thiamno a inchang a nit. Thil îkhom iamna ninoa tho chu sual a nit.