Read Biete ROM 15 Bible Online

ROM 15 - Biete bible

ROM 15

¹Eini iamna râthei hin mahni lômna rang zong loiin, rât inohei khah an rât nonaah ei ṭangpui rang a nit.

²Iamnaa ei phun indet theina rangin mahni bungahei inlômin an ta ranga thil iṭha tho tum chit ei ti u.

³Krista khomin mahni lômna zong mak e. Pathian Thubûn, “Nang iêrohei êrona khah ki chungah a ṭum tâk,” iti riziak angkan ai tuang a nit.

⁴Pathian lekha thu-a rithoka tuangdiarna neh thlangamna ei dong zâra tûngna ei nei theina rangin, Pathian Thubu-a riziak tâk rêng rêng chu eimani nen riseina ranga riziak a nit.

⁵Tuangdiarna neh thlangamna petu Pathian khan, Krista Jisua lungdo angkan lungril khatkah nangni innei sela,

⁶lungril khatkah riputa inrualin, ei Puma Jisua Krista Pa neh Pathian khah zâi inrualin inpâk thei nin ti.

⁷Pathian roinpuina rangin Krista khan nangni ai lôm angkah khan rilôm risak rei.

⁸Nangni ke ril, Pathian iamomzia inlang nan richibulhei zianga a ṭonginkung ilenin, Krista khah sertanhei sinthotun a zuang om a.

⁹Jentailhei khomin a lungkhamna sika Pathian an inpâk theina rangin, Pathian Thubûn, “Khanchu, Jentailhei lâiah nang inpâk ki ta, Ner ming inpâkin zâi ki ti,” ai ti angkah khan.

¹⁰Khabanah, hingka hin a ti sa, “Jentailhei o, Pathian mihei neh lôm rei.”

¹¹Hingka hin khom a ti: “Nangni, Jentail murdihei o, Pumapa chu inpâk rei, Ama mihei murdi khomin inpâk riseh.”

¹²Isaia khomin hingka hin a ti: “Jesaia rizung kha la hong cher a ta, Jentailhei ilal rangin la hong om a ta, Amaah khan Jentailhein an tûngna ringat an ti.”

¹³Rithla Rithiang sinthotheina zâra tûngnaa nin sip theina rangin, tûngna nâr Pathian khan, nin iam sikin lômna neh thlangamna tinrêngin nangni vur riseh.

¹⁴Ki suapuihei, nangni hih ṭhatnaa sip, vârna tinrêng inei, risei risak thei rang nin nit iti ki iam ngit;

¹⁵nikhomsela, thil ṭhenkah nangni inreh nôk rangin ki hong riziak ngir a. Jentailhei ta ranga sin itho ranga Pathianin a lungkhamna zâra Krista Jisua sinthona a ne ipêk hih isongin ihâi takkan ki irziak a nit.

¹⁶Jentailhei khah Rithla Rithianga inrithiangin, Pathian zianga iham inrup ribôlna ranga lan rangin Thurchi Ṭha sîr hih ki thiampu sin a nit.

¹⁷Krista Jisuaah khan Pathian sin kî tho hih kî song a nit.

¹⁸Jentailhei Pathian in-iam ranga thu neh sinthohei, risinsiana neh thilrikhêlhei neh Rithla Rithiang sinthotheinaheia Kristan keimah ne manga a sinthohei banah chu îte isîr ngam mang e. Jerusalema rithokin Illurikom neh a kôlvêl idênin Krista Thurchi Ṭha khah mun tinah ke sîr khai tâk a.

²⁰Mi dang lungphûm chunga sininding ki nit nona rangin, Krista an la riat nona mun ikipa Thurchi Ṭha sîr hih ki lungbôk a nit.

²¹“A thurchi la sîr ngai nonaa mihei khan mûng an ta, A la reh ngai inohei khan riang an ti,” itia a irziak angkah khan isîr kî tum a nit.

²²Kha sikah khan a nit, nin zianga hong ki îṭhûl nôk ngai a nit.

²³Atûn chu hi ram vêlah hin chu inzinna rang nei khâi mang a; kum itam takka sung nangni hong ithlo ki lei itum tâk ngai angkan,

²⁴Spain rama fe malamin nangni hong imu kî tum a nit; nangmani neh munka itôikah ei inlôm zoiin chu, ife ki tumna tianga nin ne zuang îthla kî tûng sa a nit.

²⁵Atûn takah hin chu Pathian mihei sin itho rangin Jerusalemah la fe hi ki ti.

²⁶Makedonia neh Akaia rama mihei khan iphal takkan Jerusalema Pathian mihei lâia inrianghei ta rangin tholôm an dôl a.

²⁷An ngaichama iphal takka an itho a nit; nikhomsela, an chungah ritâng an inei pial a nit. Jentailhein an rithla tiang thilhei Judahei an itlângpuiin chu, taksa tiang thilah khom Jentailhei khan Judahei an itlângpui rang pial a nit.

²⁸Khasikin, amakhah ki tho zoi a, tholôm khah an ziangah ki bâng infel zoiin chu Spain rama fe malamin nangni hong ithlo ki ti.

²⁹Nin ziangah ki hong tikah chu Krista ṭhatvurna rikip neh hong ki ti iti ki riat.

³⁰Suapuihei, ei Puma Jisua Krista neh Rithla Rithiang zâra lungrithlungnan Pathian zianga ne ṭongṭaipui tak tak rangin nangni kî ngên a nit.

³¹Judai rama iam inohei kuta rithoka ki zôk theina rang hei, ki sinthona[11] Jerusalema Pathian mihei ta ranga lôm iom a nit theina rang hei,

³²Pathianin ṭha a tin chu râiifân takka nin ziangah ki hong theia, ei har inrual theina rang hein ne ṭongṭai pêk rei.

³³Ringeina Pathian khah nin rêngka ziangah om riseh. Amen.