Read Biete ROM 2 Bible Online

ROM 2 - Biete bible

ROM 2

¹O miriam, tukhom nin la, riphialna reng nei mak cheh, mi dang thiamno inchang thei khom ni bîk mak cheh. Mi thiamno nen changna ngir khah nangmah khomin ni tho ngai a, nangmah neh nangmah thiamno ni irchang a nit.

²Khangkana tho ngai mihei khah Pathianin thiamno ân changin chu ai rêl indik a nit iti ei riat.

³O miriam, nangman nî tho ngai angkana thohei thiamno ni închang a nitin chu Pathian roirêlna kha ilôi thei rangin ni irtûng mani?

⁴Anitnole, nang inrilet a nuam sikin Pathianin khorngaina neiin nang a ngâk ngai iti reh loiin, a khorngaina neizia neh a tuang theizia neh â lungdiarzia khah ni îsit mani?

⁵Khannisela, ni tuklullian neh ne lung khir sikin Pathian ningthikna nikhua, a roirêlna fel tak zuang ilang rang nikhua rangah khan ni chungah dengtheina nî bûm kêng ai nit.

⁶Pathian khan mi tin an sintho angkah takin ai rêl pêk rang a nit.

⁷Roinpuina hei, chôiinrisângna hei neh ringna thi thei ino zonga sin iṭha sin ngêi ngêihei khah kumtluang ringna pêng a ti.

⁸Khannisela, marangṭhat bang izong a, thudik inôl a, thil dikino zômhei chungah chu Pathian ningthikna neh ningmurna zuang tlung a ti.

⁹Thil ṭhano sin murdihei chungah dengtheina neh ngaisiatna om a ti, Judahei chungah om bak a ta, khanung, Grikhei chungah om nôk a ti.

¹⁰Khannisela, sin iṭha sin murdihei ziangah chu roinpuina hei, chôiinrisângna hei neh thlangamna hei Pathianin pêng a ti; Judahei peh bak a ta, khanung, Grikhei pêng a ti.

¹¹Pathianin thleibîk ai nei ino a nit.

¹²Jentailhein Mosia Dân nei mak a; an isual khomin Dân iboiin an thi ngai a. Judahein Dan an nei a, an isual khomin Dâna rêlin an om ngai a.

¹³Dân riat sikin ni loiin â zôma zôm sikin Pathian mitmun thiam ichang thei a nit.

¹⁴Jentailhei khan Dân nei no khom sela Dânin ai tumhei kha an insiangpui lungrila om a nit sikin an sin a, Dân khah an ziangah ipe ni no man sela anmani khah Dân an nit zela, Dân inei angkah an nit.

¹⁵Dân thupêk khah an lungrilah riziak a nit iti an nunchanin ân lang a. An sia neh ṭha riatnaa an ngaituana khan a kârah thiam ân chang a, â kârah thiamno ân chang ngai dân khomah hin a îlang a nit.

¹⁶Pathianin Jisua Krista manga mi tinrêng ngaituana rithup a rêl nin chu Thurchi Ṭha ki îsîr angkah hin ai rêl rang a nit.

¹⁷Khateh, nangmah, Juda ki nit ni ti a; Dân khah ner nêl a, Pathian khah ni song a;

¹⁸Pathian lungdo khom ni riat a. Dân ni riat sikin thil iṭha khom ni riat a;

¹⁹nangmah kha mitdelhei iruaitu, izînga omhei ieltu,

²⁰intlohei invâr theitu neh naipanghei[2] inriseitu tak inih ualin ner be ngai; riatna neh thutak tinrêng chu Dânah hin a om riai iti ni iam a.

²¹Mi danghei ken risei ngai ni ti a, ithôm nangmah ner sei no? “Iru no roh,” mi ni ti a, nangman chu ni îrûk ngai na?

²²“Inrê no roh,” ni ti a, nangmah ni înrê ngai mani? Mirmil chu inel vakin mirmil biakna Tempil ni îrok ngai mani?

²³Dân khah isong ok kan, Dân ikhiakin Pathian mualphoi nî sak ngai mani?

²⁴Pathian Thubûn, “Nangmani sikin Pathian riming khah Jentailhei lâiah inpôiin ai om a nit,” itia a irziak angkah khan.

²⁵Dân zôm inla chu ni sertan khom khah rifena om tak tak a ti; Dân ne châiin chu sertan ino angkah thap ni nit.

²⁶Jentail, sertan ino khan Dân thupêkhei a zômin chu sertan angkana be ni no nîm a?

²⁷Nangmanin ser nin tan a, Dân thu riziak khom nin nei a; khanniseh, Dân thu kha chu nin ichâi a; Jentail, taksa ser tan inohei khan Dân thu khah an zôm a; khasikin, thiamno nangni an închang rang a nit.

²⁸Â lang paia Juda mi ni chu Juda tak ni mak a, taksa paia ser tan chu sertan dik ni mak e.

²⁹Nikhomsela, sungrila Juda mi ni khah Juda tak tak chu a nit a, ser tan tak tak khom lungril tianga a nit, amakhah Dân thu riziaka ni loiin, Pathian Rithla sintho a nit. Khangkana mi khah chu miriamin inpâk no khom sela, Pathianin a înpâk rang a nit.