Read Biete ROM 3 Bible Online

ROM 3 - Biete bible

ROM 3

¹Khate, Juda mi ini khah Jentail ini nêkan rifena im a om ual a? Sertan khom im rifena a om a?

²Lam tinah rifena om tak a nit. Rifena a omna tak chu Pathian thuhei inkol an nitna hi a nit.

³Mi ṭhenkahei iamom no ta sela, ingkan im ai nit rang? An iamom nona khan Pathian iamomna khah a înboi rang mani?

⁴Nâi sâi mak; mi murdi milak ni riai khom seh, Pathian chu idik mai a ti. Pathian Thubûn “Nangman ni ṭong zoron thiam ni chang a, Roiirêl pêka ni om tikin ne nê theina rangin,” iti riziak angkah khan.

⁵Khannisela, ei fel nonahei hin Pathian felna khah ân lang infel ualin teh ingkan im ei ringai rang tâk? Pathianin mi kuttum a thoah hin a thonsual ei iti rang mani? Amakhah miriam dâna ki îsîr a nit.

⁶Nâi sâi mâk, khangkan ni seh, Pathianin ingkam rammual roi a rêl thei rang?

⁷Khannisela, milak ki nitna hin Pathian roinpuina ranga Pathian idikzia ân lang infel nôk ualin te îtho rang im mi suala itep ki lai nit mai rang?

⁸Mi ṭhenkan, “‘Thil iṭha a suak theina rangin thil isia lei sin rei u,’ a ti,” itia an ne îsîrinsiat angkah khan, thil isia ei itho rang mani? Kha mihei kha chu thiamno chang rua pial an nit.

⁹Khate, eini Judahei hih ei iṭhat ual bîk mani? Nâi sâi mak, Judahei neh Grikhei khah an rêngkan sual bôia om riai an nit iti ei isîr infel tak kha:

¹⁰Pathian Thubu-a, “Tute mi fel zel omak, Khatka lua omak e;

¹¹Tute mi vâr zel omak, Tute Pathian izong reng omak.

¹²Pathian ziang ata an ivâi khai tâk a, An rêngkan an fen sual zoi tâk; Tute sin iṭha sin reng omak, Khatka lua omak e.

¹³An rôl khah ithlân ri-ong a nit a, An ileiin rilêmna thu â sîr a, An bâia rithokin irûl tûr a suak a,

¹⁴An bâi khah vâni sâmna neh ṭong ikhâa sip a nit.

¹⁵An ke khah thisen isua rangin kal a chôi inrang a;

¹⁶An fena tinah siatna neh ramna an ithlun a.

¹⁷Thlangamna lampui zel reh tlak mak a,

¹⁸Pathian ṭi nachâng khom reh tlak mak e,” itia riziak angkah khan.

¹⁹Dân thuhei chu Dân nuaia omhei chunga mang rang a nit iti ei riat; tutên îte an ti thei nona rang neh rammual pumpui hih Pathian roirêlna nuaiah a om theina rangin.

²⁰Dân zôm inṭhat sikin tute Pathian mitmuah thiam ichang thei omak e; Dân sikin mîn thil isual an tho iti an irriat fia ngai a nit.

²¹Atûn chu Dân imang nang loia mi thiam ân chang dân Pathianin a zuang inlang tâk; Dân neh zânthlahei khomin amakhah an îsîr chu a nit.

²²Jisua Krista an iamna sikin tukhom â iam murdi chu Pathianin thiam a închang a nit, danglamna reng omak e:

²³Mi murdi an isual khai tâk a, Pathian roinpuina kha chang zoi khâi mak e.

²⁴Nikhomsela, Krista Jisua ritlanna zârin Pathianin a lungkhamna sik ringotin khangkana mihei khah â tlongin thiam ân chang tâk a.

²⁵Pathianin ani khah a thisen iam sika sual thupha chôina inih rangin ân kung a, mi thiam ân chang dân inlangna ranga ai tho a nit; a zâidotheina sikin tiana sualhei kha chu riano pelêm ai tho a nit.

²⁶Pathianin amah ngêi mi fel a nitzia neh Jisua iamhei murdi chu thiam ân chang iti infelna rangin atûnah hin mi thiam ân chang dân khah a zuang înlang tâk a nit hih.

²⁷Khate, isong rang ei inei mani? Nei mang meh. Îtho sik im? Dân ei zôm sikin mani? Ni mak e, iamna sika a nit ual.

²⁸Dân zôm sik ni loiin iamna sikin mîn thiam an chang ei iti a nit.

²⁹Pathian hih Judahei ta bîk im ai nit? Jentailhei ta khom ai nit sa no mani? O, a nit, Jentailhei ta khom a nit.

³⁰Pathian chu khatkah a nit a, sertan hei khah an iamna sikin thiam inchang a ta, sertan inohei khom an iamna sik ngirin thiam inchang a ti.

³¹Khate, iamna thu ei isîr intam sikin Dân khah chanlamboiin ei isia tâk itina mani? Ni mak e; Dân chu ei ithlop lem a nit.