Read Biete ROM 4 Bible Online

ROM 4 - Biete bible

ROM 4

¹Khangkan ni no seh, taksa tianga ei chibul Abrahama thu khah ingkan im ei isîr rang tâk?

²Sintho sika thiam inchang ni seh, Abrahama khan isong rang ai nei rang kêng; nikhomsela, Pathian mitmuah îte isong rang nei mak e.

³Pathian Thubûn im a îsîr kha? “Abrahama khan Pathian a iam a, kha a iamna sikah khan Pathianin thiam a închang a nit,” a ti a.

⁴Sinithotu thalo chu lungkham thilpêk ni loiin, ai lo suak pial a nit ual.

⁵Khannisela, min a sinthoah ringat loia iamnaa ringat a, mi sual thiam inchangtu Pathian khah iiama thiam inchanga a omah hin, kha a iamna khah a felnaa be a nit.

⁶Sintho sik ni loia Pathianin thiam a închanghei hamṭhatzia Davida khomin hingka hin â sîr:

⁷“An siatnahei izâa om a, An sualhei rikhûa omhei chu an ham a ṭhat vang na!

⁸Pumapan sualna neia ai be no chu an ham a ṭhat,” itin.

⁹Khate, kha ṭhatvurna khah sertanhei rang bang im sertan inohei rang khom? Sertan inohei rang khom a nit. “Abrahaman Pathian a iama, kha a iamna sikah khan Pathianin thiam a închang a nit,” iti a nit ei ti a.

¹⁰Amakhah a sertan maa thu manih a sertan nunga thu? Ingkana ringai rang im ai nit? A ser tan nunga ni mak a, a ser tan maa thu nit.

¹¹A ser tan maa a iamna sikin Pathianin thiam a închang a nit iti in-enna rangin ser ai tan a nit. Khanchu, sertan no man seh iamna sika Pathianin thiam a închanghei rangin chu Abrahama khah an rithla tiang pa a nit.

¹²Sertanhei Pa khom a nit, sertan an nit pai sik ni loiin, ei Pa Abrahaman ser a tan maa ai iam angkah ngira iamna an nei sikin a nit.

¹³Dân zôm sik ni loiin, iamnaa thiam ichang a nit sikin Pathianin Abrahama ziangah, amah neh a chihei khan rammual hih an idong rang a nit iti thu a înkung a nit.

¹⁴Dân izôm hih richonluatu nitna ni sela chu, iamna hih â tlong nîng a ta, ṭonginkung khom kha chanlamboi a nit itina nîng a ti.

¹⁵Dân khan Pathian ningthik â ṭhum a, dân boinah chu dân ichâina khom om ngai mak e.

¹⁶Abrahama chihei murdi rang, Dân izômtuhei bang ni loiin, ama iam angkana iamtuhei rang Pathian thiltlongpêk a nit tlia inlangna rangin iamna sikin a nit Abrahama ziangah ṭong a lei înkung,

¹⁷“Nam itam takka pan nang ki siam tâk,” iti riziak angkah khan Abrahaman ai iam Pathian, mithihei inring nôktu neh thil om inohei in-omtu mitmuah khan; Abrahama chu ei rêngka pa a nit.

¹⁸Abrahama khan itûng rang a boi tlak nung khomin a tûng ngit sikah khan, “Nam itam takka Pa,” a hong nit tâk; “Ner chihei chu ârsi zâkah la nîng an ti,” iti riziak angkah khan.

¹⁹Kum rizaka vêl mi a nit tâk a, a taksa ngaituan chu mithi angkah dôr a nit tâk; Sari khom â ching a nit iti a riat ṭian pum khomin a iamna ṭuai ual mak a.

²⁰Iamna risamin Pathian ṭonginkung khah ringla mak a, a iamna a rât tîr tîr a, Pathian ai chôiinrisâng lem tâk a nit.

²¹Pathianin a ṭonginkung khah lo an tluk thei iti ifel takkan a iam ngit a.

²²Khasikah khan kêng, “A iamna sika thiam inchang a nit,” iti ai nit.

²³Hi thu, “Mi fela pom a nit,” iti hih ama chungthu sîrna rang paia riziak ni mak e.

²⁴Eimani, ei Pumapa Jisua mithi lâia rithoka kâiithoitu iamtuhei, iam sika thiam ichanga omhei ta rang khomin riziak a nit.

²⁵Jisua khah ei sualhei sikin ithatin a om a, Pathian ziangah thiam ei chang theina rangin kâiithoiin ai om nôk a nit.