Read Biete ROM 5 Bible Online

ROM 5 - Biete bible

ROM 5

¹Khanchu, iam sika thiam ichanga omin, ei Puma Jisua Krista zârin Pathian neh ringeiin ei om tâk. [3]

²Ama zâr ngirin atûna ei omna, hi lungkhamnaa ei idingnaah hin iamnan ei lût tâk a, Pathian roinpuina ei la tlângpui rang itûngin ilômin ei iom sa a nit.

³Khabanah, ei dengtheinaa khom ilômin ei iom mai a nit; dengtheinan tuangdiarna â sua a,

⁴tuangdiarna khan detna â sua a, detna khan tûngna â sua ngai iti ei iriat a nit.

⁵Kha tûngna khan beidong ne sak mak e. Rithla Rithiang ne ipêk imangin ei lungsungah hin Pathianin a lungthlungna kha a zuang vur tâk a.

⁶Rât ino tak ei nit lâiah khan a zoro takah Krista chu mi sualhei rangin a lei ithi tâk a nit.

⁷Mi fel ranga thi chu tu rang khomin intak a ti, mi ṭha ranga thi chu tukhôk manin chu a lei nuam rop khom nîng a ti.

⁸Nikhomsela, Pathianin lung a ne thlung tak tak iti ân lang tâk, mi sual ei la nit lâiin Krista ei ta rangin a thi sikah khan.

⁹A thisen sikah khan Pathianin thiam a nen chang tâk a; Pathian ningthikna rithok khomin ama zârin a ne isan isua rang vang na!

¹⁰Irâl ei nit lâi ilua a Naipa thina sika Pathian neh ringei tâk ei nitin chu, Pathian neh ringeia ei om nung vângah hin chu Krista ringna sikin saninring ei init rang vang na!

¹¹Kha bang khah ni mak e, atûna ringeina ne petu ei Puma Jisua Krista zârah khan Pathianah ei ilôm a nit.

¹²Rammualah hin mi khatka sikin sual a lût a, sual sikin thina a hong om tâk a. Khanchu, rammuala mi murdîn sin an thonsual tâk sikin thinan mi murdi a irfang suak tâk a nit.

¹³Dân a om ma khomin rammualah sual a om tâk; khanniseh, Dân a om no sikin sual khah suala be ni mak e.

¹⁴Khanniseh, Adama rithoka Mosia hun idênin Adaman Pathian thupêk ôi loia â châina angkana sin thon châi inohei chungah khom thina khan richam a nei a. Adama khah â zuang rangpu neh inrikhek a nit.

¹⁵Khannisela, Pathian thiltlongpêk chu Adama sual neh khan ri-ang tlak mak, kha mi khatka sikah khan mi itam takkah an thi a, Pathian lungkhamna neh mi khatkah, Jisua Krista sika a thiltlongpêk chu mi itam takkan an idong a nit.

¹⁶Pathian thilpêk neh mi khatka sual khah ri-ang tlak mak e, sual khatka sikin thiamno changna a hong om a; nikhomsela, sual itam takka sikin lungkhamnaa thiam changna a hong om tâk.

¹⁷Mi khatka sualna sikin rammualah hin thinan roi ai rêl tâk a nitin chu, mi khatkah ngir, Jisua Krista sikin, Pathian lungkhamna lian tak neh a thiltlongpêk[4] thiam changna dongtuhei khan, ringna changin roinpui takkan roi rêl ngêt an ti.

¹⁸Khanchu, mi khatka sual sikin mi murdi thiamno inchang an nit a, khangkah ngirin mi khatka fel sikin mi murdi thiam ichangin an iring thei tâk a nit.

¹⁹Mi khatka thu zôm nona sikin mi murdi mi sual an nit tâk a, khangkah ngirin mi khatka thu zôm sikin mi tam takkah mi fel nîng an ti.

²⁰Sual â lang infel nôk ual theina rangin Dân a hong om a; khannisela, sual a pung natinsat dôrkah lungkhamna khah a pung natinsat nôk ual ngai a.

²¹Khanchu, sual khan thinan roi a rêl a; khangkah ngirin ei Puma Jisua Krista zâra kumtluang ringna ei nei theina rangin Pathian lungkhamna khan thiam inchangnan roi ai rêl a nit.