Read Biete ROM 6 Bible Online

ROM 6 - Biete bible

ROM 6

¹Im ei ti rang tâk? Pathian lungkhamna a pung ual theina rangin ei la îsual mai rang mani?

²Ni tlak mak e, eini sual tianga thi tâkhei hih sualah ingkan im ei la om mai thei rang?

³Krista Jisuaa baptisma chang murdihei chu a thinaah baptisin ei om iti nin iriat ino mani?

⁴Baptisma ei changin a ziangah iphûmin ei om sa tâk a, a thina kha ei îtlângpui a nit; khangkah takin, Pan roinpui takka thina rithoka Krista ai kâiithoi angkah khan, eini khom ringna tharin lêng tâng ei ti.

⁵Eini khom amah neh rizoma, ama thi lam angkana ei thi tâkin chu, amah ai thoinôk angkah takin amah neh rizomin eini khom kâiithoiin om sâng ei ti.

⁶Sual bôia ei om khâi nona rangin sual ripu taksa hih ithat rangin, ei miriam ilui khah a ziangah ihêmden a om tâk iti ei riat a.

⁷Tukhom â thi tâk chu sual ata ai zalen tâk a nit.

⁸Khante, Krista ziangah ei thi sa tâkin chu, a ziangah ring sa ngir ei ti iti ei iiam a nit.

⁹Krista khah thina rithokin kâiithoiin a om a, thi nôk khâi no nih iti ei riat, thina khan a chungah richam nei khâi mak e.

¹⁰A thina khah sual tiang thi thalna a nit a, a ringna khah Pathian zianga ring thalna a nit.

¹¹Khangkah ngirin nangni khom sual tianga thi tâkin ribe unla, Krista Jisuaah khan Pathian tiang iringin ribe rei.

¹²Khasikin, nin taksa lungbôk nangni inzôm rangin nin takpum ithi theiah khan sual hih inlal no riseh.

¹³Nin takpum iṭanghei a îkhom thil ṭha no thona mangrua rangin sual inmang khâi no rei; thina rithoka ring nôk angkan Pathian ziangah ripeh unla, nin takpum iṭanghei khom khah felna mangrua rangin Pathian ziangah peh rei.

¹⁴Sual khan nin chungah richam nei khâi no nih; Dân thunuaiah om loiin, lungkhamna thunuaiah nin om tâk sikin.

¹⁵Ingkan im ai nit rang tâk? Dân thunuaiah om loia, lungkhamna thunuaiah ei om tâk sikin ei îsual mai rang mani? Nâi sâi mak.

¹⁶Tu ziangah khom a thu zôm ranga nin ripêklût tâkin chu, a thu nin izôma bôi khah nin nit; sual bôiah a nitin chu thina a nit a, thu zômna bôiah a nitin chu felna a nit; a thu nin izôm tak bôi nin nit iti nin iriat ino mani?

¹⁷Khanniseh, Pathian ziangah lômthu om riseh. Sual bôi nin lei nit a; nikhomseh, nangni an ilan Thurchi Ṭha inriseina thu nin idong khah lungril takin nin zôm sikin,

¹⁸sual bôi ata khah isua nin nit a, felna bôihei nin hong nit tâk.

¹⁹Nin taksa rât nozia rian, miriam dânin thu ki îsîr a nit. Nin takpum iṭanghei khah rithiang nona neh siatna bôiah, pualoina ranga nin ipêk ngai angkah khan, atûn chu felna bôiah rithianga ring rangin peh ta rei.

²⁰Sual bôi nin nit lâiah khan felna tiang chu nin irkiang a nit.

²¹Atûna nin îzakpui tâk, nin lei isin ngai khah nin rifepui im? Kha thilhei khan a nungkhônah thina a îthlun tâk a nit.

²²Atûn chu sual ata inrikiang nin nit a; Pathian bôihei nin hong nit tâk sikin kumtluang ringna dong ranga inrithiang nin nit tâk.

²³Sual man chu thina a nit a; Pathian thiltlongpêk chu ei Pumapa Krista Jisuaah khan kumtluang ringna a nit.