Read Biete ROM 7 Bible Online

ROM 7 - Biete bible

ROM 7

¹Suapuihei, dân nin riat khai sikin ke sîr rang hih reh thei nin ti. Dân khan mi an ring sungkah bang an chungah thu ai nei ni mak im a?

²Nupui kha a pasal ring sungkah chu a pasalah dân khan a khuapde a; nikhomseh, a pasal a thi tenan chu a pasal ata dânin a khuapna khah isûtin a om ngai.

³A pasal ring sungin mi dang a neiin chu inrê a nit a; a pasal thi nungah khan chu dân khuapna ata khah ithla a nit a, mi dang nei khom sela inrê ni khâi mak.

⁴Khangkah ngir khah a nit, ki suapuihei, Krista takpum iṭanghei nin nit tâk sikin Dân tiang chu nin thi tâk a. Pathian ta ranga irâ ei isua theina rangin atûn chu mi dang ta, thina rithoka kâiithoia ta ei nit tâk.

⁵Ei miriam ilui nuna vâng ei sak lâiah khan chu ei rizukna sual, Dânin a îchok thoi khan, ei takpumah sin a tho a, thina â thlun ngai.

⁶Atûn chu, ne khuap ngaitu khah ei thisan tâk a, Dâna rithokin ithla ei nit tâk; Dân thu riziak ilui angkah pai ni loiin, Rithla dân itharin sin ei itho tâk a nit.

⁷Im ei ti rang tâk? Dân khah sual mani? Ni tlak mak e. Nikhomsela, Dân khan nen reh no sela chu sual hih reh no ning e. Dân khan, “Rizuk no roh,” ti no sela, rizuk hih reh no ning e.

⁸Hi thupêk hih zoronṭuma mangin sual khan keimaah hin rizukna chi tinrêng â thoi a. Dân om no sela chu sual hih thil ithi a nit.

⁹Matonah khan dân iboiin ki ring ngai a; khanniseh, thupêk khah a hong om a, sual khah a hong har a,

¹⁰kei chu ki thi tâk a. Ringna ranga thupêk khah ki ta rangin chu thina a hong nit tâk.

¹¹Sual khan thupêk khah zoronṭuma mangin a ne lêm a, a ne ithat tâk a nit.

¹²Dân chu arthiang a nit, thupêk khom arthiang a, â dik a, ai ṭhat a nit.

¹³Khate, thil iṭha khan ki ta rangin thina a îthlun mani? Nâi sâi mak. Sual hin a nit; sual a nitzia inlang rangin thil iṭha mangin ki ta rangin thina â thlun a, thupêk sikah khan sual inrîtzia khah ifel takkan a îlang tâk a nit.

¹⁴Dân chu rithla tiang thil a nit iti ei riat; keimah chu â fam thei miriam pai, sual bôia zuar tâk ki nit.

¹⁵Ki sintho dân hih rethiam mang e; isin kî nuam khah sin loiin, kî nel ngai khah kî sin tâk a nit hi.

¹⁶Kî sin nuam ngai ino khah ki sinin chu Dân khah a ṭhat kî tipui tina a nit.

¹⁷Khasikin, hi sinhei hih keimah â sintu ni mang a, sual keimaa om khan ai tho a nit ual.

¹⁸Keimah miriamah hin chu thil iṭha îte omak iti ki riat, thil iṭha tho nuamna nei ngai man inlang tho thei ngai mang e.

¹⁹Thil iṭha kî tho nuam khah tho loiin, thil isual kî tho nuam ino khah ki tho ngai a.

²⁰Kî tho nuam ino khah ki thon chu, â thotu khah keimah ni khâi mang a, sual keimaa om hi a nit.

²¹Khasikin, hi dân hih sin a tho mai iti ki riat suak tâk; thil iṭha tho ki nuam lâiin, thil isual kî tho nôk zel ngai a nit.

²²Ki miriam lungril tak khan chu Pathian Dân a lôm ngai a;

²³nikhomsela, ki takpumah hin sinithotu, dân danglam tak a om iti ki riat; amakhan ki lungril ṭha ti lam dân khah a doi a, sualna dân ki takpuma sin itho mai ngai bôiah a ne isiam ngai a nit.

²⁴Mi lungsiatiom ki nit vang na! Hi thina takpuma rithokah hin tûm ne sanisua rang tâk?

²⁵Pathian bangin kêng! ei Puma Jisua Krista zârah ei Pathian ziangah lômthu om riseh.[5] Khanchu, ki lungril takin chu Pathian dân a zôm a, ki takpum hin chu sualna dân ai zôm ngai a nit.