Read Biete ROM 8 Bible Online

ROM 8 - Biete bible

ROM 8

¹Atûn chu Krista Jisua omhei ta rangin chu thiamno inchangna reng om khâi mak.

²Krista Jisuaa ringna Rithla dân khan sualna neh thina dân ata a ne sanisua tâk a.

³Taksa râtno sika Dânin ai sin thei tlak ino khah Pathianin a zuang sin tâk; miriam taksa sual angkana riputin, a Naipa ngêi khah sual ribôlna rangin Pathianin a zuang tir a, taksaa sual iom khah thiamno ân chang tâk;

⁴taksa dâna om khâi ino, Rithla dâna om tâk eimaniah hin Dânin ai chûn khah ilena a om theina rangin.

⁵Taksa dâna omhei khan chu taksa tiang thilhei an nuam a, Rithla dâna omhei khan chu Rithla tiang thilhei an nuam ngai.

⁶Taksa tiang thil inuam chu thina a nit a, Rithla tiang thil inuam chu ringna neh thlangamna a nit.

⁷Taksa nuamlam khan Pathian a doi a, Pathian Dân zôm mak a, izôm khom zôm thei mak e.

⁸Khasikin, taksa nuamlama omhein chu Pathian inlôm thei mak.

⁹Khannisela, Pathian Rithla khah nangmaniah a om titakin chu taksa mi ni khâi mak chei a, Rithla mi nin init tâk a nit. Tukhom Krista Rithla nei ino chu ama mi ni mak e.

¹⁰Khante, Krista kha nangmaniah a omin chu nin takpum khah sual sikin thi man sela, Pathiana thiam ichang nin nit sikin nin rithla chu ai ring a nit.

¹¹Thina rithoka Jisua kâiithoi nôktu Rithla khah nangmaniah a omin chu, thina rithoka Krista Jisua kâiithoi nôktu khan nangmaniah ama Rithla in-omin, nin takpum â thi thei khah inring a ti.

¹²Khasikah khan, suapuihei, ritâng ei nei, taksa dâna oma taksa taka ring rangin chu ni mak.

¹³Taksa dânin nin omin chu nin ithi ngêt rang a nit; nikhomsela, nin taksa sual sinthohei khah Rithlan nin thatin chu ring nin ti.

¹⁴Pathian Rithla îruaia omhei murdi chu Pathian naihei an nit.

¹⁵Nin Rithla dong khah iṭia om nôk ranga bôi nitna Rithla ni mak a, nai nitna Rithla kêng nin idong; kha Rithla sinthotheina zârah khan, “Abba, Epa,” itin Pathian ziangah ei îkhêk ngai a nit.

¹⁶Kha Rithla ngêi khan eimani rithla neh rizomin Pathian naihei ei nit iti a nen riat a.

¹⁷Pathian naihei ei nitin chu richon iluatuhei ei nit a, Pathian richon iluatuhei, Krista luapuituhei ei nit; Krista tuangna ei itlângpuiin chu a roinpuina khom ei îtlângpui ngêt rang a nit.

¹⁸Atûna tuangnahei hih nakana ei chunga roinpuina inlanga la om rang neh chu inrikhek zâtin be mang e.

¹⁹Thil siam murdi khan Pathianin a naihei ân lang zoro an ingâkmo tak tak a nit.

²⁰Thilsiam murdi khah anmani nuam sik ni loiin â siamtu Pathian thu sikin chanlamboi inih ranga nôl an nit tâk; nikhomsela, itûng rang a la om;

²¹thilsiam murdi khom nikhua khatkah chu siatna bôi ata kêlisuan la om an ta, Pathian naihei zalenna roinpui khah an la îtlângpui rang a nit.

²²Thilsiam murdi khah atûn tenah hin naiha isêa rung angkan an îrung a nit iti ei riat.

²³Kha bang ni mak e, eini Rithla râ masa dongtuhei ngêi khom hih, a naia a ne siam [6] rang zoro, ei takpum ritlanna rang khah, ingâkmon ei îrung a nit.

²⁴Kha tûngna sikah khan kêng saninring ei init; nikhomsela, imu thei ṭian tûngna hih tûngna ni mak e. Mîn ai mu mai tâk khah ingkan im a la tûng mai rang?

²⁵Ei imu no khah ei tûngin chu ei ingâk ngêi ngêi ngai a nit.

²⁶Khangkah ngirin, Rithla khan ei rât nonaah a ne ṭangpui ngai. Ingkana ṭongṭai rang im ai nit iti khom reh mang meh; nikhomsela, Rithla khan khêk irung isîr thei loi rakkan a ne iṭongṭai pêk ngai a nit.

²⁷Rithla khan Pathian lungdo angkah taka a mihei a ne ṭongṭai pêk ngai sikin, lungril ientu Pathian khan Rithla îsîr tum khah im ai nit iti ai riat ngai a nit.

²⁸Khante, Pathian lungithlungtu, ama inkung lam taka ai koihei ta rangin chu, an ṭhatna rangin itinrêngin a tho pêk ngai iti ei riat.

²⁹Ai riat thlâmhei chu ama Naipa angkah taka om rangin a lei inkung thlâm a, a Naipa khah urêng itam takka lâia nai lutîr a hong nit theina rangin.

³⁰Khante, a înkung thlâmhei chu a koi a, ai koihei chu thiam ân chang a, thiam a închanghei chu a roinpuina ân dong ngai.

³¹Kha thu-ah khan im ei ti rang tâk? Pathian ei tiang a ṭangin chu tûm ne doi thei rang?

³²Ama Naipa tak khom zua loia, ei rêngka rithûla petu khan, thil dang murdi khom â tlongin ne peh sa no nîm a?

³³Pathian mi rithlanghei chu tûm â sêl ngam ranga? Thiam inchangtu khah Pathian a nit a.

³⁴Tu ngân im thiamno ân chang rang? Krista Jisua khan mani? Ni mak e. Ani chu ei ta rangin a thi a, a thoinôk a, Pa Pathian changtianga oma ne ṭongpêktu khah amah ngir kêng ai nit.

³⁵Krista lungthlungna rithokin im ne ṭhen thei rang? Dengtheinan manih, ngaisiatnan manih, nuamlonan manih, iṭâmin manih, korongnan manih, ṭiomnan manih, khandaiin manih a ne iṭhen thei rang mani?

³⁶Pathian Thubu-a “Nangma sikin sûn thluanin ithat rang chakin kin om a, Bera ithat rang angkana be kin nit,” iti riziak angkah khan.

³⁷Thei no nih! Khahei murdiah khan lung ne thlungtu sikin roinpui takka â nêtu ei nit.

³⁸Thina khomin, ringna khomin, vântirtôn khomin, inlalna khomin, thil om isa khomin, thil la hong iom rang khomin, sinthotheina khomin,

³⁹risângna khomin, inthûkna khomin, thilsiam dang rêng rênghei khomin, ei Pumapa Krista Jisuaa om Pathian lungthlungna ata chu ne ṭhen no nih iti kî riat infel a nit.