Read Biete ROM 9 Bible Online

ROM 9 - Biete bible

ROM 9

¹Kristaah khan thudik tak kî ril a nit, milak ril mang e. Rithla Rithiang zâra ki sia neh ṭha riatna khom hin a ne riatpui.

²Ki lungrilah hin ngaisiatna liantak neh lungril natna boi theiino ki neizia hi!

³Ki suapuihei, taksa tianga ki chipuihei rithûla hin vâni sâmin Krista ziang ata iṭhenpaiin om inlang ki ti rak ngai.

⁴Israel mi an nit a, nai nitna hei, roinpuina hei, thuthlung hei, Dân hei, Pathian sin hei, ṭonginkung hei an dong a.

⁵Richibulhei khah an puhei an nit a, taksa tianga suiin chu Krista ngêi khom khah an chipui a nit. Tinrêng chunga om Pathian khah kumkhuantluangkan inpâkin om riseh. Amen.

⁶Pathian ṭonginkung khah chanlamboi a nit tâk ki tina ni mak. Israela richihei murdi khah an rêngkan Israel mi ni riai mak e.

⁷Abrahama richihei murdi khom an rêngkan a naihei ni riai ual mak, “Isaka-ah hin ni chihei isui nîng an ti,” Pathianin ai ti pêk a nit.

⁸Amakhah, taksa tianga a naihei khah Pathian naihei ni mak a, ṭonginkung naihei khah Abrahama richi diktaka be an nit.

⁹Pathian ṭonginkung chu amahih a nit, “Atûn angkah zoroah hin zuang ki ta, Sari khan naiipa nei a ti,” iti hi.

¹⁰Kha bang khah ni mak a, mi khatkah, ei chibul Isaka rithokin Rebeki khan nai inphîr a vong a,

¹¹naitehei la suak ma, â sia manih, â ṭha manih an tho thei maah khan Pathianin a lungdo angkan khatkah khah a irthlang a nit iti â lang;

¹²sintho sik ni loiin, â koitu lungdo sikah khan Rebeki ziangah, “A ulian ualin a naipang ual sin thông a ti,” Pathianin ai ti kha.

¹³Pathian Thubu-a, “Jakoba lung ki thlung a, Esauva chu ki nel,” iti riziak a nit.

¹⁴Khate, im ei ti rang tâk? Pathianah khan fel nona ai om mani? Nâi sâi mak.

¹⁵Ani khan Mosia ziangah, “Lung ki înkham kangân chu lunginkham ki ta, khoza ker ngaina chung kangânah chu khoza ringai ki ti,” ai ti kha.

¹⁶Khasikin, miriam nuam sik manih, sintho sik manih ni loiin, Pathian lungkhamna sika ai nit lem a nit.

¹⁷Pathian Thubûn Faroa ziangah, “Ki sinthotheina ken lang theina rang neh rammual pumpuiah ker ming ân thang theina rang pialin rêngin nang kî phun a nit,” a ti a.

¹⁸Khaangkan, Pathianin ai nuamkah lung ân kham ngai a, ai nuamka lung a înkhir ngai a nit.

¹⁹“Khangkan a nitin te, Pathianin îtho rang im mi a lai dem mai rang? A lungdo khah tûm â kal thei a?” nin ti a nit thei.

²⁰Khanniseh, O miriam, Pathian isêltu khah tûm nî nit? Thilsiam khan â siamtu ziangah, “Îtho rang im hingkan ni ne isiam?” ai ti rang mani.

²¹Bêpil lûm khatkata rithokin bêl ilu tak hei, bêl lu bâk inohei isiam rangin bêlvuaktu khan bêpil chungah richam nei mak im a?

²²Khangkah khan Pathianin a tho ngai; a ningthikna neh a sinthotheina khah inlang nuam man seh, a ningthikna dongtu bêl, inrimang zel ruahei chungah khan a tuangdiar ngêi ngêi a;

²³khante, a lungkhamna bêl, a roinpuina dong ranga a înrifûk einihei ziangah hin a roinpuina tamtak a zuang înlang tâk a nit.

²⁴Judahei lâi ata bang ni loiin, Jentailhei lâi ata ai koihei hi khangkana bêlhei khah ei nit.

²⁵Hosea Lekhabuah, “Ki mi ni ngai inohei khah ‘Ki mihei’ tîng ki ta, Lung kî thlung ngai ino nu khah, ‘Lungthlungnu’ tîng ki ti.

²⁶‘Ki mihei ni mak chei’ a tina mun ngêiah khan, Pathian iring naiheia be nîng nin ti,” itia a îsîr angkah khan.

²⁷Isaia khom khan Israel mihei thu khêkpuiin, “Israelhei khah tuikhangliana ṭiai dôran tam khom sela, iroichekah bang saninringin om an ti.

²⁸Pumapa khan rinêng chunga a roirêlna rang khah a len zel rang tâk sikin,” ai ti kha.

²⁹Isaia ngirin, “Pumapa Tinrêngthothei khan richi ne lei zua pêk no sela chu Sodom khua angkan ni tâng ei ta, Gomora angkah takin ni tâng ei ti,” itia a lei îsîr angkah khan.

³⁰Im ei ti rang tâk? Jentail, felna zong inohei khah thiam inchang an hong nit tâk, iamna sika thiam changna kha.

³¹Dân izôma thiam ichang itum Israelhei khan chu Dân angkah khan chu thiam chang zoi khâi mak e.

³²Îtho sik im ai nit? Iamnan zong loiin, sinthon an zong sika a nit. Khasikin, “Ibâna lungah” an ibâ tâk a.

³³Pathian Thubu-a, “En ta, Zionah khan ibâna lung neh, Ilîrna lungpui kî sia a nit. Khanniseh, tukhom ama iam kangân chu, Mualinphoi no nih,” ai ti angkah khan.