Read Biete 1 KORINTH 11 Bible Online

1 KORINTH 11 - Biete bible

1 KORINTH 11

¹Keiman Krista kî enton angkah hin nangni khomin ne enton rei.

²Nin ne riat mai ngai sik neh ipom mai rang thu nangni ki îsîr pêk angkah taka nin vong ngit sikin nangni ken pâk.

³Nikhomsela, ipa murdi lu chu Krista a nit, nupang lu chu ipa a nit; Krista lu chu Pathian a nit iti nin riat kî nuam a nit.

⁴Ipa, lukhum ikhum puma ṭongṭai manih, thusîr manih khan, an lu Krista khah mualphoi an isak a nit.

⁵Khannisela, nupang, lukhum khum loia ṭongṭai manih, thusîr manih khan, an lu ipa khah mualphoi an isak a nit.

⁶Nupangin lukhum khum loia a omin chu iepin ep nôk let riseh; khataka nupang ta rangin lu ep manih, voi inkol manih izakpui iom a nitin chu lukhum khum riseh.

⁷Ipa chu Pathian ri-angpui neh roinpuina inlangtu a nit sikin lukhum a khum rang ni mak a; nupang kha chu ipa roinpuina a nit.

⁸Ipa hih nupanga rithoka siam ni mak a, nupang hi chu ipaa rithoka siam a nit.

⁹Ipa hih nupang ta ranga siam khom ni mak a, nupang rêk chu ipa ta ranga siam a nit.

¹⁰Khasikah khan, vântirtônhei sikin nupangin an lu-ah ipa richamneina richiknan lu an khum [8] rang a nit.

¹¹Nikhomsela, Pumapaah chu nupang hih ipa boiin om thei mak a, ipa khom nupang iboiin om thei mak e.

¹²Nupang hih ipaa rithoka siam ai nit angkan, ipa khom hi nupanga rithoka suak a nit; nikhomseh, thil tinrêng hih Pathiana rithoka suak korong a nit.

¹³Ngaitua ta u, nupang lukhum khum loia Pathian zianga ai ṭongṭai hih a ṭhat nin ti rêng rêng im a?

¹⁴Ipa sam isei chu a ta ranga mualinphoina a nit iti nin suakpui lungril khomin nangni a înriat ino mani?

¹⁵Nupang sam isei rêk chu a ta ranga roinpuina a nit. A sam khah ama rikhûna ranga ipe a nit.

¹⁶Tukhomin hi thu hih an sêl le khom, hi ban hi chu dân dang reng nei mang me, Pathian koindanghei khomin nei mak e.

¹⁷Hi thu nangni ki înrisei izôm thu-ah hin chu nangni inpâk thei mang e, nin ṭhat ualna rang ni loia nin siat ualna rangin nin inkhôm ngai sikin.

¹⁸A masa takin, Koindanghei nin inkhômnaah inṭhenna a om ngai iti ki lei riat a, idik rang khomin kî iam a nit.

¹⁹Nangmani lâia mi dik takhei an ilang fel theina rangin, nin lâiah ringai dân inran inei khom an om rang pial a nit.

²⁰Hi sikah hin nin inkhôm zoroa nin ifâk ngai khah Pumapa Zânbu ni mak e.

²¹Mi tinin nin fâkin nin bu chit nin fâk ngai a; khanchu, mi ṭhenkah an von a ṭâm lâiin mi ṭhenkah nin inrui ngai a.

²²Îtho sik im ai nit tâk? Fâk zongna rang in nin inei ino mani? Anitnole, Pathian koindang ienkhûmin, miriam inkhôkhei khah mualphoi nin isak mani? Hi chungchângah hin im ti seh, nin ne tûng? Nangni ki înpâk rang mani? Hi chungchângah hin chu nangni înpâk thei tlak mang e.

²³Thu nangni ki îrilhei khah Pumapa zianga rithoka kî mu a nit; khangkana, inmana a om zânah khan Pumapa Jisuan ibai a lâka,

²⁴Pathian ziangah lômthu â sîr zoiin, a khoi a, “Amahih ki taksa nin rithûla peh rang chu a nit. Nin ne riatmaina rangin amahih tho ngai rei,” ai ti kha.

²⁵Khangkah ngirin, zânbu fâk zoiin kilât khom khah a lâk a, “Hi kilât hih ki thisena thuthlung thar chu a nit, nin in ikipah nin ne riat maina rangin tho ngai rei,” ai ti kha.

²⁶Zorotin hi bai hih nin fâk a, kilât hih nin in ikipah Pumapa thina chu a zuang nôk mâkah nin înpuang a nit.

²⁷Khasikin, tukhomin tluk loia Pumapa bai ifa a, kilât iin murdîn chu Pumapa taksa neh thisen chungah thiam no chang a ti.

²⁸Khasikin, mi tinin mahni rifia bak sela, khanung ibai khah ifan kilât khah in riseh.

²⁹Ibai ifatu neh kilât iintu[9] khan Pumapa taksa omzia a riatinfel non chu mahni chunga roirêlna thlun rangin ai fâkin ai in a nit.

³⁰Khasikah khan kêng nin lâia mi itam takkah nin irzalin nin înṭop a, mi tam takkah nin iin thlar a nit.

³¹Mahni rifia bak ngai eilan chu roiirêlpêkin ei iom ino rang a nit.

³²Nikhomsela, roiirêlpêkin ei om khoma, rammual mihei neh munka thiamno ei chang nona rangin Pumapa sôina ei itong ngai a nit.

³³Khasikin, ki suapuihei, Pumapa Zânbu rikhîl ranga nin inkhômin ringâk risak ngai rei.

³⁴Nin înkhôm khah roirêlna nin tuangna a nit nona rangin, tukhom a von a ṭâmin chu a inah ne riseh. Khante, thu danghei chu ki hong tikah ngaitua tâng ki ti.