Read Biete 1 KORINTH 12 Bible Online

1 KORINTH 12 - Biete bible

1 KORINTH 12

¹Suapuihei, Rithla tiang thilpêk thuhei hi nin iriat ino kî nuam ino a nit.

²Sanong nin nit lâiah khan mirmil iṭong khom ṭong thei ino tiang ṭhuiinvâiin nin om ngai iti nin riat a.

³Khasikin, amahih nangni inria kî nuam a nit: Tutên Pathian Rithla îruaiin, “Jisua chu vânisal a nit,” ti thei ngai mak a, tutên Rithla Rithiang îruai ni non chu, “Jisua chu Pumapa a nit,” ti thei ngai mak e.

⁴Khante, rithla thilpêk dang dang a om a, Rithla kha chu munkah a nit.

⁵Sintho dân lam dang dang an om a; nikhomsela, Pumapa chu munkah a nit.

⁶Sinthotheina chi dang dang an om a; nikhomsela, Pathian kha chu munkah a nit, mi tin zianga sinthotheina peh ngaitu chu.

⁷Ṭhatpuina rangin Rithla inriatna khah mi tin ziangah a zuang itlung a nit.

⁸Rithla khan mi ṭhenka ziangah vârna thu a pêk a, mi dang ziangah kha Rithla ngir khan riatna thu a pêk a.

⁹Khante, kha Rithla ngir khan mi dang ziangah iamna a pêk a, mi dang ziangah indam theina ai pêk a nit.

¹⁰Mi dang ziangah sinrikhêl sin theina a pêk a, mi dang ziangah thu sîr theina a pêk a, mi dang ziangah Rithla thilpêk a nit neh nitno thlei theina a pêk a, mi dang ziangah ṭongriatloi chi dang dang a pêk a, mi dang ziangah ṭongriatloi rilfia theina ai pêk a nit.

¹¹Nikhomsela, khahei murdi khah Rithla khatka sintho korong a nit a; a nuamlam angkah takin mi tin ziangah thilpêk chi dang dang ai pêk ngai a nit.

¹²Takpum hi khatkah a nit a, iṭang itamkah a nei a, takpum iṭang chu tam khom seh takpum khatkah a nit; Krista khom hih khangkah khan a nit.

¹³Ei rêngkan Juda manih, Grik manih, suak manih, suak nino manih, takpum khatka om rangin, Rithla khatkah bang baptisin ei om a, ei rêngkan Rithla khatkah bang a ne în-in a nit.

¹⁴Takpum hih iṭang khatkah banga siam ni mak a, iṭang itam takkah a nit.

¹⁵Ke hin, “Kei chu kut ki nit no sikin takpuma kop ni mang e,” ti sela, kha sikah khan takpuma kop ino ni ual no nih.

¹⁶Khante, ikuar khomin, “Kei chu mit ki nit no sikin takpumah kop ni mang e,” ti sela, kha sikah khan takpuma kop ino ni ual no nih.

¹⁷Takpum hi mit ringot ni ta sela, ingkan im arngai thei rang? Ikuar ringot ni ta sela, ingkan im inam a riat thei rang?

¹⁸Nikhomsela, Pathianin iṭang tin hih takpumah a nuam nuamna takah a în-om a nit.

¹⁹An rêngkan iṭang khatkah ringot ni sela, takpum ai om thei ino a nit.

²⁰Khannisela, iṭang itam takkah om khom seh takpum chu khatkah bang a nit.

²¹Khanchu, mit hin kut ziangah, “Nang nang mang e,” ti thei mak a; lu khomin kephahei ziangah, “Nangni nang mang e,” ti thei mak e.

²²A nit, kha nêkan, takpum iṭang rât inoa langhei hih an nangna ai tam ual a nit.

²³Khaangkan, takpum iṭang ei înlut ok ngai inohei hih, khahei tak khah ei înlut tak an nit ngai a; ei takpum iṭang enhoi ok inohei hih ei înrivo ual ngai a nit.

²⁴Ei takpum iṭang enihoi ualhei hi chu khangkana tho khah nang mak e. Pathian ngêiin enhoina nei ino ṭanghei khah inlu ualin takpum hih a inrifom a nit.

²⁵Khasikin, takpumah hin inṭhenna zel omak a; â ṭang tinhei hin ri-angnatka an ringaitua risak theina ranga inrifom a nit.

²⁶Khaangkan, iṭang khatkan a tuangin chu iṭang danghei murdîn an tuang korong ngai a; iṭang khatkah inpâkin a omin chu iṭang danghei murdi khom an ilôm ngai a nit.

²⁷Nangni khom hi nin rêngkan Krista takpum chu nin nit a, nin sikah â ṭanghei nin init chit a nit.

²⁸Pathianin a koindangah hi mihei hih a sia a: â khatnah tirtônhei, â niknah zânthlahei, â thumnah minriseituhei; khanungchu, sinrikhêl isin theihei, kha nung nôkah indamna thilpêk ineihei, mi ṭangpui inuamhei, roiirêl ithiamhei, ṭongriatloi chi dang dang ineihei khah an nit.

²⁹An rêngkan tirtôn manih, zânthla manih, minriseitu manih ni zit mak e. Mi tinin sinrikhêl sin theina ritha nei zit mak e.

³⁰Indam theina manih, ṭongriatloia thu sîr theina manih, a rilfia theina manih khom nei zit mak e.

³¹Thilpêka a roinpui ualhei khah rizuk ual rei. Khante, lampui iṭha nôk ual nangni inmûng ki ti.