Read Biete 1 KORINTH 13 Bible Online

1 KORINTH 13 - Biete bible

1 KORINTH 13

¹Miriam ṭonghei neh vântirtôn ṭongheiin thu isîr thei khom inlang, lungthlungna ki nei non chu dâr irî pipai manih, têngrep irî pipai manih bang nîng ki ti.

²Khante, thu sîr theina neiin, thurithup murdi riattheina neh riatna murdi nei khom inlang, itlâng inrithîn theina dôr iamna nei khom inlang, lungthlungna ki nei non chu îte ni no ning e.

³Kî nei murdi inrianghei ifâna rangin peh vang khom inlang, ki takpum tena khom ikâng [10] rangin ripeh khom inlang, lungthlungna ki nei non chu ki ta rangin îte rife no nih.

⁴Lungthlungna chu a tuangthei a, lungkhamna a nei a, narsa ngai mak a, lârripâk mak a, risong ngai mak a,

⁵om pualoiin om ngai mak a, marangṭhat zong ngai mak a, a ninginthik nuam ngai mak a, sual tiang ngaitua ngit mak a;

⁶felnona lôm ngai mak a, thutak chu a lôm ngai a.

⁷Lungthlungna chu a tuang ngêi ngêi a, iamnan a sip a, a tûng ngit a, tinrêng a tuang isua ngai.

⁸Lungthlungna hi tiklâi khomin dâi no nih. Thusîrnahei hih om khom seh inbâng la nîng a ta; ṭongriatloihei hih om khom seh la mong a ta; riatna hih om khom seh la boi a ti.

⁹Rikip loiin ei riat a, rikip loiin ei îsîr ngai a nit.

¹⁰Arkip a zuang tlung tikah chu arkip ino hih inboi ni tâng a ti.

¹¹Ki naipang lâiin chu naipang ṭongin ki ṭong a, naipang riatin ki riat a, naipang ngaitua angkan ki ngaitua ngai; atûn ki ûnlian tenah hin chu naipang tho dân khah kî mâk tâk a nit.

¹²Atûnah hin chu lîmena rilîm ideldap angkah bangin ei mu a, nakanah chu mâi ritongin mu tâng ei ti. Atûn chu rikip iloiin ei riat a, nakanah chu Pathianin a ne iriat infel angkah hin rianfel tâng ei ti.

¹³Khante, hi ithumkah - iamna, tûngna neh lungthlungna hei hih om mai a ti; hihei lâia â roinpui tak chu lungthlungna hi a nit.