Read Biete 1 KORINTH 14 Bible Online

1 KORINTH 14 - Biete bible

1 KORINTH 14

¹Lungthlungna hih rizûl mai unla; Rithla tiang thilpêkhei khah idong rizuk mai rei, a bîkin, Pathian thu sîr theina thilpêk vâng chu rizuk nôk ual rei.

²Ṭongriatloia thu sîrtu khan miriam zianga sîr ni loiin, Pathian zianga sîr a nit a, tutên a thu sîr omzia reh thei mak a; nikhomsela, ani khan Rithla sinthotheinan thutak rithup a îsîr a nit.

³Pathian thusîrtu khan chu miriam zianga thu sîr a nit a, siamṭhatna thuhei, rithorna thuhei, thlangamna thuhei â sîr ngai.

⁴Ṭongriatloia thu sîr khan chu amah bang arsiam inṭhat ngai a, Pathian thusîrtu khan chu koindang pumpui a siam inṭhat ngai.

⁵Khante, nin rêngkan ṭongriatloia thu nin îsîr ki nuam; nikhomsela, Pathian thu sîr theina thilpêk inei rangin nangni kî nuam ual a nit. Ṭongriatloi chu Koindang pumpuiin risiaminṭhatna an mu theina rangin, a rilfia nôk zel non chu, Pathian thusîrtu khah ṭongriatloia thu sîrtu nêkan chu ai roinpui ual a nit.

⁶Suapuihei, atûnah hin hong inlang, ṭongriatloiin thu hong isîr inlang, Pathiana rithoka inriatna thu manih, riatna thu manih, thu ṭha isîr manih, riseina thu manih nin ziangah ki îsîr a nit non chu nin ta rangin rifena im ki om ranga?

⁷Ringna nei ino, irîhoi mangrua theile manih, perkhuang manih khom hih omzia neia an inrî non chu î lâ tak im an însak ingkan im ireh thei a nit ranga?

⁸Bekul khom hi â tumtu khan omzia neiin a tum non chu tûm râl ikâp rangin arfo ranga?

⁹Khangkah ngirin, nangni khom ṭongriatloia nin thu sîr khah ireh thei zel a nit non teh tûm â rethiam thei ranga? Nin ṭonghei khah takboiah kêng a irmang let rang.

¹⁰Rammualah hin ṭong chi itam takkah a om a; nikhomsela, khatka lua omzia nei ino rêng rêng omak e.

¹¹Khanniseh, a ṭong omzia khah ki riat non chu ki ta rangin kha ṭong imangtu khah ram dang mi nîng a ta; kei khom ama ta rangin ram dang mi nîng ki ti.

¹²Khanchu, Rithla thilpêk idong nin irzuk mai angkan thil tinrêng nêka â ṭha tak koindang siamindingna rang thilpêk nin nei intam theina rangin zong rei.

¹³Khasikin, ṭongriatloi ineihei khan a rilfia theina ngên riseh.

¹⁴Ṭongriatloiin ki ṭongṭaiin chu ker thla kha chu a ṭongṭai ngêi a, ki lungril chu ṭangna nei mak e.

¹⁵Khate, ingkan im ai nit rang tâk? Rithlan ṭongṭai ki ta, ki lungril tak khomin ṭongṭai sâng ki ti; inpâkna la khom rithlan sak ki ta, ki lungril khomin sak sâng ki ti.

¹⁶Rithla bangin Pathian ziangah lômthu isîr inla khom, iamnotuhei iṭhungnaa ṭhunghei khan ni thu sîr omzia khah reh no nia, ingkan im ni lômthu sîrah khan “Amen” an ti thei ranga?

¹⁷Pathian zianga nin lômthu sîrna ṭongṭai khah ṭha ok khom seh, mi danghei kha chu siaminṭha ual no nih.

¹⁸Nangmani nêkan ṭongriatloiin thu ke sîr intam ual sikin Pathian ziangah lômthu ki îsîr a nit.

¹⁹Nikhomsela, koindang inkhômnaah chu ṭongriatloia thu bâi sîngka sîr nêkan, mihei inriseinan an riat thei rang lama thu bâi ringakah bang isîr ki nuam ual.

²⁰Suapuihei, nin ngaituana tiang naiinpang no rei; sual tiang chu naitesen angkah ni unla, lungril tiang chu puitling rei.

²¹Pathian Thubu-ah khan, “‘Ṭongriatloi imang mihei bâiin, Ki mihei ziangah thu isîr ki ta, Khaten khomin ki mihein ner ngai no nih,’ Pumapan a ti,” iti riziak a nit.

²²Khasikah khan ṭongriatloihei hih iamtuhei ta ranga risin ni mak a, iamnotuhei ta rang a nit; khangkah ngirin thu sîr theina thilpêk hi chu iamtuhei ta ranga risin a nit a; iam inohei ta rang ni mak e.

²³Khate, koindang pumpui inkhômnaah nin rêngkan ṭongriatloiin thu sîr ta unla, a la ria nohei manih, iamnotuhei manih hong lût ta sela, an rêngkan an invêt riai tâk nangni an iti no rang mani?

²⁴Khannisela, nin rêngkan Pathian thu sîr ta unla chu iamnotuhei manih, la rianohei manih hong lût khom sela, an thu ringai khan an thiam nozia inlang a ta, an isualzia inreh suak a ti.

²⁵An lungrila rithup khah inlangin om a ta, Pathian chubai iûnin rikhûk dil an ta, “Nin lâiah hin Pathian a om titak,” itin inpuang an ti.

²⁶Suapuihei, amahih kî ti chu a nit. Nin inkhômin inpâkna la hei, thu inriseina hei, Pathiana rithoka inriatna thu hei, ṭongriatloi hei neh a rilfiana hei nin nei seng ngai a. I tinrêng koindang siamṭhatna ranga tho rang a nit.

²⁷Ṭongriatloia thu nin isîr le khom mi inik ithumka banin isîr no sela, khat khatkan ni sela; khante, mi khatkan rilfia ngêt riseh.

²⁸Khanniseh, â rilfiatu an om non chu, koindang inkhômnaah chu dâirek sela, mahni neh Pathian ziangah isîr riseh.

²⁹Pathian thu sîr khom thilpêk idonghei mi inik ithumkan isîr sela, mi danghei khan chu iṭha takkan lei ringai riseh.

³⁰Khanniseh, inkhôma ṭhungtuhei lâia khatkan Pathian thu a dongin chu a lei iṭong masatu khah a mong rang a nit.

³¹Mi tinin an risei theina rang neh ithora an om theina rangin nin rêngkan khat khatkan Pathian thu nin isîr thei.

³²Pathian thu sîrtuhei thu sîr theina thilpêk khah thusîrtu zêkna nuaiah a om rang a nit.

³³Pathian chu buaina Pathian ni mak a, ringeina Pathian a nit. Koindang tina Pathian mi rithianghei tho dân angkan,

³⁴koindang inkhômnaah chu nupanghei [11] khah an dâirek rang a nit; thu an isîr rang iphal ni mak e; Dân lekhabûn ai ti angkan thu izômin an om rang a nit.

³⁵Thil an iriat nuam a omin chu insungah an pasalhei ridon riseh. Koindang inkhômnaah nupangin thu a îsîr chu mualphoi iom a nit.

³⁶Pathian thu hih nangmania rithoka suak mani? Anitnole, nangmani ziangah bang im a zuang itlung?

³⁷Tukhom thuriltu manih, rithla mi manih inia arben chu nin zianga ki thu riziak hih Pumapa thupêk a nit iti lei reh riseh.

³⁸Khannisela, tukhomin amahih a ngaisak non chu ani khom ngaisak loiin om riseh.

³⁹Khasikin, suapuihei, Pathian thu sîr rizuk titak unla, ṭongriatloia thu sîr khom khap no rei.

⁴⁰Nikhomsela, tinrêng enihoi tak neh ifel takka tho ni riseh.