Read Biete 1 KORINTH 15 Bible Online

1 KORINTH 15 - Biete bible

1 KORINTH 15

¹Khante, suapuihei, Thurchi Ṭha nangni ki lei îril khah atûnah hin nangni inreh nôk ki ti; kha Thurchi Ṭha khah nin iham a, kha ngirah khan nin iamna nin ringat a;

²Thurchi Ṭha nin zianga ki îsîr khah nin iiam pipai a nit noa, nin ipom ngit a nitin chu, kha Thurchi Ṭha khan nangni saninring a ti.

³Amahih ki thu dong nangni ki îsîr pêk tâk kha a nit; Krista chu Pathian Thubu-a riziak angkah takin ei sualhei sikin a thi a,

⁴iphûmin a om a, Pathian Thubu-a riziak angkah takin sûn thumka nungah kâiithoiin a om a;

⁵Petera ziangah ân lâr a, kha nung Sômleiinikahei ziangah khom ân lâr a;

⁶kha rizoiin chu ama zui ngai mi rizarngaka nêka tamhei lâiah ân lâr nôk a, khahei lâia mi ṭhenkah thi ta khom sela, â tam ual chu atûn tenan an la ring a.

⁷Khante, Jakoba ziangah ân lâr nôk a, kha nung tirtônhei murdi ziangah ân lâr nôk a.

⁸A nungkhôn takah khan, keimah, a zoro ni noa suak angkah pai ziangah khom ân lâr a.

⁹Kei chu tirtôn lâia â chîn tak ki nit a, Pathian koindanghei nuam ki lôna sikin tirtôna ibe inrup ino ki nit.

¹⁰Nikhomsela, Pathian lungkhamna sikin kî nit nit ki nit tâk; khante, a lungkhamna a ne ipêk khah â tlongin omak a, kha nêkan tirtôn danghei murdi nêkan khom â sin ual tak ki la nit; nikhomsela, keima isin ni mak a, Pathian lungkhamna keimaa om khan ai sin a nit.

¹¹Ikhom ni sela, kei khomin, anni khomin khangkah khan kin isîr ngai a, nangni khomin kha ngir khah nin lei iiam tâk a nit.

¹²Krista chu thina rithokin kâiithoiin a om iti thu nangni kin isîr pêk a, nin lâia mi ṭhenkan ithôm mithi thoinôkna rêng rêng omak e nin iti?

¹³Mithi thoinôkna rêng rêng a om non chu Krista khom khah kâiithoiin omak itina a nit.

¹⁴Khante, Krista khah kâiithoiin ai om a nit non chu kin thu sîr hih chanlamboi nîng a ta, nin iiam khom chanlamboi ai nit rang a nit.

¹⁵Khabanah, Pathianin Krista chu a kâiithoi iti kin isîr a, mithi thoinôkna ai om ino a nitin chu Pathian ta ranga riatpuitu milak nîng kin ta, Krista khom ai kâiithoi ino nîng a ti.

¹⁶Mithihei kâiithoiin an om non chu Krista khom kâiithoiin ai om ino nîng a ti.

¹⁷Khante, Krista khah kâiithoiin ai om ino a nitin chu, nin iiam khah chanlamboi nîng a ta, nin sualnaah khan nin lai om mai nîng a ti.

¹⁸Khangkan a nitin chu Kristaa in tâkhei khom khah an irmang tâk itina nîng a ti.

¹⁹Atûnlâi damsung banga Krista chungah tûngna nei ei nitin chu, mi murdi nêka lungsiatiom tak nîng ei ti.

²⁰Khannisela, Krista chu thina rithokin kâiithoiin ai om ngêt a nit, mithihei thoinôk maruaitu a nit.

²¹Miriam sikin thina a hong om a, miriam sik ngirin thoinôkna khom a hong iom a nit.

²²Adamah khan mi murdi an ithi angkah khan, Kristaah mi murdi inringin om an ti.

²³Nikhomsela, mahni zoro chitah kâiithoi nîng an ti. Amasa takin thoinôk maruaitu Krista chu nîng a ta, kha nungah khan, a zuang nôk tikah Ama mihei kâiithoiin om an ti.

²⁴Khanungchu, zoro mong hong tlung tâng a ti; kha tikin chu roirêlna murdihei neh, richamneina neh sinthotheina murdihei khah Krista khan ân boi vang nungin, Pathian ziangah, Pa ziang ngêiah khan Ram chu bâng tâng a ti;

²⁵â râlhei a ke nuaiah a sia mâkah chu, Krista khah ân lal mai rang pial a nit.

²⁶Irâl nungkhôn tak inêa om rang chu thina hih a nit.

²⁷Pathian Thubûn, “Pathianin a ke nuaiah tinrêng a sia riai,” a ti a. Khasikin, “Tinrêng,” iti hin, Krista ke nuaia tinrêng isehtu Pathian chu ihuap make iti a îlang a nit.

²⁸Khante, tinrêng Krista inlalna nuaiah isian a om tikah chu Naipa ngêi khom Pathian, tinrêng a nuaia sehtu nuaiah om a ta, Pathian chu tinrênga tinrêng ni tâng a ti.

²⁹Khangkah khan ni no seh, mithi rangtuma baptisma changhei khah ingkan im an tho rang? Mithihei khah kâiithoiin an om tlak no rangin teh, îtho rang sika anmani rangtuma baptisma an ichang ngai im ai nit?

³⁰Îtho rang sika eini khom hih dârkâr tina iṭi puma ei iom ngai hi?

³¹Suapuihei, ei Pumapa Jisua Kristaa nangni ki songna khah ichingin, “Nîn tin ki thi ngai,” ki ti a nit.

³²Miriam tho dân angkah ringota Efesia sarânghei khah risualpui ki nitin teh ki ta rangin im rifena a om ranga? Mithi kâiithoiin an om no rangin chu ṭhenkahei iti ngai angkan tho fâng ei ta, lei in rei u, naktûkah ei ithi zel rang pial im ki ta.

³³Ilêmin om no rei, “Rual ṭhanohein nunchan iṭha an isiat ngai.”

³⁴Ifel takkan har unla, insual khâi no rei. Nin lâia mi ṭhenkan chu Pathian riatna reng nei mak chei u; amahih nin izakna ranga kî ti a nit.

³⁵Nikhomsela, tukhôkin manih, “Mithihei khah ingkan im kâiithoiin an om rang? Ingkana takpum im an riput rang?” a ti a nit thei.

³⁶Nangmah mi intlo, nangmah ngêiin rinênga chi nî tu ngai khom hi a thi bak non chu inringin ṭoi ngai mak khate.

³⁷Khante, ni chi tu khom khah, a takpum la om rang kha tu mak che a, armal te khah ni tu ngai a, far mal manih, chimuru dang rimal manih a nit thei.

³⁸Khanniseh, Pathianin a nuamlam takkan takpum a pêk ngai, chimuru rimal tin an takpum seng kha.

³⁹Taksa murdi hih chi khatkah ni mak a; miriam taksa a dang a nit a, ramsa taksa a dang a nit a, iva taksa a dang a nit a, inga taksa a dang a nit.

⁴⁰Rivân takpum a om a, rinêng takpum khom a om a; nikhomsela, rivân takpum roinpuina a dang a nit a, rinêng takpum roinpuina khom a dang a nit.

⁴¹Inî roinpuina a dang a nit a, ithla roinpuina a dang a nit a, ârsihei roinpuina khom a dang a nit a, ârsi neh ârsi khom roinpuinaah chu ri-ang mak e.

⁴²Mithi thoinôkna khom hih khangkah khan a nit. Imon theia phûmin a om a, mon thei inoa kâiithoiin a om;

⁴³mêl iseh takka phûmin a om a, roinpui takka kâiithoiin a om; rât i no takka phûmin a om a, sinthotheina nei takka kâiithoiin a om.

⁴⁴Miriam tiang takpuma phûmin a om a, rithla tiang takpuma kâiithoiin a om a. Miriam tiang takpum a omin chu rithla tiang takpum khom ai om rang a nit.

⁴⁵Pathian Thubûn, “Miriam masa tak, Adama khah mi ring a hong nit tâk a,” a ti a. Adam nungkhôn tak kha chu ringna petu Rithla a nit.

⁴⁶Rithla khah a zuang iom bak ni mak a, taksa khah a zuang om bak a, kha nungah khan rithla khah a zuang iom a nit.

⁴⁷Adam masa kha chu ipila siam, rinênga rithoka mi a nit a; Adam inikna kha chu rivâna mi a nit.

⁴⁸Rinênga siamhei khan chu ipila siam khah an ang a, rivân mihei khan chu rivâna rithoka zuang rivân mi khah an i-ang a nit.

⁴⁹Khante, ipila siam miriam angna ei inei angkan rivâna mi angna khom la nei ei ti.

⁵⁰Suapuihei, “Taksa neh thisen hin Pathian Ram lua thei no nia, â mon thei hin mon thei ino khah lua thei ual no nih,” iti ki îsîr a nit.

⁵¹Thutak inril hih ringai rei: Ei rêngkan chu in vang no min e; nikhomsela, bekul nungkhôn â ring tikin chu voikarengin, mitkhapkâr vaka indanglamin om khai ei ti. Bekul â ring tikin chu mithihei kha mon thei inoa kâiithoiin om an ta, eini khom indanglamin om tâng ei ti.

⁵²

⁵³Hi â mon thei hih mon thei inoa thlengin om a ta, hi â thi thei khom hih thi thei inoa thlengin om a ti.

⁵⁴Khaangkan, hi mon thei hih mon thei inoa thlengin a om a, hi thi thei khom hih thi thei inoa thlengin a om tikin chu, Pathian Thubu-a: “Thina khah nênan â lem zoi tâk.

⁵⁵O thina, ne nêna khah takâm ai om tâk? O thina, ni tûr khah takâm ai om tâk?” iti thu riziak khah hong tlung tâng a ti.

⁵⁶Thina tûr chu sual hi a nit a, sual sinthotheina chu Dân thu hi a nit.

⁵⁷Nikhomsela, ei Puma Jisua Krista zâra nêna ne petu Pathian ziangah lômthu om riseh.

⁵⁸Khasikah khan, suapui lungthlunghei, idet takkan, inchâng rual inon om unla, Pumapa sin ṭhatnemringai takkan tho rei, nin sin sôlna rêng rêng Pumapaah khan â tlong chang tlak ngai mak iti nin riat a.