Read Biete 1 KORINTH 16 Bible Online

1 KORINTH 16 - Biete bible

1 KORINTH 16

¹Khante, Judai rama Pathian mihei ta ranga tholôm itho thu kha chu, Galatia rama koindanghei zianga thu kî pêk angkan nangni khomin lei tho sa rei.

²Pathiannî fengin nin lâia mi tukhomin ṭhatvurna nin dong lam angkah takin lei bûm unla, ki hong tikah tholôm rifuang a nang nona rangin.

³Khante, nin lungkhamna thilpêk ichôia Jerusalema fe rangin ki hong tikah tukhom a ṭhat nin iti tak lekhahei inchôiin tir ki ti.

⁴Ki fe sa a nang vângin chu munkan la fe rong ung.

⁵Makedonia ram ker fang a nang sikin, Makedonia ram rifang zoi bak ki ta nin ziangah hong ki ti.

⁶Nin ziangah chu isôt iankah ki châm khom a nit thei, phalbi sungkah khom a nit thei; taktiang khom ki fena takah nin ne san theina rangin.

⁷Atûna fe malam pâia nangni mu chu kî nuam ino a nit, Pumapan ṭha a tin chu isôt takkah nin zianga châm kî sabei a nit.

⁸Efesi khuaah hin Pentikos nî tenah chu châm ki ti.

⁹Hi khuaah hin ne doi itam takkah om khom sela, lampui rizat tak neh sin roinpui ki ta rangin a ir-ong a nit.

¹⁰Khante, Timothea hi nin ziang a hong tlung tenan, nin lâiah intûm loia a omna rangin lei lôm unla, keima angkah ngira Pumapa sin ṭhatnemringai takka sintu a nit.

¹¹Khasikin, tutên enkhûm no riseh. Ki ziangah rithlaringam takka a hong tlung theina rangin lei ṭangpui rei; suapui danghei neh munka a hong tlung ki lei itûng a nit.

¹²Ei suapuipa Apolova thu kha chu, suapui danghei neh munka nangni hong ithlo rangin ke thor mai a; nikhomsela, hi zoroa hong rangin chu a la înbei ino a nit.[12] Zoronṭum a mu kaneh chu hong a ti.

¹³Inrin ṭiankan om unla, iamnaah iding indet unla, ihâi tak neh irât takkan om rei.

¹⁴Nin isin murdi chu lungthlungnaa sin ni riseh.

¹⁵Suapuihei, nangni kî ngên a nit: Stefana neh a inmihei khah Akaia rama iamtu masa an nit a, Pathian mihei sin itho ranga ripeh mi an nit iti nin riat a;

¹⁶khangkana mihei neh an sinpuihei neh an sinthopuihei thu khah izôm rangin nangni kî ngên a nit.

¹⁷Khante, Stefana hei, Fortunata hei, Akaika hei an ihong hih kî lôm a nit; anni hin nin om no khom ilang loiin an ne siam a,

¹⁸nangni an înhar angkah takin kei khom an ne înhar a nit. Hingkana mihei hih nin ringaiinlut rang a nit.

¹⁹Asia rama koindanghei hin chibai nangni an bûk a; Akuila neh Priskili[13] neh an ina koindang inkhôm ngaihei hin chibai itam takkan nangni an bûk.

²⁰Hintaka suapuihei murdi hin chibai nangni an bûk. Ritum rithiangin chibai ribûk risak ngai rei.

²¹Keimah, Paulan chibai nangni ki bûkna hih keima kut ngêia ki irziak a nit.

²²Tukhom, Pumapa lungthlung ino chu vânisalin om riseh. Maranatha — Ei Pumapa chu a zuang e!

²³Pumapa Jisua lungkhamna chu nin ziangah om riseh.

²⁴Krista Jisuaah khan ki lungthlungna nin rêngka ziangah om riseh.