Read Biete 1 KORINTH 2 Bible Online

1 KORINTH 2 - Biete bible

1 KORINTH 2

¹Suapuihei, Pathian thutak rithup isîra nin ziangah ki hong lâiah khan, thu roinpui neh vârna roinpui neh hong mang e.

²Nin lâiah ki om khomah khan thil dang murdi ringil khaiin Jisua Krista ihêmdea a om thu bang khah iria kî tum ngai a nit.

³Khaangkan nin ziangah ki hong lâiah khan rât ino neh iṭia inthing pumin ki om a.

⁴Ki bâia rithoka riseina thu suak neh ki thusîrhei khom khah miriam vârnaa ithlêmna thu ni mak a, Pathian Rithla sinthotheinaa inriatna thu a nit ual.

⁵Khasikin, nin iamna khah miriam vârnaah ringat loia, Pathian sinthotheinaa ringat a nit theina rangin.

⁶Mi puitlinghei ziangah chu thuvâr kin isîr ngai; nikhomsela, atûnlâi mihei thuvâr hih ni mak a, hi rammuala roirêltuhei an inlalna rimang thiaihei thuvâr khom ni mak e.

⁷Pathian thuvâr rithup khah kin îsîr ngai a nit, thuvâr rithup, ei roinpuina ranga Pathianin rammual insiang maa a lei înkung thlâm tâk kha.

⁸Kha thuvâr khah hi rammual roirêltuhei rêng rêng hin reh mak e. Reh sela chu roinpuina Rêngpa khah hêmde no nih.

⁹Pathian Thubu-a, “Mita mu ngai ino neh ikuara reh ngai ino, Miriam lungrila lût ngai ino, Amah lungithlungtuhei ta ranga, Pathianin a înrifûk chu,” ai ti khah kin îsîr a nit.

¹⁰Eini chu kha thutak rithup khah Pathianin Rithlân a nen riat tâk a. Rithla khan tinrêng a suisuak ngai, Pathian thiltum inril tak khom.

¹¹Miriam lungril inthûk khah a sunga om ama rithla bang ti no khan tûm â reh ngai? Khangkah ngirin Pathian lungril inthûk khom Pathian Rithla bang ti no khan tutên reh mak e.

¹²Ei idong hih rammual rithla ni mak a, Pathian thiltlongpêkhei ei riat theina rangin Pathian zuk itir Rithla khah ei idong a nit.

¹³Khasikin, miriam vârna an înrisei ngai khah mang loiin, Rithla inriseina mangin thu kin îsîr ngai a nit, rithla mihei ziangah rithla tiang thutak khah kin rilfia ngai.

¹⁴Taksa mi khan chu Pathian Rithla rithoka thilpêk îte lôm ngai mak e, ama ta rangin chu intlona kah a nit; kha thilhei khah rithla banga ireh thei a nit sikin ai riat thei tlak ino a nit.

¹⁵Tukhom Rithla mi khan chu thil tinrêng a riat infel thei ngai a; khanniseh, amah chu tutên an iriatthiam thei ngai ino a nit.

¹⁶Pathian Thubûn, “Tûm Pumapa lungril iriaa? Tûm amah ân risei thei?” ai ti angkan. Keini chu Krista lungril kin irput a nit.