Read Biete 1 KORINTH 3 Bible Online

1 KORINTH 3 - Biete bible

1 KORINTH 3

¹Suapuihei, Rithla mihei zianga sîr angkan nin ziangah thu isîr thei mang a, taksa mi, Krista iamnaa naitesenhei zianga sîr angkan ki îsîr ngai a nit kha.

²Bu ni loiin, rinu tuiin nangni kî vâi a nit kha, bu nin la nêk thei no sikah khan; a nit, atûn khom nin lai nêk thei ino ngir a nit,

³taksa mi nin la nit mai sikin. Nin lâiah rinarsana neh ringona a la om ngai sikah hin taksa mi la ni maiin, rammual mi angkan nin lai om mai ni mak im a?

⁴Mi khatkan, “Kei chu Paula pôl ki nit,” mi dangin, “Kei chu Apolova pôl ki nit,” nin ti sung kârkah chu taksa mi nin lai nit ni mak im a?

⁵Khateh, Apolova hih tûm a nit a? Paula khom hih tûm a nit a? Pathian isom, nangni in-iamtuhei ringot kêng kin init; kha khom khah Pathianin a ne pêk lam angkah chita sin kêng kin init.

⁶Keiman chi ker the a, Apolovan tui a buak a; nikhomsela, Pathianin a înthuar a nit.

⁷Khaangkan, ân thuartu Pathian ti non chu chi rithetu neh tui ibuaktu chu îte ni mak e.

⁸Chi rithetu neh tui ibuaktu chu munkah an nit. An sintho lam angkah takin Pathianin loman peh seng seng a ti.

⁹Keini chu Pathian ta ranga munka sinitho kin nit a, nangmani hi Pathian loima chu nin nit. Pathian in sin khom nin nit sa.

¹⁰Pathianin thilpêk a ne ipêk imangin, in isintu thiamtak angkan keiman lungphûm ki phûm a, mi dangin a chungah in an sin a. Nikhomsela, mi tinin a chunga an sin rang tlia chitah ridîn riseh.

¹¹Pathianin lungphûm a lei iphûm tâk banah chu tutên lungphûm dang phûm thei no nih, kha lungphûm khah Jisua Krista hi a nit.

¹²Kha lungphûm chungah khan ṭhenkan rângkachakin manih, tangkaruan manih, lungmantamin manih, thingin manih, loisûlin manih, bupôlin manih in sin sela,

¹³mi tin sintho khah ilang tâng a ti. Krista nikhuah khan a înlang rang a nit, meiin ân lâr rang sikin, mei ngêi khan mi tin sintho khah im ai nit tak fia tâng a ti.

¹⁴Lungphûm chunga tu in sin khom a kâng non chu â sintu khan loman mûng a ti.

¹⁵Tu in sin khom a kângin chu, kha mi khan ichân a ta; khanniseh, amakah mâng mâng chu saninringin om a ti, meipui ata zôk angkah dôrin.

¹⁶Pathian in nin init neh Pathian Rithla nangmaniah a om iti nin iriat ino mani?

¹⁷Tukhomin Pathian in khah â siatin chu, kha mi khah Pathianin isiang a ti. Pathian in chu arthiang a nit a, kha in khah nangmani nin nit.

¹⁸Tutên mahni khâtin rilêm no riseh. Nin lâia tukhomin hi rammualah hin ivârin arben chu, a vâr titak theina rangin intlo chang bak riseh.

¹⁹Hi rammualin vârna ai ti hih Pathian mitmuah chu invêtna a nit sikin. Pathian Thubu-ah, “Pathianin mi vârhei chu anmani vârriletnaah ân ôk ngai,” iti riziak angkah khan.

²⁰Pathian Thubu dangah, “Pumapa khan chu mi vârhei ngaituana khah â tlong a nit iti a riat,” iti riziak a nit sa.

²¹Khasikin, tutên miriamhei hi song no riseh. Thil tinrêng hih nin ta korong a nit a;

²²Paula khom, Apolova khom, Petera khom; hi rammual khom, ringna khom, thina khom, thil om isa khom, thil la hong iom rang khom, a rêngkan nin ta rong a nit.

²³Nangni khom Krista ta nin nit a; Krista khom Pathian ta a nit.