Read Biete 1 KORINTH 4 Bible Online

1 KORINTH 4 - Biete bible

1 KORINTH 4

¹Keini hih Krista tirtôn, Pathian thutak rithup enkoltuhein ner ngai rei.

²Hintaka hin enkoltu chu mi iamom a nit ngêt rang a nit.

³Nikhomsela, nangmanin nin ne fiana neh miriam ngaituana dâna nin ne fiana khah ki ta rangin tepboi angkah a nit; ki khât khomin rifia ngai mang e.

⁴Ite ker demna rang nei mang e; nikhomsela, sêlnaboi ki nit tina ni ual mak e, ne fiatu chu Pumapa a nit ual.

⁵Khasikah khan Pumapa zuang mâkah chu, a zoro la tlung maah hin tute fia no rei; ani khan izînga thil rithuphei khah ivârah hong kêl isuang a ta, lungrila tumna rithuphei khom inlang sâng a ti. Kha tikin chu, mi tinin Pathian ziang ata inpâkna an mu rang chit khah mu tâng an ti.

⁶Suapuihei, hi thu, “Thu riziak khah khêl no rei,” iti ṭong omzia keimaniah hin nin risei theina rangin, kha thuhei khah nangmani ṭhatna rangin keimah neh Apolovaah hin kin irbel a nit. Nin lâia tutên khatkah isongin khatkah enkhûm no rei.

⁷Tûm mi dang nêka danglam bîka nang isiam? Â tlonga nî dong ti no im nî nei? Ni dongin teh îtho rang im dong ino angkana ni irsongpui hi?

⁸Nin irsam tinrêng nin inei tâk mani? Nin irchong tâk mani? Keimani ṭang loiin rêng nin ichang tâk mani? Rêng chang thei titak unla ki nuam vang na, nangmani zârin keini khom kin înlal sa rang pial na!

⁹Pathian hin keimani tirtônhei hih ithi ranga inkung angkan rinêng neh rivâna vântirtônhei neh miriamhei murdîn enhoia an mang rangin, a nungkhôn takah a ne isian ki be ngai.

¹⁰Keini chu Krista sikin mi intlo kin nit a, nangni chu Krista zârah khan mi vâr nin nit. Keini chu rât mang ung a, nangni chu nin rât a; keini chu mihei enkhûmin kin om a, nangni chu chôiinrisângin nin iom a nit.

¹¹Atûn ten khomah hin voniṭâm neh tui rihâlin kin om a, silibom kin risam a, mi kuttum kin tuang a, omna bulbâl nei mang ung a.

¹²Mahni kuta isôl takka sin ithon fâk kin zong a, mîn vâni an ne sâmin ṭhat kin vur a, mîn an nuam an ne lon kin tuang ngêi ngêi a.

¹³Mîn an ne êron he dâiriam kan kin sâm ngai a. Atûn ten khomah hin hi rammual nimnok, rinênga nimnok buk angkah kin nit.

¹⁴Hi thu hih nin izakna ranga ki irziak ni mak a, ki nai lungthlunghei angkana nangni inrisei ki nuam sika ki irziak a nit.

¹⁵Kristaah khan nangni inriseitu sîngkah nei khom unla, pa chu khatkah bang nin inei a nit. Keimah hi Kristaa nin pa, Thurchi Ṭha hong ithluna nangni neitu chu ki nit.

¹⁶Khasikin, keimah ne enton rangin nangni kî ngên a nit.

¹⁷Hi sikah hin, Timothea, Pumapaa ki nai lungthlung neh iamom khah nin ziangah ki hong itir a nit. Ani khan Krista neh rizoma ringna thara ki omdân, ram tina Koindang tinhei ki înrisei ngai angkana hi nangni inreh nôk a ti.

¹⁸Nin zianga hong khâi ino rang angkana ner ngaiin mi ṭhenkah chu nin irsong a nit.

¹⁹Nikhomsela, Pumapan ṭha a tin chu nin ziangah hong viak tâng ki ti; kha tikin chu hi mi risonghei hih an ṭong bang ni loiin, im sinthotheina an inei khom reh thei tâng ki ti.

²⁰Pathian Ram chu ṭong banga ringat ni mak a, sinthotheinaa ringat a nit.

²¹Im nin nuam ual? Tôkmol neh nin ziangah kî hong im nin inuam, anitnole, lungthlungna neh ringaichînna lungril riputin im?