Read Biete 1 KORINTH 5 Bible Online

1 KORINTH 5 - Biete bible

1 KORINTH 5

¹Nin lâiah riditna ṭhano a om iti thu thang ai om a nit; khangkah dôra riditna ṭhano khah chu Jentailhei lâiah khom om ngai mak e. Nin lâia mi khatkan a puingâksia a zâlpui ngai iti khom ki lei riat a.

²Lungnat a om titak iti rang nin nit a, ingkan im nin lar song mai thei tlia? Khangkana thil ithotu khah nin lâi ata nin ûmisua rang ni mak im a?

³Nin lâiah taksan ṭang no khom inlang rithlân chu kî ṭang a nit; khangkana thil ithotu chungchângah chu nin lâia om angkah takin ei Puma Jisua rimingin kî ngaitua infel zoi tâk a nit.

⁴Nin inkhômnaah keimah rithlaa nin lâia ṭang sa angkan, Pumapa Jisua thuneina mangin,

⁵kha mi khah Pumapa Nikhuah arthla saninring a nit theina rangin, a takpum inrimang rangin Soitana kutah nin pêk rang a nit.

⁶Nin irpâk hih idik mak e. “Chol iroiten baiphit pumpui khah â thoi zit ngai,” iti ṭong khah nin iriat ino mani?

⁷Chol pol ino nin init angkah takin, ibai thliam ithar nin hong nit theina rangin chol ilui khah khâi pai rei. Ei Kalkan Kûtna rang Krista ngêi khah ilanin a om tâk sikin.

⁸Khasikin, Kalkan Kût ruai iṭhêng ei ti u, nunsiatna neh sualna chol ipol ibaiin ni loiin, rithiangna neh dikna chol ipol ibaiin iṭhêng ei ti u.

⁹Ki lekhathonah khan ridi song mihei ripôlpui loi rangin nangni kî ti a nit kha.

¹⁰Hi rammuala ridi songhei manih, kuatinkamhei manih, lepinru songhei manih, mirmil ibiahei manih, pôl tlak no rei kî ti ni mak e; khangkan ni sela rammual nin mâk tlak ai nang rang a nit.

¹¹Ki ti tak chu iamtu, suapui riming riputa ridi songhei, kuatinkamhei, mirmil ibiahei, ringo songhei, zu du mihei, inru songhei khah pôl no rei iti hih a nit. Khangkana mihei neh khan chu fâknêk khom munkan zong no rei.

¹²Putiang mihei roi chu keiman ki rêl rang nang mak e. Pathianin rêl a ti. Khanniseh, nin lôm lâia mi chu nin rêl rang ni mak im a? Pathian Thubûn, “Mi sual khah nin lôm lâi ata khâi pai rei,” ai ti angkah khan.