Read Biete 1 KORINTH 7 Bible Online

1 KORINTH 7 - Biete bible

1 KORINTH 7

¹Nin thu riziak chungchâng kha chu: Ipa ta rangin nupang tôn ino ai ṭhat a nit. [3]

²Nikhomsela, ridisia a om ngai sikin ipân nupui bîk nei chit sela, nupang khomin pasal bîk nei chit riseh.

³Pasalin a nupui zianga a sin rang khah sin sela, khangkah ngirin nupui khomin a pasal zianga a sin rang khah sin riseh.

⁴Nupui khan ama takpum chungah richam nei mak a, a pasal khan thu ai nei lem a nit; khangkah ngirin pasal khomin ama takpum chungah richam nei mak a, a nupui khan thu ai nei lem a nit.

⁵Ṭongṭai ranga nin ripêk theina ranga itôiteka rangin ṭhat nin ti seng seng non chu, nin nupa nitna riphial risak no rei; kha rizoiin chu nin omdân ngaingirin om nôk zel rei; khanonchu, ridîn zoi no sikin Soitanan nangni â thlêm duai lôiin.

⁶Hi thu hih thupêk angkana sîr ni mang a, phalna thu angkana sîr ki nit.

⁷A dik takkan chu, mi murdi keima angkah hin om riai sela kî nuam a nit. Nikhomseh, mi tinin Pathian ziang ata thilpêk bîk ei dong chit a, khatkan lamkah tiang, a dangin lam dang tiang.

⁸Khante, in la nei inohei neh numeihei chu keima angkan ithlîng vatkan om sela a ṭhat.

⁹Nikhomsela, ridîn theina an nei non chu nupui pasal nei riseh, ihur takka om nêkan chu rinei a ṭhat ual.

¹⁰In inei tâkhei chu ki thu ni loiin, Pumapa thupêk nangni ki îril a nit: Nupuiin a pasal inṭhenpui no riseh.

¹¹Ân ṭhenpui tên tên tâk le chu pasal dang nei khâi no riseh, anitnole, a pasal neh ngir ribu nôk riseh; pasal khomin a nupui mah no riseh.

¹²Mi danghei ziangah chu Pumapa thupêk ni loiin, keiman isîr rang ki nei: Iamtu khan sanong nupang khah nupuiin nei sela, a nupui khan a zianga om mai a nuamin chu ân ṭhenpui rang ni mak e.

¹³Khante, iamtu nupang khomin sanong ipa khah pasalin nei sela, a pasal khan a zianga om mai a nuamin chu ân ṭhenpui rang ni mak e.

¹⁴Pasal sanong khah a nupui zârin inrithiangin a om a, nupui sanong khom khah a pasal zârin inrithiangin ai om a nit. Khangkan ni no seh chu nin naihei kha rithiang no nih; khanniseh, Pathian mitmuah an irthiang mai a nit.

¹⁵Nikhomsela, sanong khan inṭhen a nuamin chu inṭhen zel riseh. Khangkah thu-ah khan chu Kristian pasal manih, nupui manih, irên ni khâi mak e. Pathian khan chu ringeia om rangin a ne ikoi a nit.

¹⁶O nupui, ni pasal ni saninring rang neh rang no ingkan im nî riat hi? O pasal, ni nupui ni saninring rang neh rang no ingkan im nî riat hi?

¹⁷Îkhom ni sela, tukhom Pumapan a zianga thilpêk a pêk lam tak neh Pathianin a koi lam takkan om riseh. Khangkana om rangin koindang tin ki îril ngai a nit.

¹⁸Sertan tâk khan Pathian koina â ham tâkin chu, a sertan risin khah pai no riseh; sertan ino mi khomin Pathian koina â ham tâkin chu, ser a tan rang ni khâi mak e.

¹⁹Pathian thupêk izôm ti no chu seritan neh tan ino hi îte ni ual mak e.

²⁰Mi tin ikoia an om lâia an nit lam angkah khan om mai riseh.

²¹Suak ni nit lâia ikoi im nî nit? Lungkâng risak no roh; zalen thei ni nitin chu zalen zel roh.[4]

²²Suaka om Pumapan ai koi chu Pumapa isua suak a nit a, khangkah ngirah khan suak nino Pumapa ikoi khom khah Krista suak a nit.

²³Mana richo nin nit tâk; khasikin, miriamhei suak chang khâi no rei.

²⁴Suapuihei, mi tin ikoia nin om lâia nin nit lam angkah khan Pathianah om mai rei.

²⁵Lênglâihei chungchânga nin thu riziak chu Pumapa ata thupêk chu îte nei mang e; nikhomsela, a lungkhamna zâra Pumapa ringaia iiam tlâk mi ki nit sikin ker ngaidân isîr ki ti.

²⁶Atûn lâi zoro khir ingaituan, mi a om ngaingira ai om mai hih a ṭhat ki ti.

²⁷Nupui inei tâk ni nitin chu iṭhen tum no roh; Lênglâi ni nitin chu nupui zong no roh.

²⁸Khannisela, nupui ni nei le khom thônsual mak che; nungâk khomin pasal a nei le khom thônsual mak e. Nikhomsela, nupui pasal ineihein chu dengtheina itam takkah sik an ti, keiman chu amakhah nangni inzôk kî nuam a nit.

²⁹Suapuihei, ki ti nuam tak chu hih a nit, zoro hih a tôi tâk; atûna rithokin chu nupui ineihei khah nei ino angkan om sela,

³⁰lusûnhei khah sûn ino angkan om sela, ilômhei khah lôm ino angkan om sela, archohei khan nei ino angkan om sela;

³¹hi rammual thila rimanghei khah rimang ino angkan om sela kî nuam a nit. Hi rammual omdân hih armang thiai a nit.

³²Lungkâng nei loia nin iom kî nuam a nit. Nupui nei ino khan chu Pumapa inlôm theina rang ingaituan Pumapa sin khah lungril takkan a ngaitua ngai a.

³³Khannisela, nupui inei khan chu a nupui inlôm theina rang ingaituan rammual thilhei a ngaitua ual ngai a;

³⁴kâirilângin an iom ngai a nit. Pasal inei neh nungâk ithlîng [5] khom khah ri-ang mak e. Pasal nei ino khan chu a takpum neh arthlaah khan rithiang takka a om theina rangin, Pumapa tiang thil khah a ngaitua ngai; khannisela, pasal ineiin chu a pasal inlôm theina rang ingaituan rammual thil khah a ngaitua ngai.

³⁵Amakhah nangmani ṭhatna ranga kî ti a nit. Nin chungah dân ikhir ikhang kî tum ni mak a, nunchan iṭha taka nin om theina rang neh, Pumapa sin khah buai loia nin sin theina rangin ki îsîr a nit.

³⁶Mi tukhomin a nupui hual [6] chungah thôn dik inoa arriata, kha nungâk khah lêngiṭûl rang tâk a nit a, kha tlangvâl khan ai nei ngêt a ṭûlin a riatin chu, a lungdo angkah takin inrifûk sela, nei riseh, thil thônsual mak e.

³⁷Khannisela, a ṭûl a ti noa, kha nungâk khah nei loi ranga a lungril idet takka a sinsiam a, a nuamlam isôi theitu khan chu, a nuam lam angkana ai tho khah a ṭhat a, a nupui hual ai nei ino khah ai thôn ṭhat a nit.

³⁸Khaangkan, a nungâk hual nupuia neitu khan a thôn ṭhat a; nikhomseh, â nei inotu khan ai thôn ṭhat ual a nit.

³⁹Nupui khah a pasal ring kârkah chu a pasalah ikhuap a nit a; nikhomsela, a pasal a thi tâkin chu ai nuam nuam nei thei a ti; khanniseh, Pumapaa om mi a nit rang a nit.

⁴⁰Nikhomsela, keima ringai dânin chu, nei loia a om ngaia ai om maiah khan a ham ṭha ual a ti. Kei khom Pathian Rithla chu ki neiin ki irbe a nit.