Read Biete 1 KORINTH 9 Bible Online

1 KORINTH 9 - Biete bible

1 KORINTH 9

¹Zalen ni mang im a? Tirtôn ni mang im a? Ei Pumapa Jisua kî mu tâk ni mak im a? Nangmani khah Pumapaa ki sintho râhei ni mak chei im a?

²Mi danghei ta rangin tirtôn ni kher no khom inlang, nangmani ta rang bîkin chu ki nit. Pumapa mi nin init hih ki tirtôn nit richikna chu a nit.

³Mihein an ne sêlin ki sâmna chu hingka hin a nit:

⁴Kin sin thonaah hin fâknêk ingên rangin thu kin inei ino mani?

⁵Tirtôn danghei neh Pumapa suapuihei neh Petera hei angkah khan ken zinnaah iamtu nupang kî ṭhui thei ino bîk mani?

⁶Khateh, Barnaba neh keima bang im mahni kuta sinithoa rifâ bîk rang?

⁷Sipai tu ngân im mahnia rifâ chopa irâl idoi ngai an om im? Tu ngân im â râ khom fah loiin grep rikul isiam ngai? Tûm a dût fah loiin ran lôm ivâi ngai a?

⁸Kha thuhei khah miriam thlîr dâna rithoka sîr ni mang e. Dân thu khomin kha ngir khah a îsîr ni mak im a?

⁹Mosia Dân lekhabuah khan, “Serâtchal khan bu a chîl lâiin a mûr khit no roh,” iti riziak a nit. Pathianin serâtchal rang banga ai ti mani?

¹⁰Eimani rang piala a îsîr ai nit ual ino mani? A nit, eimani rang piala riziak a nit khah. Âl ikâitu khan tûngna neiin âlkâi sela, bu chîltu khomin rangtum idong sa rang itûngin chîl riseh.

¹¹Keimanin nin lâiah rithla tiang thil kin tu tâkin chu, nin ziang ata taksa tiang thil ât sa ta khom unlang rikhêl rai nîng a tîm a?

¹²Mi danghei ilua manin hi taksa thilhei hih nin ziang ata itûng rangin richamneina an neiin teh, keimani vângin teh richamneina lian ual kin inei ni mak im a? Nikhomsela, kha richamneina khah kin imang ino a nit. Krista Thurchi Ṭha lamchâi kin sak nona rangin tinrêng kin ituang ngêi ngêi a nit.

¹³Tempila sinithotuhei khan Tempila rithokin an fâk rang an mu ngai a, mâichâma ribôlna lantuhei khomin mâichâma an thil lana rithokin rangtum an nei ngai iti nin iriat ino mani?

¹⁴Khangkah takin Pumapa khan Thurchi Ṭha hih Thurchi Ṭha inpuangtuhei rifâna rangin a înkung a nit.

¹⁵Nikhomsela, keiman chu khahei khah khatkah khom kî mang ino a nit; atûn khomah hin ki chungah khangkan nin thona ranga ki irziak ni tlak mak e. Tukhomin kî song hih chanlamboia an isiam nêkan chu thi zel inlang ki ta rangin a ṭhat ual.

¹⁶Thurchi Ṭha inpuang khom inlang risong thei ni mang e. Thurchi Ṭha hih isîr ngêt ranga idânde kêng kî nit. Thurchi Ṭha hih isîr non lang chu ki chung ân khôk rang vang na!

¹⁷Hi sin hih keima nuam rithlangna sika kî sin ni sela chu thalo tûng thei ki ti; khannisela, mahni ditrithlangna sika sîr ki nit non chu Thurchi Ṭha enkolna sin hih inkol kî nit a nit.

¹⁸Khate, ki loman chu im ai nit rang tâk? Thurchi Ṭha inpuangtu ki nit sika kî ngên thei ngên loia, â tlonga Thurchi Ṭha ken puang theina hi a nit.

¹⁹Tute suak chu ni no khom inlang, mi a tam thei dôrah ki lâk lût theina rangin mi murdi suak kî chang ngai a nit.

²⁰Judahei ki lâk lût theina rangin Judahei lâiah chu Juda angkan ki om a. Dân nuaiah om no khom inlang, Dân nuaia omhei ki lâk lût theina rangin an lâiah Dân nuaia om angkan ki om ngai a.

²¹Dân nei inohei ki lâk lût theina rangin Dân nei inohei lâiah Dân nei ino angkan ki om ngai a. Amakhah Pathian dân zôm ino ni loiin, Krista dân izôm ngit mai pumin a nit.

²²Rât inohei ki lâk lût theina rangin rât inohei lâiah rât ino angkan ki om ngai a. Ingka lam takin mani lua, mi ṭhenkah ki saninring theina rangin mi murdi ziangah lam dang dangin kî om ngai a nit.

²³Ṭhatvurnaah khan rangtum ki nei sa theina rangin Thurchi Ṭha sikin tinrêng khah kî sin ngai a nit.

²⁴Itlânrisiakhei khah an rêngkan an itlân a; nikhomsela, khatkah bangin loman a mu ngai iti nin iriat ino mani? Loman nin mu theina rangin khangkah takah khan itlân rei.

²⁵Itlânrisiaknaa ṭang ranghein chu lam tinrêngah an ridîn ngai. Anmanin chu rênglukhum iseh thei imu rangin an risiak a, eimanin chu rênglukhum seh thei ino mu rangin ei irsiak a nit.

²⁶Kha sik takah khan kei khom itin ngit ineiin ki itlân ngai a nit. Takboi bang richûm loiin keimah neh keimah ki irchûm ngai a nit.

²⁷Ki takpum hi ke sôi a, kî thunun ngai a nit; khanonchu, mi danghei ziangah Thurchi Ṭha ken puang nungin keimah tluk loiin om duai ki ti.