Read Biete 2 KORINTH 1 Bible Online

2 KORINTH 1 - Biete bible

2 KORINTH 1

¹Paula, Pathian lungdoa Krista Jisua tirtôn neh ei suapuipa Timothea khan, Korinth khuaa Koindanghei neh Akaia ram pumpuia Pathian mihei murdi chibai kin bûk.

²Pathian, ei Pa neh Pumapa Jisua Krista ziang ata lungkhamna neh ringeina nin ziangah om riseh.

³Ei Pumapa Jisua Krista Pa neh Pathian, lungkhamnaa sip, thlangamna petu Pathian ziangah khan lômthu isîr ei ti u.

⁴Pathianin eimani thlangam a ne sakna ngêiah khan, dengtheina tinrêng ituanghei thlangam ei sak theina rangin, ani khan ei dengthei tuang murdiah thlangam a ne sak ngai.

⁵Krista tuangnaheiah rangtum itam takkah ei inei angkan Krista zârin ei thlangamna hi ai sipilêt a nit.

⁶Dengthei kin tuangna hi nangmani thlangamna rang neh saninringna rang a nit; rithlaringama kin omin chu, nangmani thlangamna rang a nit a, amakhah nangni khomin dengtheina kin lei ituang angkana khah idiar takka nin tuang theina ranga a nit.

⁷Dengthei ne tuangpuituhei nin init angkan thlangamna ne changpuitu rang khom nin nit iti kin riat a; khasikin, nangmania kin tûngna khah inîng tlak ngai mak e.

⁸Suapuihei, Asia rama dengtheina kin itong thu khah nin iriat ino nuam mang e; khangkana tuang zoi loi rang puakrikin a ne del a, la ring rang tûngna rêng rêng kin nei khâi nozia kha.

⁹Thina ringot mabâk tâkin kin ririat a; nikhomsela, amakhah mahnia ringat loia Pathian, mithi kâiithoitu-ah khan kin ringat thei ualna rang a lei nit.

¹⁰Ani khan khangkana thina inrît tak ata khah a ne san isua tâk a, ne la san isua nôk a ta; ne la san isua nôk mai a ti iti amah-ah khan kin tûngna kin ringat a;

¹¹nangni khomin ṭongṭaiin ne ṭangpui unla, mi tam takka ṭongṭaina sikin Pathian lungkhamna dong kin ta, keimani sikin mi tam takkan Pathian ziangah lômthu la sîr an ti.

¹²Amahih kin isong a nit: Miriam vârna ni loiin, Pathian lungkham sinthotheina sik lemin Pathian mitmuah rithiangna neh dikna neiin, hi rammualah hin kin châng ngai a, nangmani lâiah vâng chu khangkah khan kin ichâng nôk ual ngai a nit iti kin sia neh ṭha riatna khomin a ne iriatpui a nit.

¹³Kin lekhaah khan, nin tepa, nin iriatthiam ino rang thu îte riziak mang ung a, la rethiam riai nin ti kin itûng a nit.

¹⁴Atûn la rethiam riai no khom unla, ei Pumapa Jisua Nikhuaah kin isonghei nin init rang angkah takin nin isonghei kin init rang a nit.

¹⁵Amakhah ki iam ngit sikin lungkamna bâk inikah nin dong theina rangin, nin zianga hong masa kî nuam a nit.

¹⁶Makedonia ramah ki fe malamin nangni hong ithlo a; khanchu, Makedonia rama rithoka ki hong kîr nôk tiang khom nangni hong ithlo nôk kî tum a nit; Judai rama ken zinna rangah khan nin ne ṭangpui theina rangin.

¹⁷Hi ki tumna sikah hin tumna det ino mi angkan ki îlang mani? Anitnole marangṭhat lungbôk sika a kârah, “A nit, a nit,” itia a kârah, “Ni mak, ni mak,” iti pipai kî nit im ai nit?

¹⁸Pathian chu ai iamom angkan nin zianga ki ṭonginkung khom khah a kârah, “A nit,” neh a kârah, “Ni mak,” iti angkah hi ni mak e.

¹⁹Jisua Krista, Pathian Naipa, a thu keimah neh Sila neh Timothean nin zianga kin îsîr khah, “A nit,” neh “Ni mak” a nit seng seng no sikin. Kha nêkan amah-ah khan, “A nit,” bang ai om a nit.

²⁰Pathian ṭonginkunghei murdi chu amah-ah khan, “A nit,” iti korong a nit. Khasikah khan kêng eimani sika Pathian a roinpuina rangin Jisua Krista zârin, “Amen,” ei iti ngai a nit.

²¹Khante, Kristaa keimani neh nangmani nen dettu neh riak nen rithutu chu Pathian a nit.

²²Ama ta ei nitna risinsiana ne petu neh ei lungrila khâmna Rithla ne petu khom Pathian ngir khah a nit.

²³Ker thla chunga riatpuitu rangin Pathian kî koi a nit, nangmani zua rangin a nit Korinth khuaah kî hong khâi ino a nit.

²⁴Nin iamna chungah richaminei tum mang ung e, iamnaah khan nin iding indet iti kin riat sikin nin lômna rangin nangmani neh munkan sin kin itho kêng ai nit.