Read Biete 2 KORINTH 10 Bible Online

2 KORINTH 10 - Biete bible

2 KORINTH 10

¹Khante, “Mâiritonga dâi riam, râlsâia lum rak,” nin iti keimah Paula ngêi hin, Krista lungrivuaina neh nunhoina chingin nangni kî ngên a nit.

²Taksa taka oma ne bêtuhei chungah ihâi takkan ki om ngam iti ki riat a, nin ziangah ki zuang tikin khangkana ki om a nang nona rangin nangni kî ngên a nit.

³Rammuala om chu kin nit ngêt a; nikhomsela, rammual lungril riputin doi mang ung e.

⁴Ridoinaa râlthluk kin imang hih rammual thil ni mak a, kulpui idet tak ṭhet theina Pathian râlthluk rithalian tak kha a nit.

⁵Risêlnahei neh Pathian riatna idan ranga ngaidân risâng taka siamhei murdi khah kin ṭhet a, ngaituana tinrêng Krista thu zômna suakah kin iṭhui ngai a nit.

⁶Khante, thu zômna nin nei rikip tenan a la ôi inohei denginthei rangin kin irsiam ṭian a nit.

⁷Chungthua tianga â lang dân ringotin thil nin thlîr a. Tukhôkin manih Krista mi ni ual bîkin arben chu a khâtin risût nôk riseh; ani khah Krista ta ai nit angkah takin keini khom kin init sa kêng ai nit.

⁸Nangni ṭhetna rang ni loiin, nangni indingna ranga Pumapan richamneina a ne ipêk hih ki lei isong tet a nit le khom izak mang e.

⁹Lekhathona nangni ṭhi tum angkana lang kî nuam ino a nit.

¹⁰Mîn, “Paula lekhathon chu a natin a khir a, amah ei mu titakin chu miriam rizal ngêi, a ṭonghei khom isit iom tak a nit,” an ti a.

¹¹Khangkana lunginṭong ineihei khan amahih reh riseh; mun dangah kin oma kin lekhathona kin hong iti angkah takah khan, nin ziangah kin hong tenan khom kin itho ngêt rang a nit.

¹²A dik takkan, mahnia ripâka risâng oka ribehei lâiah khan chu ritep ngam mang ung a, anmani neh richak ngam mang ung e. Mahni rikhîna rang anmani nâk nâkin bituk an siam a, amakhan mahni neh mahni an rikhî a, an invêt vang na!

¹³Khannisela, Keini chu kin rikhîna khêl tiang chu risongpui no ning ung, Pathianin bial a ne iten pêk, kha rikhîna sung bangah khan risong kin ti, nangmani khom a îhuap sa a nit.

¹⁴Kin bial îhuap ten nin nit sikin Krista Thurchi Ṭha nin ziangah kin zuang ithlun a, a khêl tiang chu kin ife no a nit kha.

¹⁵Khasikin, Pathianin a ne iten pêk bial bana mi danghei isin khah song mang ung e. Khanêkan, nin iamna hong thuar a ta, thil ilian ual khom nin lâiah isin la nîng a ta, kin bial khom la hong rizat mai a ti kin itûng a nit.

¹⁶Khanchu, nin ram khêl tiang khom Thurchi Ṭha hih lân puang mai kin ta; nikhomsela, mi itho sai chu risongpui no ning ung e.

¹⁷Nikhomsela, Pathian Thubûn ai ti angkan, “Â song kan Pumapa chu song riseh.”

¹⁸Mahnia risîr inṭhahei khan inpâk lo ngai mak a, Pumapan ai chôiinrisânghei khan inpâk an lo ngai.