Read Biete 2 KORINTH 11 Bible Online

2 KORINTH 11 - Biete bible

2 KORINTH 11

¹Ken tlôk viatnaah hin nangmanin nin ne bil thiam ki nuam vang na! A nit, â bil khom nin neh ithiam a nit.

²Pasal khatkah, Krista ngêi kha nangni ki hual pêk tâk a, a ziangah nungâk rithiang angkana nangni ki lan theina rangin, Pathian thîknan kêng nangni kî thîk ai nit.

³Irûlin Evi milaka ai lêm angkah khan, Krista tianga nin lungril rithiang neh iṭha tak khah ingkah khôk takin manih nangni innim pêk an ti iti kî ṭi a nit.

⁴A thu kin îsîr ngai nino Jisua dang isîra zuang kha nin lei lôm a, rithla danglam nin lai dong ngai ino kha nin ipom thei a, nin îpom tâk nino Thurchi Ṭha dang khom kha nin lei lômin nin lei îham thei riai chu a nit hiteh na!

⁵Kha nin tirtôn iliantakhei khah îlamah khom anmani tluk iloi rangin ritûng mang e.

⁶Thusîrah chu ṭong mang thiam ino khom ki nit thei; nikhomsela, riatnaah chu khangkah khan ni tlak mang e; amakhah lam tinrêngin tiklâi khomin nangni ki înlang pêk tâk ngai a nit.

⁷Anitnole, nin ziangah Pathian Thurchi Ṭha ki zuang isîr lâiah khan îte thil nangni ngên mang e; nangni chôidomna rangin keimah ki irniam kha kî thônsual tina mani?

⁸Nin lâiah sin ki tho theina rangin koindang danghei ata sanna ki lâk a, anni khah ki înhek ngai a nit.

⁹Nin zianga ki om lâiah khan ker samna thu-ah tute nangni inbuai mang a; ki irsamhei chu Makedonia rama rithoka suapui izuanghei khan an ne zuang chôi pêk mai a; phurik nangni chang pêk loi rangin ki tum ngit ngai a, itum khom la tum mai ki ti.

¹⁰Keimaah Krista thutak a om sikah hin hi ker songna hih Akaia ram pumpuiah khom tutên nen boi pêk thei no nih.

¹¹Îtho sika mani? Lung nangni ki thlung no sika mani? Lung nangni ki thlungzia chu Pathianin a riat.

¹²Kin sintho angkah taka sin ngai inia risîr nuamhein isong rang îte an nei nona rangin atûna ki sin ngai lam angkah taka hin kî sin mai rang a nit.

¹³Kha mihei kha chu tirtôn dik ni mak, tirtôn lemhei, mi lêm itum, Krista tirtôn dikhei angkana lang ranga risiam an nit.

¹⁴Amakhah rikhêl mak e. Soitana khom ivâr tirtôn angkana lang rangin arsiam ngai khate.

¹⁵Khasikin, Soitana sinthotuhei khom felna tirtôn angkana lang ranga risiam khah intak mak, khahei mongna rang kha chu an sintho khan lân lang a ti.

¹⁶Hang ti nôk ki ti, tutên intlon ne be no riseh. Nikhomsela, nin ne be a nit le khom, ichînteka lua ker song theina rangin intlo angkan ne ham rei.

¹⁷Ki îsîr hih Pumapa thu angkan ki îsîr ni mak e; intlo angkan ki thil risongpui hih ki îsîr rang a nit.

¹⁸Mi itam takkan rammual thil an risongpui ngai sikin kei khomin hang risongpui hi ki ti.

¹⁹Nangni chu mi vâr nin nit a, intlohei khom ilôm takkan nin bil thiam a.

²⁰Mîn suakin nangni siam khom sela, nangni fân rimang khom sela, nangni lêm khom sela, nangni enkhûm khom sela, nin mâiah nangni ben khom sela, nin tuang riai thei a.

²¹Khangkana tho rangin kin lei ngam no sikin izak iom kî ti a nit. Intlo ṭongin hang ṭong inlang; tukhomin îlamah khom an risong ngamin chu kei khomin ki ngam.

²²Hebrai mi an init mani? Kei khom ki nit. Israel mi an init mani? Kei khom ki nit. Abrahama richi an init mani? Kei khom ki nit.

²³Krista somhei an init mani? Intlo ṭongin hang ṭong inlang, anmani nêkan ki nit nôk ual, â sin isôl ual tak ki nit a, tâng inah ke tâng rizing ual a, ito lak ki tuang intam ual a, ithi zel theina khom ki tong intam ual.

²⁴Judahei tho dân angkana voi sômilikah tluk tak inoa to ṭum ringakah ki tuang a,

²⁵Rom.mihein ṭum ithumkah lâidângin an ne zêp a, ṭumkah lunga dêngin ki om a. Ṭum ithumkah rikuang siatna ki tong a, ṭumkah sûnkah neh zânkah tuikhanglianah ki om a.

²⁶Ken zinnaah voi itam takkah vadunga ṭiom hei, suammihei sika ṭiom hei, ki chipui Judahei lâia ṭiom hei, Jentailhei lâia ṭiom hei, khopui sunga ṭiom hei, ramchâra ṭiom hei, tuipuia ṭiom hei, suapui lemhei ata ṭiom hei ki tong ngai a.

²⁷Ki sinthonah ki sôl rai sika in iloia ki om tik a tam ngai a; voniṭâm neh tui rihâl ki tuang ngai a, bu ngeia ki om zoro a tam a, ribîkna ki mu no tik neh puansil ke vâi tik a tam ngai.

²⁸Kha ki îsîr tâkhei banah khan, koindanghei murdi ki ngaituana, nîn tina ne del mai hi a om sa a.

²⁹Mi rât inohei kî tuangpui ngai ino mani? Mi an ilîrin ki irvoi ngai ino mani?

³⁰Risongpui ngêt rang ki nitin chu ki rât nona tiang thilhei hi a nit kî song ual rang.

³¹Pumapa Jisua Pathian neh Pa, kumkhuantluanga inpâka omah khan milak ril mang e iti a riat.

³²Damaska khuaah khan Rêng Areta nuaia roirêltu khan ne man rangin Damaska khopui khah ân rung a.

³³Nikhomsela, kulpui bang tukvera rithokin kokin an ne ṭhum a; khanchu, kha roirêltu kuta rithokin kî zôk tâk a nit.