Read Biete 2 KORINTH 12 Bible Online

2 KORINTH 12 - Biete bible

2 KORINTH 12

¹Arfena om no rang khom seh, ki hang irsong rêng rêng rang a nit. Ki zianga Pumapa inlârna neh a thu phuang ki hang îsîr rang a nit.

²Kristaa mi khatkah ki riat a, ani khah kum sômlei kum ilika thleng tâkah khan rivân ithumna takka khin zuk ilan a om a. Amakhah taksan manih ai om reh mang a, taksa ninon manih ai om khom reh mang e, Pathian bangin a riat.

³Kha mi khah Paradisah zuk ilan a om a, khah khom khah taksan im ai nit, taksa ninon im ai nit reh mang e, Pathian bangin a riat; kha mi khan miriamhei isîr rithiang ino neh îsîr thei phâk ino thu a riat iti ki riat.

⁵Khasikin, kha mi khah song ki ti; nikhomsela, ki rât nonahei ti no chu keimah chu risong no ning e.

⁶Risong nuam khom nin lang, intlo ni no ning, thudik tak ki îsîr rang a nit a; khanniseh, risong no ning e, khanonchu, mîn an ne mu lam neh keima rithoka thu an riat lam nêkan ner ngai inrisâng duai an ti.

⁷Thil a ne înmuhei khah a roinpui tak tak sika ripâknan ki sip nona rangin ki taksaah hin riling a ne pêk a, amakhah Soitana tirtôn, ker pâk nona ranga ne sun mai tûr chu a nit.

⁸Amakhah ne khâi inrikiang pêk rangin voithumkah Pumapa ki ngên a.

⁹Nikhomsela, ani khan, “Ki lungkhamna hih ni ta rangin ân rup, ki sinthotheina hih rât nonaah kêng inrikipin ai om ngai,” itin a ne sam a. Khasikin, Krista sinthotheina kha keimaah a om theina rangin ki rât nonahei hi ilôm takkan song ual tâng ki ti.

¹⁰Krista sikah khan rât nonahei, êronahei, dengtheinahei, nuamlonahei neh intâknahei khom ke lung a tluk ngai. Ki râtno kipah ki hong irât ngai a nit.

¹¹Intlo angkah ki nit tâk hih, nangmanin intlo chang ino thei inon nin ne isiam a nit. A dik takkan chu nangmani hi kêng ne sîr inṭha ranghei chu nin init. Ite nino khom inlang, îlampuiah khom nin tirtôn ilianhei khah tluk no bîk no ning e.

¹²Tirtôn ki nit iti richikna chu sinrikhêl hei, thilrikhêl hei, thil roinpui tak tak hei lam tinrêngah tuangdiar takka nin lâia kî tho ngai kha a nit.

¹³Îlampui takâm, koindang danghei nêka nangni ker ngai inchîn ual na? Sumpuan nangni ke pûr nona khah a nit non chu. Ngaihoi takkan kha fel zoinona kha chu ne zâ rei.

¹⁴Ringai ta u, atûna hih nin zianga zuang ranga ker siam voi thumna a nit. Nangni pûr no ning a, nin thil nei ngên no ning e, nangmani khah nangni kî zong chu nin nit. Naihein an nu neh pahei rang bûm pêk ngai mak a, nu neh pahein an naihei rang an ibûm pêk lem ngai a nit.

¹⁵Kei chu kî nei murdi nin rithla ta rangin ilôm takkan mang zoi vang ki ta, keimah khom rimang zoi rip ki ti. Lung nangni ki thlung tak tak sikah hin lung nin ne ithlung inroi bîk rang mani?

¹⁶Phurik nangni ki chang pêk nozia kha nin riat a; nikhomsela, tukhôkin manih chu ani khah mi vârrilet a nit a, milakin nangni a în-ôk tâk a nit la tîng a ti.

¹⁷Nin zianga ki hong itirhei lâia tukhôk manih imangin riamchânin nangni kî nei mani?

¹⁸Tita chu nin zianga hong rangin ki ngên a, ama lômin suapui dang khah ki hong tir sa a. Tita khan riamchânin nangni ai nei mani? Amah neh keimah lungril khatka riputa lêng ngai kin init ino mani? Munka arzui rit ngai ni mang ung im a?

¹⁹Nin ziangah mahni thiamna thu kin îsîr nin ne isôn mai ngai nîng a ti na? Pathian mitmuah Kristaah khan thu kin îsîr ngai kêng ai nit. Rual lungthlunghei, thil tinrêng hih nangmani siaminṭhatna ranga kin isin ngai a nit.

²⁰Ki zuang tikin ki nuam lam angkan nangni ki mu no lôiin iti neh nangni khomin nin nuam lam angkan nin ne mu no lôiin iti hih kî ṭi a nit; ringona hei, rinarsana hei, ningrithikna hei, rimumâkna hei, risîrrisakna hei, ridemna hei, ripâkna hei, buaina hei mu mai ki ta;

²¹Ki zuang nôk tikah nin mitmuah ki Pathianin mualphoi ne sak a ta, zoro thlenga sual isinhei, an thil porinche tho, riditna hei, hurna hei rilet ino mi itam takkahei sikah khan ki ṭap lôiin iti kî ṭi sa a nit.