Read Biete 2 KORINTH 13 Bible Online

2 KORINTH 13 - Biete bible

2 KORINTH 13

¹Atûna hih nin zianga ki zuang voi thumna rang a nit. Pathian Thubûn, “Riatpuitu inika manih, ithumka manih bâia rithok bangin thubuai rêng rêng infel rang a nit,” ai ti a nit a.

²Nin ziangah ki zuang a voi niknaah khan zoro thlenga sual isinhei neh mi dang murdihei ziangah ki lei isîr tâk a, atûnah hin nin lâiah om no khom inlang, nangni ki îril thlâm a nit; ki zuang tikin chu thil isual ithotuhei khah zua no ning e.

³Keimah ne mangin Krista khan thu a îsîr a nit iti fiana nin izong ngai kha la mûng nin ti. Krista khan nin lâia a sin tho duai mak a; khanêkan, sin itho thei tak a nit.

⁴Nikhomsela, ani khah rât nona sikin krosah ihêmde a nit a, Pathian sinthotheina sikin ai ring mai tâk a nit. Keini khom amaah khan rât mang ung a; nikhomsela, nangmani ta ranga kin sinthonaah Pathian sinthotheina sikin a ziangah ring sâng kin ti.

⁵Iamnaah khan nin om im, mahni khâtin rifia ngai unla, mahni khâtin risin ngai rei. Krista Jisua kha nangmaniah a om iti riatna nin inei ni mak im a? Rifianaah khan nin itluk ino a nit non chu.

⁶Keini chu rifianah khan lôsam mang ung iti la riang nin ti ki tûng.

⁷Thil isual îte nin tho nona rangin Pathian ziangah nangni kin iṭongṭai pêk ngai a nit; lôtluk bîka kin ilang theina rang ni mak, lôsam angkan ilang khom unlang thil iṭha nin tho theina rangin kin ingên ngai a nit.

⁸Thutak ithlop nino chu, â doi tiang îte kin itho thei ino a nit.

⁹Keimani kin rât no lâi khomin nangmani nin râtin chu kin ilôm ngai a nit. Khasikin, amahih kin ngên sa ngai, nin ṭhat rikip maina rang hih.

¹⁰Khasikah khan, iṭhet rang ni loiin, siaminṭha rangin Pumapan thuneina a ne pêk a, nin ziangah ki zuang tikin kha thuneina khah ke lek a nang nona rangin ki zuang tlung man hi thu hih ki irziak a nit.

¹¹A nungkhôn takah, ki suapuihei, ilôm takkan om rei. Risiaminṭha tum unla, nangni ki ngênna hi ringai unla, lungril inpumin om unla, ringei takkan om rei. Khanchu, lungthlungna neh ringeina Pathian khah nin ziangah om a ti.

¹²Ritum rithiangin chibai ribûk risak rei.

¹³Mi rithianghei murdi hin chibai nangni an bûk.

¹⁴Pumapa Jisua Krista lungkhamna hei, Pathian lungthlungna hei, Rithla Rithiang pôlna hei chu nin rêngka ziangah om riseh.