Read Biete 2 KORINTH 4 Bible Online

2 KORINTH 4 - Biete bible

2 KORINTH 4

¹Pathianin a lungkham zârin hi sin hih itho rangin a ne pêk a; khasikin, indôp mang ung e.

²Thil rithup izakpui iom murdi khah kin nôl a, milakin sin tho mang ung a, Pathian thu mi lêmna khomin mang sa ma ung e. Thutak kin inrilang a, Pathian mitmuah mi tin sia neh ṭha riatna mit itlung kin tum ngai a nit.

³Kin Thurchi Ṭha sîr hih ithupin a omin chu armang ṭianhei ta rang bangin ithupin ai om a nit.

⁴Krista chu Pathian ri-angpui ngêi a nit a; khanniseh, Krista roinpuina Thurchi Ṭha vâr, an chunga zuang ivâr khah an mu nona rangin atûnlâi rammual pathian hin iamnotuhei lungril mit khah a îndel pêk a nit.

⁵Keimani thu isîr mang ung a, Jisua Krista chu Pumapa a nit thu kin isîr ngai, keini khom Jisua sika nangmani somhei kin nit iti khom kin isîr sa ngai.

⁶Pathian roinpuina Jisua Krista mêla zuang ilang khah kin riat infel theina rangin, “Izînga rithokin ivâr hong vâr suak riseh,” ititu Pathian khan kin lungril hi a învâr tâk a nit.

⁷Nikhomsela, hi sinthotheina ritha lian hi keimania rithoka suak ni loiin, Pathiana suak a nit iti â lang fel theina rangin, kha rithla tiang richon khah ipilbêlah[2] kin îkol a nit.

⁸Lam tinrêngah iepden kin om a, nikhomsela, duai ual ngai mang ung e; lunginzîngin kin om a; nikhomsela, kin beidong ngai mak e.

⁹Nuamlo intuangin kin om a; nikhomsela, imarakin om tlak ngai mang ung; ito inlîrin kin om a; nikhomsela, inrimang ripin chu om mang ung e.

¹⁰Jisuaa ringna khah kin takpumah hin â lang theina rangin, a thina khom kin takpumah hin kin irput mai ngai a nit.

¹¹Jisua ringna khah kin takpum ithi theiah hin â lang theina rangin, keini iringa la omhei khom hi Jisua sika ithi ranga ri-ôi kin init mai a nit.

¹²Khaangkan, keimaniah hin thinân sin a tho ngai a, nangmaniah khan chu ringnân sin ai tho ngai a nit.

¹³Pathian Thubûn, “Ki iam a, khasikin thu ki îsîr a nit,” a ti a; khangkana iamna lungril khah riputin keini khomin kin ring a, thu kin îsîr ngai a nit.

¹⁴Pumapa Jisua kâiithoitu Pathian khan keini khom Jisua neh ne kâiithoi a ta, nangmani neh a makungah nen ngir a ti iti kin riat.

¹⁵Hihei tinrêng hih nangmani ṭhatna rang a nit; Pathian lungkhamna khan mi itam takkah a zo tîr tîr a, Pathian roinpuina rangin lômthu sîrna ṭongṭai Pathian ziangah lan ual ual an ti.

¹⁶Khasikah khan kin zâmrizal tlak mak e; kin putiang miriam hih hong inṭop tîr tîr khom sela, kin sungtiang miriam chu nîn tin siam intharin ai om mai a nit.

¹⁷Hi itôiteka ranga kin dengthei ichînte hin kumtluang roinpuina rikhêl tak, inrichak rual ino rakka roinpui khah a ne isiam pêk a nit.

¹⁸Thil imuh theihei hi thlîr mang ung a, thil imuh thei inohei khah kin ithlîr a nit. Thil imu theihei chu itôiteka rang bang a nit a, thil imu thei inohei chu kumkhuantluangka rang a nit.