Read Biete 2 KORINTH 5 Bible Online

2 KORINTH 5 - Biete bible

2 KORINTH 5

¹Hi rinênga ei omna in[3] hih iṭhetchit ni man sela, rivânah, kuta sin ni no, kumkhuantluanga om mai rang, Pathian isiam in idet khah ei nei iti ei riat.

²Atûnah hin chu rivâna ei omna rang isil khah rizuk tak takin hi inah hin ei îrung titak ngai a nit hih.

³Amakhah ei sil tikin chu korongboin om no min e.

⁴Hi rinêng inah ei om lâiah hin thuakdongin ei irung ngai a; hi rinêng takpum hih ichân ei nuam sika ni loiin, rivân takpum rikhûa om rang khah ei rizuk sika a nit; khanchu, ithi thei hih ringnan ilem zoi tâng a ti.

⁵Pathian ngêi khan khangkana rangin a nen rifûk a, khâmnan Rithla a ne ipêk a nit.

⁶Khaangkan takpum inah ei la om sung kârkah chu Pumapa inah la om hi mang meh iti irian, ihâi takkan ei iom ngai a nit.

⁷Ei ringnun hih imuh theiin fe mang me a, iamnan ei ife a nit.

⁸Ihâi takkan ei om a, takpum in hih imaraka Pumapa zianga om rang ei inuam ual a nit.

⁹Khasikin, hi takpum inah ei iom manih, ei iom ino manih khom ni sela, thil dang dang nêkan ama lôm inrup mi ini ei itum ngit ngai a nit.

¹⁰Mi tinin hi dam sunga ei sinthohei, â sia manih, â ṭha manih, ei sin lam angkah taka ei la mu chit theina rangin ei rêngkan Krista roirêlna makungah ei la îlang khai rang a nit.

¹¹Pumapa ṭiomzia irian, iiam rangin mi kin îthlêm ngai a nit. Pathianin a ne riat infel riai, nangni khomin nin lungril takin chu ne rianfel nin ti ki tûng.

¹²Nin ziangah kin ṭhat kin îsîr nôk tâk ni mak e; lungril tiang ni loia, putiang thil ringot isongtuhei khah nin sâm theina rangin, keimania isong rang iṭha nangni kin îril a nit.

¹³Kin întlôk a nit le khom Pathian ta rang a nit; kin ivâr a nit le khom nangmani ta rang a nit.

¹⁴Krista lungthlungna khan a ne izêk a nit, hingka hin kin ngaitua: mi murdi ta rangin mi khatkah a thi a; khasikin, mi murdi chu an ithi tâk a nit.

¹⁵Khante, â ringhei chu anmani ta ranga ring ni khâi loia, an ta ranga thia thoinôktu ta ranga an ring theina rangin, mi murdi ta rangin ai thi a nit.

¹⁶Khasikin, atûn ata chu miriam vatdânin tute en khâi mang ung e. Matonah khan miriam vatdânin Krista khah lei reh ta khom unlang, atûn chu khangkah khan reh khâi mang ung e.

¹⁷Mi tukhom Kristaah a omin chu thilsiam thar a hong nit a, thil iluihei khah a boi a, ringai ta, a hong thar tâk.

¹⁸Hihei murdi hih Pathiana rithoka suak a nit; ani khan Krista zârin amah neh ringeiin a ne siam a, ringeina siam sin kha a ne ipêk a nit.

¹⁹Khaangkan, Pathianin Kristaah rammual hih amah neh ringeiin a siam a, an siatnahei khah siatnan tep pêk khâi mak a, kha ringeina thu inpuangna sin khah keimani dârah a irngat tâk a nit.

²⁰Khasikin, Krista rithûla palâi kin nit a. Pathianin keimani mangin nangni ai ngên a nit, “Pathian neh ringeiin om rei,” itin, Krista rithûlin nangni kin ingên a nit.

²¹Ama zâra Pathian felna ei dong sa theina rangin, sual rêng rêng nei ino khah, eimani sikin Pathianin sualah ai siam a nit.