Read Biete 2 KORINTH 6 Bible Online

2 KORINTH 6 - Biete bible

2 KORINTH 6

¹Pathian lungkhamna nin idong khah rifena mupui loia nin om nona rangin keini ama sinthopuihei hin nangni kin ingên a nit.

²Pathianin, “Zoro lômomah nangni ki ngaitua a, Saninringna nî-ah nangni ki ngaitua ngai,” a ti. Ringai ta u, atûn hih zoro lômom chu a nit a, atûn hih saninringna nî chu a nit.

³Kin sinthona hi tutên demna an mu nona rangin îlampuiah khom lamchâi isiam tum mang ung e.

⁴Khanêkan, kin sinthona tinrêngah Pathian sinthotuhei kin init angkan mi mit itlungin kin om ngai a. Buaina hei, dengtheina hei, inkhôkna hei idiar takkan kin tuang a.

⁵Kuttum kin tong a, tâng ina khumin kin om a, vântlâng ihêmin kin om a, inrimu nang rakka sin isôlin kin om a, bungeiin kin om a;

⁶rithiangna heiah, riatna heiah, tuangna heiah, lungkhamna heiah, Rithla Rithiangah hei, lungthlungna tak takah hei,

⁷thutak isîrah hei, Pathian sinthotheina ki mang dânah hei, Pathian sinthotuhei angkah takin kin om a; felna râlthluk chu voitiang neh changtiang ichôiin kin idoi ngai a nit.

⁸Chôiinrisângin kin om a, mualphoi isak khomin kin om ngai a; inpâkin kin om a, rikôkinsia khomin kin om a; thu dik kin ril a, nikhomseh, milakheia be kin nit a;

⁹mi iriat ino angkan kin om a; nikhomseh, mi tinin an ne riat a. Â thi angkah dôr kin nit a; nikhomseh, kin ring a; nuamlona kin tuang a, ithat chu ni mang ung;

¹⁰lungkângna kin sik khomin lômna rang kin nei mai a; inriang fep khom unlang, mi tam takkah kin inrichong a; îte nei no khom unlang, thil tinrêng chu kin ta a nit.

¹¹O Korinth khuaa rual lungthlunghei, lungril ri-ong takkan nin ziangah thu kin îsîr a nit.

¹²Keimanin kin lungril nangni kin ikhâr pêk ni mak a, nangmanin kêng nin lungril nin ne ikhâr pêk ai nit.

¹³Naihei zianga thu sîr angkan ki îsîr a nit; nangmani tianga lungril kin riput lam angkah hin nangni khom riput unla, nin lungril iong inrizat rei.

¹⁴Iamnotuhei neh munkan ringkol ribât no rei. Dikna neh sualna khan rikopna ai nei thei mani? Izîng neh ivâr khomin im rikopna an nei a?

¹⁵Krista neh Beliara khomin rizomna im an inei? Iamtu neh iamnotu khan im munka tlâng thei an inei a?

¹⁶Pathian Tempil neh mirmil khomin im rizomna an inei? Eini chu Pathian iring Tempil kêng ei init. Pathian ngêiin, “Ki mihei ziangah om ki ta, an ziangah lêng ki ti; An Pathian nîng ki ta, anni khom ki mihei nîng an ti,” ai ti angkah khan.

¹⁷Khasikin, “‘An lâi ata hong suak unla, a ranin om rei, Thil inim rêng rêng tôn no rei, Khanchu, Nangni lôm ki ta,

¹⁸Nin ta rangin Pathian nîng ki ta, Nangni khom ki naipahei neh ki nainuhei nîng nin ti,’ Pumapa Tinrêngthothei khan a ti.”