Read Biete 2 KORINTH 7 Bible Online

2 KORINTH 7 - Biete bible

2 KORINTH 7

¹Khasikah khan, ki rual lungthlunghei, kha ṭonginkung khah ei nei sikin, taksa neh rithla tiang inimna murdi ata rithâr ei ta, Pathian iṭi pumin rithiangna inrikip ei ti u.

²Nin lungrilah mun ne ken rei. Tute chungah thônsual mang ung a, tute iseh ngai mang ung a, tute khom lêm ngai mang ung e.

³Amakhah thiamno nangni inchangna ranga kî ti ni mak e; masaa nangni ki îril tâk angkan kin lungrilah nin om mai a, nangmani neh chu ithi a nit le munka thi, iring a nit le munka ring kin ihuam a nit.

⁴Nangmani lâiah chu ingam takkan ki ṭong a, nangni ki song tak tak a, ker thla khom a irngam tak tak a nit; kin dengtheina tinrêng khomah khan lômin kî sipilêt a nit.

⁵Makedonia kin tlung nung khomah khan, kin taksa khan ringamna nei ual mak a; intakna tinrêng kin tong a, putianga ner sualpui an om a, sungtianga ṭi rilônthingnahein a ne chîm a.

⁶Nikhomsela, rianginvâihei thlangamtu Pathian khan Tita hong tlung imangin thlangam a ne sak tâk a.

⁷A hong tlungna ringot khah nen lôm ni mak a, nangmani sika a thlangamna khom khan thlangam a ne isak a nit; nin ner ngai tâkzia hei, nin ne tuangpuizia hei, ki ta ranga ṭhatnem nin ringaizia hei a ne ril a, kha thu khan thlangam a ne isak nôk ual a nit.

⁸Ki lekhathon khan ngaisiat nangni a sak iti ki lei riat phutah khan chu ki însîr a nit; khannisela, ki lekhathon khan itôitekah bang ngaisiat nangni a sak iti ki lei riat zel sikin însîr nôk khâi mang e.

⁹Atûn chu ki lôm tâk, ngaisiat nangni ki sak sik ni loiin, nin ngaisiatna sika nin irlet tâk hi ki lômna chu a nit. Kha ngaisiatna nin ituang khah Pathian lungdo a nit a, keimani sikin îte nin îchân ino a nit.

¹⁰Pathianin lungdo angkana ngaisiatna hin saninringna â thlun a, insîr om ino tak a nit. Nikhomsela, miriam ngaisiatna ringot khan chu thina a îthlun ngai a nit.

¹¹En ta u, Pathian lungdo angkah taka nin ngaisiatna hin ṭhatnemringaina nangni ân nei tâk tlia hi! Nin idikzia inlang nuamna hei, sual nelna neh sual isin ṭina hei nin nei tâk a; nin ner ngaizia hei, ṭhatnemringaina hei, sual isintu thunun nuamna hei nin nei inthar tâk tlia hi! Atûn chu hi thilah hin rinangna nei mak chei iti nangmani ngêiin nin inlang tâk.

¹²Khanchu, nin zianga ki lekhathon khah thil isual isintu sik manih, thônsualna tuangtu sik manih sika riziak ni mang e. Khanêkan Pathian mitmuah kin ta ranga nin ripêkna inthûkzia nin mu suak theina ranga ki irziak a nit.

¹³Kha sikah khan thlangamin kin iom tâk a nit; Tita lômna sikin kin lôm nôk ual a, nin rêngkan a lungril nin înhar tak tak a nit.

¹⁴Tita ziangah hin nangni ki song tak tak ngai a, mualinphoi mang e. Thu dik tak nin ziangah ke sîr ngai a, Tita zianga nangni kî song khom hi thu dik tak a nit.

¹⁵Khante, nin rêngka a thu nin ôizia hei, iṭi neh inthing puma amah nin lei lôm dân hei a riat mai a, a lungril chu nangmani tiang a îthlêk nôk ual a nit.

¹⁶Lam tinrêngah nangni ker ngat ngam tâk sikin kî lôm a nit.