Read Biete 2 KORINTH 8 Bible Online

2 KORINTH 8 - Biete bible

2 KORINTH 8

¹Suapuihei, Makedonia rama koindanghei lâia Pathian lungkhamna sintho khah nin riat rangin kin inuam a nit.

²Dengtheina natinsat taka ifia an nit pumin an lôm tak tak a, an inriang fap pum khomin tikthlâina tak an inei a nit.

³An theidôr angkah takin, a nit, an theidôr nêka tam an ipêk a nit iti kî riatpui a nit. Amakhah anmani lungsuak ngêia an itho a nit.

⁴Judai rama Pathian mihei ṭangpuina sinah hin iṭang sa an ne ngên a,

⁵amakhah kin tûng ban a nit. Amasan Pumapa ziangah an ripêk bak a; khanungchu, Pumapa lungdo angkan kin ziangah an irpêk nôk a nit.

⁶Khaangkan, matona hi sin a lei iphut tâk, ṭangpuina tholôm nin lâia rifuang khah, hong isin zoi rangin Tita hi kin ngên a.

⁷Iamnaah, thu-ah, riatnaah, ṭhatnemringai nangna tinrêngah, lung nin ne thlungnaah, lam tinrêngah ma nin îruai ngai angkah khan, hi lungthlungna sin khomah hin ṭhatnemringaina isua rei.

⁸Thu pe angkah tianga kî ti ni mak a, thilpêkna lama mi danghei tikthlâizia enin nin lungthlungna tak neh tak no â lang fiana ranga ki îsîr a nit.

⁹Ei Puma Jisua Krista lungkhamna khah nin riat; ân riangna sika nin richong theina rangin, richong bâk khom sela, nangmani sik pialin a zuang inriang tâk a nit.

¹⁰Khante, ker ngaidân hang isîr ki ti, nikuma nin iphut tâk khah atûnah hin tho zoi unla nin ta rangin ṭhâng a ti. Isin ranga â tum masa bang ni mak chei a, â sin masa tak khom nin nit.

¹¹Atîra nin ṭhatnemringai lam angkah khan, nin nei lam angkah takin ṭhatnemringai takkan sin unla, nin lei itum tâk angkah khan len zoi ta rei.

¹²Mîn ai nei ino chungah ni loiin, ai nei chunga riphal takka ai pêk a nitin chu ilôm inrup a nit.

¹³Mi dang takhoina rangin nangmani puakrik pêl unla kî ti ni mak, itam khâichôia risan risak thu ki îsîr a nit.

¹⁴Atûna nangmanin nin nei intam lâiah hin an risamna irukpui nin ta, anni khomin an nei intam tikah nin risamna nangni la rukpui an ti; khangkah khan, nin irsan risak rang a nit.

¹⁵Pathian Thubu-a, “Â rût intam khan nei intam ual mak a, â rût inroi khan nei inroi ual mak e,” iti riziak angkah khan.

¹⁶Khante, nin chunga ki ṭhatnemringaina angkana, Tita lungrila ṭhatnemringaina inneitu Pathian ziangah lômthu om riseh.

¹⁷Ani khan kin ngênna sik bang ni loiin, a ṭhatnemringaina sikin, ama lungsuak ngêiin nin ziangah ihong a tum tâk a.

¹⁸Amah neh suapui khatkah kin hong tir sa a, ani hih Thurchi Ṭha sîrnaah koindang murdîn an înpâk a nit.

¹⁹Kha bang khom khah ni mak, Pumapa roinpuina rang neh kin risiam thlâmzia inlangna ranga ṭhatnemringai takka hi lungthlungna sin isina kin inzinpui ranga Koindanghein an irthlang suak a nit.

²⁰Khaangkan, mihein iphal takka an ipêk, hi thilpêk itam hih kin sem dânah tutên an ne sêl nona rangin kin irdîn a nit.

²¹Pumapa mitmua â ṭha bang ni loiin, miriam mitmua ṭha khom kin ingaitua sa ngai a nit.

²²Khante, anmani lômin kin suapui khatkah khom hi kin hong itir sa a nit; ani khom hin ṭhatnem arngaizia lam itam takkan ki fia tâk a; atûn vâng chu nangni a iam titak tâk sikin ṭhatnem a irngai nôk ual tâk a nit.

²³Tita hi chu ki malpa neh nangmani ṭangpuina tianga sin ne thopuitu a nit a; suapui dang a champuihei khom hih koindanghei palâi an nit a, Krista roinpuina an nit hih.

²⁴Khasikin, koindanghei murdi lungthlungna nin neizia an mu a, nangni kin inpâkna hih â dikzia an riat theina rangin an chungah nin lungthlungna lei inlang rei.