Read Biete 2 KORINTH 9 Bible Online

2 KORINTH 9 - Biete bible

2 KORINTH 9

¹Judai rama Pathian mihei ṭangpuina inpêl chungchâng thu kha chu nin ziangah ker ziak intam nang mak e.

²Iṭangpui rangin nin risiam ṭian iti ki riat a, “Nikum ata Akaia rama suapuihein chu iṭangpui rangin an irsiam tâk a nit,” itin nangni song takkan Makedonia rama mihei ke ril ngai a, nin ṭhatnemringaina khan mi itam takkah â thor tâk a.

³Hi thua nangni ki songna hih ṭong khotlong a chang nona rangin neh nin lei risiam thlâm theina rangin atûnah hin suapuihei hih ki hong itir a nit.

⁴Makedonia rama mihein ne zuang zui ngân sela, lei risiam mak chei iti zuang mu duai ta sela, nangni kin iam tlia kaneh, nangmani ta rang bang ni loiin, kin ta rang khomin mualphoina ai nit rang a nit.

⁵Khasikin, tholôm nin înkung tâk khah nin lei bûm thlâm theina rangin suapuihei hih lei izuang itir masa a nangin ki riat a. Khanchu, nin lei risiam thlâmin chu nin thilpêkhei khah dânde sika pe angkah ni loiin, nangmani lungsuak ngêia pe nin nit iti a îlang fel rang a nit.

⁶Remai rei, hi chungchângah hin chu iroicheka tûtu khan iroichekah ât a ta, itamka tûtu khan itamkah ât a ti.

⁷Mi tinin inpâm pum neh pe no thei ino angkana ringaia pe ni loiin, an lungsuak lam angkah takin peh riseh; Pathian khan ilôm takka petu khah lung ai thlung a nit.

⁸Pathian khan nin inang thil iṭha tinrêng nangni a pêk chit a, nin inang nêka tam khom thil iṭha nin tho theina rangin nangni ai pêk thei a nit.

⁹Pathian Thubûn, “Tikithlâi takkan risamhei a sem pêk a, A lungkhamna chu kumkhuakan om mai a ti,” ai ti angkah khan.

¹⁰Khante, arthetu ziangah chimu petu neh ifah rang ifâk ipetu khan chimu kha nangni pe chit a ta, nangni inthuar pêk a ta, nin tikthlâina râ khah nangni inpung pêk a ti.

¹¹Lam tinrêngah tikithlâi rangin nangni inrichong a ti; khante, keimani manga nin thilpêk sikah hin mi tam takkan Pathian ziangah lômthu la sîr an ti.

¹²Hi ṭangpuina sintho hin Pathian mihei risamna a îruk pêk bang ni mak a, Pathian zianga lômthu sîrna liantak khom inchangin a îlêt mai a nit.

¹³Hi nin sintho hin Krista Thurchi Ṭha nin ipoma nin zômzia hei, anmani ta rang neh mi tin ta ranga nin tikthlâizia hei ân lang a, kha sikah khan mi tam takkan Pathian ziangah roinpuina pêng an ti.

¹⁴Khasikin, anni khomin Pathian lungkhamna nin dong tak tak sikah hin nangni kan takkan nangni ṭongṭai pêk mai an ti.

¹⁵A thiltlongpêk isîr thei rual ino sikah hin Pathian ziangah lômthu om riseh.