Read Biete GALATIA 1 Bible Online

GALATIA 1 - Biete bible

GALATIA 1

¹Keimah Paula, tirtôn, miriam itir ni no, miriam iphun khom ni no, Jisua Krista neh thina rithoka amah kâiithoitu Pa Pathian iphun hin,

²ki zianga suapui iom murdihei neh hin Galatia rama koindanghei chibai nangni kin bûk.

³Pathian, ei Pa neh ei Pumapa Jisua Krista ziang ata lungkhamna neh ringeina nin ziangah om riseh.

⁴Pathian, ei Pa lungdo zômin, atûnlâi rammual isual taka rithoka a ne san isua theina rang neh ei sualhei ner sûnfâi rangin, Krista khah amah a irpêk tâk a nit.

⁵Pathian ziangah roinpuina kumkhuantluangin om riseh. Amen.

⁶Krista lungkhamna zâra nangni koitu khah irang takkan nin mâk a, Thurchi Ṭha dang nin îpom hih arkhêl kî ti a nit.

⁷A dik takkan, “Thurchi Ṭha dang” zel omak e, mi ṭhenkahei hin nangni inbuaiin Krista Thurchi Ṭha indanglam an itum kah a nit.

⁸Nikhomsela, keimanin manih, rivâna rithoka zuang iṭum vântirtôn khomin manih, Thurchi Ṭha dang nangni an isîr pêkin chu vânisalin om riseh.

⁹Matona nangni kin lei iril tâk a, atûn khom nangni ril nôk ki ti; nin îpom tâk Thurchi Ṭha nino Thurchi Ṭha dang nangni hong iriltu murdi chu vânisalin om riseh.

¹⁰Khate, atûnah hin miriam inlôm itum im kin init, Pathian inlôm? Anitnole, miriam inlôm ranga sîr ngai angkan ki îlang mani? Miriam inlôm itum nin lang chu Krista suak ni no ning e.

¹¹Khaangkan, suapuihei, ki Thurchi Ṭha sîr khah miriam tiang thu ni mak iti nangni ki înriat a nit.

¹²Miriam zianga rithoka kî mu ni mak a, tute ne înrisei khom ni mak e. Jisua Krista ngêi khan inlârnaa a ne înmu a nit.

¹³Judahei sakhuaa ker pêk ngai lâia ki om dân khah nin riat a, Pathian koindanghei natinsat takkan nuam ilon inboi dip kî tum ngai a nit khah.

¹⁴Khante, ki chibulhei thumâk chungchânga ṭhatnem ker ngai bîk ngai sikin, Judahei sakhuaa ki sinthonaah khan ki chihei lâia ki rual itam takkah kî khêl a nit.

¹⁵Nikhomsela, Pathian khan ki nu phûngsunga rithokin a ne ser inran a, a lungkhamin a ne koi tâk a.

¹⁶Jentailhei lâia a Thurchi Ṭha ke sîr theina ranga a Naipa ki zianga inlâr ranga ân kung lâi khomah khan mi dang tute ne ṭangpui rangin rôl mang a;

¹⁷Jerusalema ki matona tirtôn lei ichanghei ziangah khom fe mang e. Arabia ramah ki fe zel a; khantak ata Damaska khuaah ki hong ikîr nôk a nit.

¹⁸Khante, kum ithumka nungah khan chu, Petera neh risôn rangin Jerusalemah ki fe a, a ziangah sûn sômlei sûn ringakah ki châm a.

¹⁹Nikhomsela, Pumapa unai Jakoba ti no chu tirtôn danghei tute mu mang e.

²⁰Nin zianga ki thu riziak hih â dik a nit, Pathian mitmuah khom milak ril mang e.

²¹Kha nungah khan Suria neh Kilikia ramheiah ki fe tâk a.

²²Kha zoroah khan Judai rama koindanghei vângin chu ki mêl la reh mak a;

²³“Matona a nuam ne lo ngaitu khan iamna thu inboi dip ai tum ngai kha atûn chu aman kêng a îsîr tâk,” iti mi îsîr bang an riat a.

²⁴Khaangkan, keima sikin Pathian an inpâk tâk a.