Read Biete GALATIA 2 Bible Online

GALATIA 2 - Biete bible

GALATIA 2

¹Khante, kum sômlei kum ilikah a vun nungah khan Barnaba neh Jerusalemah ki fe nôk a, Tita khom kin ṭhui sa a.

²Pathianin ife ranga a nen riat sikin kî fe a nit. Ruaitu lian ual ualhei bang khah a ranin ker mupui a, Jentailhei lâia Thurchi Ṭha ki înpuang ngai hih anmani riatah ke sîr a; zoro thlenga neh atûn lâia ki sintho maina hih â tlonga kî sôl a nit nona rangin.

³Khante, ki champui Tita hih Grik mi ni khom sela, ser intan tên tên ni ual mak e.

⁴Iamtu lem, inrûkka hong ilûthei bang khan ser intan tên tên an tum a; khahei khan suaka an ne siam theina rangin Krista Jisuaa zalenna ei inei hih ienthlît ranga lût an nit.

⁵Nikhomsela, Thurchi Ṭha thutak khah nin ta ranga an indanglam nona rangin an thu ichîntekah khom zôm nuam mang ung e.

⁶Khante, ruaitu uala an ibehei khah ingkana mi khom ni sela, keima ta rangin chu îte danglam ual mak, Pathianin putianga lang dân kha ringai inluh mak e; kha mihei ngêi khom khan thu thar îte an ne ril rang nei ual mak.

⁷Khanêk manin Petera khah Judahei lâia Thurchi Ṭha sîrna sin inkol ai nit angkan, sertan inohei lâia Thurchi Ṭha sîrna sin ki ziangah inkol a nit iti an mu a.

⁸Sertanhei ta ranga tirtôn ini ranga Petera inrithluktu Pathian khan, Jentailhei ta ranga tirtôn ini rangin kei khom a ne înritluk a nit.

⁹Khanchu, koindang chopui taka ibe Jakoba, Petera, Johana hei khom khan hi sin bîk kî dong hih an riatin, keimani Jentailhei lâia fe rangin, anmani Judahei lâia fe rangin; keimah neh Barnaba chu ripôlna kut changtiang an ne pêk tâk a.

¹⁰An lâia inrianghei kha chu iremai rangin an ne nuam a, kha tak khah ki lei itum ngai pial a nit.

¹¹Khante, Petera kha Antiokei khuaah a hong lâiah khan dem ikâiin a om a, â langin mâiritongin ker kôk a.

¹²Petera kha Jentailhei lâiah bu a nêk ngai a; khannisela, Jakoba zuk itir mi ṭhenkah Jentailhei serintan itumtuhei khah an zuang tlung tenan chu sertan mihei khah a ṭi sikin ṭang nôk khâi loiin, arkiang tâk a.

¹³Juda danghei khom khan Petera tho dân khah an zui a, Barnaba tena khom an tho dân khan a ṭhui inkôi tâk a.

¹⁴Nikhomsela, Thurchi Ṭha thutakah lôn mak iti ki riatin an rêngka makungah Petera ziangah, “Nangmah Juda ni nit a, Judahei angkan om loia Jentailhei angkana omah hin, iranga Jentailhei khah Judahei angkana in-om tên tên nî tum hi?” ki ti a.

¹⁵Keimani hi Juda mi piala inzir kin nit a, “Jentail mi sualhei” an iti ngaihei ni mang ung e.

¹⁶Khannisela, Dân sintho sikin mi thiam ichangin omak a, Jisua Krista iam sik bangin min Pathian ziangah thiam ichangin an iom a nit iti kin iriat a nit. Dân zôm sik ni loiin, Krista iam sika Pathian ziangah thiam kin chang theina rangin, keini khom hin Krista Jisua khan kin iamna kin irngat a nit. Dân zôm sikin tute Pathian ziangah thiam ichangin om no nih.

¹⁷Krista iam sika Pathian zianga thiam ichang itum keinihei hi, Jentail mi sualhei angkah chia la be kin nit inteh, Krista khan sual sin a lei itho tina mani? Nâi sâi mak e!

¹⁸Ki Dân ṭhet tâk khah ken ding nôkin chu Dân ikhiaktu ki nit iti ai fel a nit.

¹⁹Pathian tianga ki ring theina rangin kei chu Dân sikin Dân tiang lamah chu kî thi tâk a nit.

²⁰Krista ziangah ihêmden ki om tâk a; nikhomsela, kî ring a nit. Keima ringnun ngaingira ring ni khâi mang a, keimah-ah hin Krista chu ai ring tâk a nit. Khante, atûna taksaa kî ring hih, lung ne thlunga, ki ta ranga a ringna petu, Pathian Naipa iamnaa ring ki nit.

²¹Pathian lungkhamna hih heng no ning e. Dân zôm sika Pathian zianga thiam ichang thei a nitin chu, Krista thina hi â tlong nîng a ti.