Read Biete GALATIA 3 Bible Online

GALATIA 3 - Biete bible

GALATIA 3

¹O Galatia rama mi intlohei o, tûm nangni dôi? Nin mitmu rengah Jisua Krista ihêmde a nit thu ifel takka inlang a nit tlia kaneh.

²Amah kah hih ne ril ta u: Rithla nin idong khah Dân nin zôm sika nin idong im, Thurchi Ṭha nin riata nin iam sika nin idong im?

³Hingkah dôr hi kêng nin lei întlôk na! Rithlaa phut tâk pialin taksan nin imong rang mani?

⁴Khangkah dôra nin chunga thil itlung murdi khah chanlamboi im ai nit? Ni tlak no nih dua!

⁵Khate, Rithla nangni petu neh nin lâia sinrikhêl isin ngaitu Pathian khan, Dân nin zôm sika ai thôm ai nit, Thurchi Ṭha nin riata nin iam tâk sikâm?

⁶Pathian Thubûn, “Abrahama khan Pathian a iam a, kha a iamna khah a felnaa be a nit,” ai ti angkah khan kêng ai nit.

⁷Khasikin, Abrahama nai dik takhei chu iamna neihei hi an nit iti reh rei.

⁸Khante, Pathian Thu khan Jentailhei khom iamna sikin Pathianin thiam a la închang rang a nit iti a lei mu thlâm a; khanchu, Abrahama ziangah, “Nangmaah khan nam tin ṭhativurin om an ti,” itin Thurchi Ṭha khah a lei îsîr thlâm tâk a nit.

⁹Khaangkan, Abrahaman a iam a, ṭhativura ai om angkah khan, ama iam angkana iamhei murdîn ṭhatvurna khah an idong a nit.

¹⁰Dân izôma ringathei chu vânisâm nuaia om an nit. Pathian Thubûn, “Dân lekhabua thu chuang murdi izôma sin riai ino chu vânisâm nuaiah an iom a nit,” ai ti angkah khan.

¹¹Khante, Dân zôm sikin Pathian mitmuah tute thiam ichang omak iti a îlang ian tâk a nit, Pathian Thubûn, “Iamna sika mi fel chu ring a ti,” ai ti a nit.

¹²Nikhomsela, Dân chu iamnaa ringat ni mak e, “Dân zôm inrikiptuhei chu ring an ti,” ai ti kah a nit.

¹³Pathian Thubûn, “Thinga ikhâi kangân chu vânisal an nit,” ai ti angkah khan, Krista khan ei rithûlin vânisal kha ipêlin, Dân vânisal ata a ner tlan isua tâk a.

¹⁴Khanchu, Pathianin Abrahama ṭhat a vurna kha Jentailhei ziangah Kristaah khan a zuang tlung tâk a, eini hin Rithla ipe inkung khah iamna sikin ei imu thei tâk a nit.

¹⁵Suapuihei, enrikhînan miriam tho ngai dân hang isîr inlang: mihein thu an thlung infel tâkin chu, miriam thuthlung ringot ni khom sela tutên ikhiak ngai mak a, ibôk khom bôk ngai mak e.

¹⁶Pathianin Abrahama neh archi ziang bangah ṭong a înkung a nit kha; mi itam takka chungchâng isîrin, “Richihei” ti mak a, mi mal chungchâng isîrin, “Richi” ai ti a nit; kha mi khah Krista hi a nit.

¹⁷Kî ti nuam chu amahih a nit: Thuthlung, Pathian lei îndet tâk kha kum rizalikah sômithumka nunga Dân hong iom tâk khan, thuthlung kha ikhiak ual mak a, a ṭonginkung khom khah indanglam ual mak e.

¹⁸Dân zôm sika Pathian richon luatu inih thei ni sela chu, Pathian ṭonginkung sik ni khâi no nih; Khannisela, Pathian khan chu ṭonginkung sikin a nit Abrahama ziangah richonluatu rang ai pêk a nit.

¹⁹Khate, Dân hih îtho sika ipe ai nit mani? Siatna hih im ai nit tak inlang ranga vântirtônhei palâia manga ipe a nit a; Abrahama zianga nai a înkung khah a zuang ilang mâka rang banga a nit.

²⁰Mi khatkah bang rangin palâi a om nang mak e, Pathian chu khatkah bang a nit.[1]

²¹Khate, Dân khan Pathian ṭonginkung hi a îkal mani? Ikal viat mak e! Miriamhei inring thei Dân an lei imu ni sela chu, mi tinrêngin kha Dân khah izômin Pathian ziangah thiam ichangin an iom rang tâk a nit.

²²Nikhomsela, Pathian Thubu khan, “Tinrêng hih sual thunuaiah a om tâk,” a ti a; khanchu, Jisua Krista iam sika dong rang thilpêk inkung khah â iamhei murdi ziangah ipe a nit

²³Iamna thu a zuang tlung ma, kha iamna khah a hong ilang mâkah kha chu Dânin a ne ikhumkhap a nit kha.

²⁴Khaangkan, Dân chu iamna sika thiam ei chang theina ranga Krista ziang tianga ne kâiruaitu a lei nit.

²⁵Nikhomsela, atûn chu iamna a hong om tâk a, Dân kâiruaina nuaiah om khâi mang me.

²⁶Khanchu, Krista Jisua nin iamna sikin nin rêngkan Pathian naihei nin nit tâk.

²⁷Kristaa baptisma chang murdihei chu Krista khan nin irthluk tâk a nit.

²⁸Amakhan danglamna rêng rêng omak e; Juda neh Grik khom, suak neh suak nino khom, ipa neh nupang khom, Krista Jisua khan nin rêngkan pum khatkah nin nit.

²⁹Krista mi nin nit tâkin chu Abrahama richihei nin nit a; Pathian ṭonginkung angkan richon luatu ranghei nin nit.