Read Biete GALATIA 4 Bible Online

GALATIA 4 - Biete bible

GALATIA 4

¹Ki îsîr tum kha la hang isîr mai ki ti: Naiipa khah richon murdi iluatu rang ni khom sela, naipang a la nit sungin chu â neitu tak a nit pum khomin suak neh danglamna nei ual mak e.

²Naipang a la nit sung, a pa zoroten a tlung mâkah chu, zêktu neh enkoltuhei nuaiah ai om ngai a nit.

³Khaangkan ei ni khom rithla tiang ei puitling maah khan chu, rammual inriseina dik ino nuaiah suakin ei iom a nit.

⁴Nikhomsela, zoroten a hong tlung chimah khan, Pathianin a Naipa a zuk tir a.

⁵Pathian naihei ei nit theina ranga Dân nuaia omhei ner tlan rangin, ani khah nupang sunga inzirin Dân nuaiah a lêng a.

⁶Khante, naihei nin nit iti riatnan, Pathianin a Naipa Rithla khah ei lungrilah a zuk tir a, “Abba, Epa,” itin ei îkhêk ngai a nit.

⁷Kha sikah khan, suak ni khâi mak chei a, nai nin nit tâk. Khanchu, nai nin nit tâkin chu Pathian zâra richonluatu ranghei nin nit.

⁸Zoro thlengah khan chu Pathian la reh ngai mak chei a; khasikin, an inzir dân reng khoma Pathian ni tlak inohei suak nin lei nit a.

⁹Atûn chu Pathian nin hong riat tâk a—anitnole—Pathian mi riat nin hong nit nungah hin, iti rang a nit ual; ingkan ngân im rammual inriseina dik ino,[2] îte ni viat inohei tiang nin ingat a, an suak ichang nôk nin inuam tâk hi?

¹⁰Nikhuahei, thlahei, zorohei, kumhei, nin ser inṭhat ngai hi!

¹¹Nin ta ranga ki sinthohei murdi khah â tlong nîng a ti iti kî ṭi a nit.

¹²Suapuihei, keima angkana om rangin nangni kî ngên a nit; nangmani angkan kei khom ki om a, ki chungah îte ṭhano sin mak chei.

¹³Nin ziangah Thurchi Ṭha ki hong isîr masatak ṭum kha, ki taksa inṭop sika a nit iti nin riatmai a.

¹⁴Ki taksa ngîrmun khah nin ta ranga ibuaipui iom tak ni khom seh, ne musit mak chei a, nê tir mak chei. Khangkah nêkan rivâna vântirtôn angkan, Krista Jisua angkah dôrin nin ne lei ilôm a nit kha.

¹⁵Vânnei nin ritina khah takâm ai om tâk? Ithei ni sela chu nin mithei khom ikhelin ne pe nin huam iti kî riat kêng ai nit.

¹⁶Thu dik tak khah nangni ke ril sikin nin irâl kî nit tâk mani?

¹⁷Ne sêlikaltuhei hin ṭhat tianga ni viat loiin nangni an uksak tak tak a, anmani nin uksak theina rangin keimania rithoka nangni ṭhen hih an itum a nit.

¹⁸Nin lâiah kin om no khomin â ṭha tianga nangni uksak an nitin chu, tiklâi khomin hingkana uksakna hih ilôm ai om a nit.

¹⁹Ki nai lungthlunghei, Krista nitna khah nangmaniah siamindetin a om mâkah chu naiha rivoiin nangni ki irvoi a nit.

²⁰Atûnah hin nin ziangah om inlang ker zuk tak tak, ki rôl irî khom ai danglam rang pial na! Nangmani chungchângah ke lung ai buai a nit.

²¹Dân nuaia om nuamhei o, ne ril ta u, Dân thu khah nin iriat ino mani?

²²Hingka hin riziak a nit, “Abrahama khan naiipa inikah a nei a, khatkah kha suaknu nai, a dang khatkah kha a chongpinu nai a nit,” iti hi.

²³Nikhomsela, suaknu nai kha chu taksa dân angkana inei a nit a, a chongpinu nai kha chu Pathian ṭonginkung sika inei a nit.

²⁴Kha thu khah ṭongrikhek a nit: Kha nupang inikahei khah thuthlung inikah an nit. Khatkah kha Sinai tlânga rithoka thuthlung kha a nit a, amakhah Hagari a nit a, a nai neihei chu suak an nit.

²⁵Khante, Hagari hih Arabia rama Sinai tlâng[3] khah a nit a; atûnlâi Jerusalem khua neh munkah a nit, a sunga omhei murdi neh an rêngkan suak an nit.

²⁶Nikhomsela, chungtianga Jerusalem kha chu suak ni mak a, amakhah eimani nu chu a nit:

²⁷“Nangmah â ching, nai nei ngai ino, lôm inla; Nangmah naiha rivoi ngai ino, râifânin ikhêk roh. Pasal inei nu nêkan chu beidongnu khan, Nai nei intam ual a ti,” iti Pathian thubu-a riziak angkah khan.

²⁸Atûn chu, ki suapuihei, Isaka angkah khan Pathian ṭonginkung naihei nin nit.

²⁹Kha lâiah khan, taksa dâna zuang isuak khan Pathian Rithla dâna zuang isuak khah a nuam a lo a, atûn khom khangkah ngirah khan a la nit mai.

³⁰Nikhomsela, Pathian Thubu khan ingkan im ai ti kha? “Suaknu chu a naipa neh ûmisua roh, suaknu naipa khan a chongpinu naipa khah richon a luapui rang ni mak,” ai ti a nit kha.

³¹Khasikah khan, suapuihei, suaknu naihei ni mang me a, a chongpinu naihei ei nit.